牛蓋 (已搬遷) 新店位置

牛蓋飯總係有種魔力，淨係見到一片片牛肉已經流哂口水，立刻影完相就要食！坊間嘅牛蓋飯唔算平，難得屯門哩間小店價錢合理，絕對要嚟試吓。店舖好細，大概十幾個位，座位較逼，晚飯時間嚟都要等一陣。哩到係自助形式，落單，拎餐具同食物都係自己嚟。牛係目標，所以叫左牛扒蓋飯同極上牛蓋飯，仲要埋220g添！牛扒蓋飯係入門版，價格完全可以接受。大碗份量足，大食嘅一定會飽。牛肉一片片好薄，配上燒汁味道係不錯嘅！不過，略嫌有d韌。飯就較為失望，唔係用珍珠米，但價格平，唔可以要求太多。而米飯整得過濕，欠缺口感。極上蓋飯嘅牛脂肪較多，一入口，雖然未及和牛咁入口即溶，但肉質好嫩滑，而且滿囗充分牛肉油脂，質素比牛扒蓋飯更高一級。加上一隻滑蛋，令蓋飯昇華。蛋汁滑滑地，配牛肉同飯都好夾。相反，牛扒蓋飯就較為單調。如果特登嚟食，會推介細碗嘅極上牛蓋飯，價錢合理，牛肉高質。

收工本來想到因為一張告示而成為屯門區群組焦點嘅雜大大開餐，可惜光頭老闆話壞咗雪櫃，要到再過三幾日先有機會重開。唔緊要，即時想起同場另一家人氣小店 - 牛蓋。用扶手電梯落到地下就見到個牛招牌，原來係陸她娜舊鋪位，難怪網上一直講小店，小得只十多個坐位，要自己點餐取餐還餐具。步入店鋪只見老闆一人對住爐頭忙碌工作，無第二個伙計，正宗一男子小店，稍稍等咗一陣先可以點餐。晚飯時間，大約等咗15分鐘先輪到我取餐。取餐時發現老闆先張慢煮好嘅牛扒放上火爐，稍為烤烘，再切片上菜，見到呢個過程再配合傳嚟嘅香氣已經令人狂吞口水。第一次叫咗個大份牛扒蓋飯(220g)，餐牌上寫住牛扒係慢煮美國安格斯牛肩肉。飯面鋪上滿滿牛肉，牛肉無因為要外觀上好睇而切得過簿。慢煮過後保持住本身肉汁，咬落鮮嫩有嚼口。經過烤烘，更能發揮油脂香味，外圍燒得焦香微脆，有如燶邊叉燒嘅效果，食得更過癮。汁係帶甜嘅燒汁，味道同外間普遍食到嘅唔同，配上牛扒本身肉汁同油份，要食晒成碗飯並唔係難事。食得出貨真價實嘅美國牛肉，份量同質量並重，$88價錢絕對合理。下次要再嚟試一下皇牌極上牛蓋飯(慢煮牛小排)。