牛蓋 (已搬遷) 新店位置

收工本來想到因為一張告示而成為屯門區群組焦點嘅雜大大開餐，可惜光頭老闆話壞咗雪櫃，要到再過三幾日先有機會重開。唔緊要，即時想起同場另一家人氣小店 - 牛蓋。用扶手電梯落到地下就見到個牛招牌，原來係陸她娜舊鋪位，難怪網上一直講小店，小得只十多個坐位，要自己點餐取餐還餐具。步入店鋪只見老闆一人對住爐頭忙碌工作，無第二個伙計，正宗一男子小店，稍稍等咗一陣先可以點餐。晚飯時間，大約等咗15分鐘先輪到我取餐。取餐時發現老闆先張慢煮好嘅牛扒放上火爐，稍為烤烘，再切片上菜，見到呢個過程再配合傳嚟嘅香氣已經令人狂吞口水。第一次叫咗個大份牛扒蓋飯(220g)，餐牌上寫住牛扒係慢煮美國安格斯牛肩肉。飯面鋪上滿滿牛肉，牛肉無因為要外觀上好睇而切得過簿。慢煮過後保持住本身肉汁，咬落鮮嫩有嚼口。經過烤烘，更能發揮油脂香味，外圍燒得焦香微脆，有如燶邊叉燒嘅效果，食得更過癮。汁係帶甜嘅燒汁，味道同外間普遍食到嘅唔同，配上牛扒本身肉汁同油份，要食晒成碗飯並唔係難事。食得出貨真價實嘅美國牛肉，份量同質量並重，$88價錢絕對合理。下次要再嚟試一下皇牌極上牛蓋飯(慢煮牛小排)。