鴨子園 (已結業)

今天入天水圍探朋友，晚飯時去了朋友介紹T Town呢間鴨子園，試吓特色上海菜。店子頗大，裝修唔錯，我地一行5人被安排坐半卡位，感覺幾乾淨企理。一打開個餐牌，首先覺得野食唔貴，一般小菜都是60幾至70幾（海鮮除外）。雞絲粉皮麻醬夠香，估唔到青瓜份量也好足夠，伴埋粉皮一齊食，青瓜調和咗整碟味道，非常好吃，一點也不膩口，好快已被我地KO整碟。食上海野點會無我最鍾意既擔擔麵及鍋貼。擔擔麵麵條夠爽，麻醬味啱啱好，肉碎不多肥豬膏，由於個麵一上枱就太香，又是瞬間被我地每人一小啖KO唒。鍋貼我地叫咗兩客，唔使爭食。皮煎得香脆，肉餡不似街外嗰啲xx大王咁，肥肉多過瘦肉，肉汁豐富，食完後本想再叫多一碟，但擔心食唔哂其他野，所以hold住。主菜我地叫咗 山楂鳳梨咕嚕雞、芥末牛柳粒、花雕浸醉乳鴿、清炒西蘭花，再加多個我朋友極力推介的鴨子園炒飯。由於啲餸上得好快，加上我又好鬼肚餓，搞到我掛鬼住食唔記得影碟芥末牛柳粒。差啲連只醉鴿都唔記得影，好彩食到半路補影返，可以推介俾朋友😁花雕浸醉乳鴿不好意思，掛住食，食咗半只先記得影😁乳鴿肉嫩滑，酒味香，鴿肉入哂味，香及正👍🏻山楂鳳梨咕嚕雞整體味道酸甜酸甜，好醒胃，送飯一流

天水圍愈來愈多餐廳進駐，只要你諗到想食咩，附近商場都能滿足到你，真係食得方便，而且好容易找到好食的餐廳。前幾天來到這間食北京填鴨有名的鴨子園，朋友告知他早前晚市來到想食填鴨已經賣完，今次我地黎到食午市就可以試到了，看來哩間餐廳的填鴨好受歡迎。入到餐廳第一反應是：哇，裝修得咁靚既！餐廳的裝修非常精緻，有種中西合璧的感覺。環境的確能提升食客用餐的心情。打開餐牌見到有午市套餐，價錢大眾化，免加一及茶芥係加分位，我地點左一個烤填鴨同黃金蝦球套餐。大約等左10分鐘左右就上菜了，上餐速度快！套餐包一碗老火湯及白飯，特別一提是碗冬瓜火鴨湯好清甜，跟餐送既都唔係求其，好飲。北京填鴨肉嫩皮薄，夾住青瓜同填鴨皮食好味道！諗番起都好耐冇食過北京填鴨喇，今次食番格外好食。另外仲點左醉乳鴿，花雕酒好香，乳鴿都大隻多肉，完全高水準，我地都對哩碟小菜讚口不絕。黃金蝦球炸到金黃色，外層的咸蛋黃酥炸金香，蝦球爽口，真係好食！是日的另一亮點係哩碗酒釀湯丸，跟餐加$10，好抵，落單果陣叫左一碗，點知食左一啖已經要追加多一碗，淡淡清香桂花，湯丸薄皮多芝麻，好食到一啖湯水都飲清光。下次一定會再黎食，而且必會點哩碗酒釀湯丸！