好運泰國美食

營業中

休息中

餐廳雖然喺商場入面，對面又有米芝蓮糖水店，但其實商場人流唔多，可以用靜嚟形容，所以唔容易發現到小店🙉。雖然食評唔多，但當中不乏讚佢嘅評論，加上自己中意試伏😂，最後決定試下晚餐。海南雞 $94/半隻雞肉嫩滑，雞皮唔叫爽彈，而係滑。無雞腥味，但亦無乜雞味，不過不失。炸蝦餅 $78性價比唔高，細細件，剪到有大有細，砌番一齊嘅話，似完整一粒分成三件FEEL。除非好中意食蝦餅，否則唔建議點佢😥。牛肉炒金邊粉 $74由於炒飯已經有海鮮，所以叫左牛肉。牛肉份量唔多，切得比較薄身；炒粉唔乾乾身，同埋碎濕濕。不過聞落同食落都好有鑊氣、同蛋香，而且好熱，調味適中、少少酸，唔錯🤤。菠蘿炒飯 $70炒飯配料幾豐富，除左大蝦同魷魚外，仲有三色豆、提子乾、菠蘿粒、肉鬆，如果加埋脆腰果就更正!! 飯炒到粒粒分明，而且幾正宗，用黃薑粉，而唔係咖哩粉。職員上菜快、效率高，落左柯打大概十分鐘就到齊。晚市除左有泰菜外，仲有日式串燒，選擇好多，而且價錢親民，又無加一，可以一試👍。其他資訊：餐廳滿$400先可以碌卡。