芽莊越式料理

營業中

休息中

今日好晏都未食晏想搵下午茶食，見呢間下午茶都幾豐富，就試試。點了個$78嘅下午茶，其實都唔平。呢個價錢有小食，主食同飲品。叫咗蝦米仔芥蘭苗，份量唔少，個汁甜甜哋幾好味，芥蘭苗好嫰。主食叫咗越式雞翼扎肉撈檬，個雞翼好入味，好香口，煮得啱啱好，超好味，碗檬粉好大碗，其實以下午茶呢講，真係超飽。飲品叫咗凍青檸梳打，調得不錯，好清新又消滯。其實以下午茶呢講，其實都唔平，不過如果要食 late lunch 又係一個幾唔錯嘅選擇。

本身苦惱地諗緊食咩好，見呢度嘅下午茶都好似幾啱食，就入咗嚟試下喇。呢個係午餐嘅小食，本身個汁都幾濃，加埋蝦米同花生嘅口感，普通嘅芥蘭都變得層次豐富，好易入口。呢個係餐飲，桃蜜熱柑桔。桃嘅味有啲假，同柑桔唔太夾。如果呢杯嘢飲係凍飲可能會好啲，因為可以令嘢飲更清新。呢個撈檬非常清爽，配埋酸酸甜甜嘅撈檬汁，簡直係最好嘅夏日午餐之一。扎肉好普通，唔係豬耳扎肉，亦唔夠肉汁。鷄翼好香脆，同牛油雞翼非常相似。呢度嘅牛丸粉係我食過最好嘅牛丸粉！湯底有好濃郁嘅牛肉味，好有越南牛肉粉嘅風味。牛丸係手打嘅，真係食到超濃嘅牛肉味同埋屬於牛肉嘅口感，仲有牛筋喺入面添！整體來講，呢度嘅環境同食物味道都好好，而且一定要試下呢度嘅牛丸同雞翼！其實呢度嘅下午茶可以有好多配搭，但係由於有啲小食係幾有特色嘅，建議大家可以選擇主食加小食嘅配搭。

呢一晚，終於食呢間，其實佢都開咗一段時間，佢嘅其他分店都食過，我食過嘅食物都ok好味。 一入到去，餐牌唔同，女友大叫，平咗嘅😯 再望望⋯⋯噫⋯⋯’canteen’ ! 原來係平少少嘅芽莊！同埋無咁多食物款㗎，仲無加一！ 菜都係得一種，我哋都叫咗，見到$48，又見到後面枱個碟剛到，都唔細碟，所以唔洗諗，叫！😁左睇又睇，我都係揀咗撈檬，係炭燒豬扒撈檬。而女友話好耐無食生牛肉河，就叫咗。我嘅撈檬到先⋯⋯個賣想麻麻，我自己唔係好鐘意塊豬扒唔係原整一塊出，好彩個味都ok，但咸咗少少兼唔覺係炭燒 feel 🤨 啲粉同撈檬粉個汁都正常好味😊生牛河到埋，賣相ok啦，女友就話一般好味，有啲淡⋯⋯跟住我試吓⋯⋯都唔係吖，都有啲牛肉味，幾正常喎😅至於個菜，都係正常，味道可以啦，$48就抵食嘅😁雖然食物未去到好好味，但都可以再黎嘅，但食飯時間又係限一個鐘，有點趕，最好諗定咗食咩先坐低就好好多😅