芽莊越式料理

營業中

休息中

本身苦惱地諗緊食咩好，見呢度嘅下午茶都好似幾啱食，就入咗嚟試下喇。呢個係午餐嘅小食，本身個汁都幾濃，加埋蝦米同花生嘅口感，普通嘅芥蘭都變得層次豐富，好易入口。呢個係餐飲，桃蜜熱柑桔。桃嘅味有啲假，同柑桔唔太夾。如果呢杯嘢飲係凍飲可能會好啲，因為可以令嘢飲更清新。呢個撈檬非常清爽，配埋酸酸甜甜嘅撈檬汁，簡直係最好嘅夏日午餐之一。扎肉好普通，唔係豬耳扎肉，亦唔夠肉汁。鷄翼好香脆，同牛油雞翼非常相似。呢度嘅牛丸粉係我食過最好嘅牛丸粉！湯底有好濃郁嘅牛肉味，好有越南牛肉粉嘅風味。牛丸係手打嘅，真係食到超濃嘅牛肉味同埋屬於牛肉嘅口感，仲有牛筋喺入面添！整體來講，呢度嘅環境同食物味道都好好，而且一定要試下呢度嘅牛丸同雞翼！其實呢度嘅下午茶可以有好多配搭，但係由於有啲小食係幾有特色嘅，建議大家可以選擇主食加小食嘅配搭。