燒肉 DON DON

營業中

休息中

燒肉DON DON，旺角一人燒肉店，簡潔裝修，燒肉套餐由$48起就食到，仲要食到牛肉同有100g肉🥩電子落單直接網上俾埋錢，方便，上餐都好快😌豬五花&牛五花套餐，配沙律、和風湯同日本珍珠米飯，幾豐富😇日式燒肉爐，好快熟，先試牛肉，好大塊，幾厚身，油份當然夠，燒香後配個燒肉汁，好味😋肉汁多，配埋珍珠米仲正👍🏻豬五花係薄片，可以燒到好脆，配韓式辣醬好惹味🤩有好多唔同既醬俾你慢慢試，蘿蔔蓉牛扒醬都幾特別🥓抵食既燒肉，一個人食都可以好舒服👨‍🍳

今日下午要到太子旺角工作，所以有得放早食飯 出旺角搵食，行咗去女人街，見到間一人日式燒肉，就入去試試。 話說孤獨等級有1至10級，自己一個打邊爐係第5級，我諗燒肉同打邊爐都差不多，呢啲應該一大班朋友先至高興嘅活動，自己一個我都係第一次試，但係又唔覺得尷尬喎。 呢度裝修灰色為主，工業風。個爐細細哋幾cute 。 可以手機落單，幾方便，仲有冷熱水自助，幾好。午市有套餐，3揀1，$50，無加一，都幾抵。我選咗牛肩肉拼豬五花套餐。前菜有菜絲沙律或者泡菜，我選擇左泡菜。 成個套餐除咗有牛肩肉，豬五花同前菜外，仲有一碗白飯同埋一碗湯，有啲紅蘿蔔同白蘿蔔，仲有啲牛腩條。 醬料都有幾多選擇，5款俾你揀，如果想食原味可以加岩鹽同黑胡椒就ok。肉方面，牛肩肉有4片，豬五花有6片，$50旺角區可以自助燒肉食個午餐，仲可以一次食2款肉可以過吓口癮，都算唔錯選擇。

一人餐廳愈來愈多，一人火鍋、拉麵、居酒屋(原來都係日本野)到一人燒肉店，燒肉DON DON，主打一人前燒肉套餐🥓簡潔時尚裝修，超值既燒肉套餐由$48起就食到，仲要$48食到牛肉😯電子落單唔出奇，直接網上俾埋錢連收銀埋單都慳返，極度方便👍🏻👍🏻👍🏻👍🏻👍🏻👍🏻👍🏻👍🏻👍🏻三部曲套餐，雞腿肉、豬頸肉、豬五花，有150g，配泡菜、和風湯同紫菜蛋飯，好豐富既賣相😍日式燒肉爐，好快熟，先試豬頸肉，幾厚身，油份當然夠，燒香後配個燒肉汁，好好味，肉汁爆發😗加埋必食既紫菜蛋飯，蛋汁加紫菜加肉就係幸福💓好正既享受豬五花係薄片，可以燒到香脆，加啲鹽醬同韓式辣醬，好惹味😆送飯一流，好正，雞腿肉，正常既，肉質都嫩，配蘿蔔蓉牛扒醬都幾特別，原來份量都好夠😌最後梗係要啤啤佢，先至真係食燒肉，爽😎其實大部分人都唔係一個人黎，正常既又抵食又好味，但一個人食都可以好舒服😘值得儲存起既餐廳😋