川熙樓 (已結業)

老公同我鍾意食辣 ，但是一般嘅川菜館都比較污糟擠迫，有同事介紹位置便利， 位於尖沙咀美麗華附近嘅呢一間川熙樓 話坐得舒寬敞舒適所以今日就即刻去試。雖然我哋兩個人，但 侍應生 安排四人枱畀我哋，無論係枱或者櫈都非常大， 而且抽風系統整得好好，食完都唔會一大陣油煙味。供應嘅茶水係我最鍾意嘅玄米茶，涼菜方面我哋點 川椒雞。 因為之前有睇食評推介，川椒雞唔係個個地方都有，味道唔會太辣，雞肉爽口，作為頭盤，打開味蕾最好不過。主菜叫見咗辣子雞丁，水煮牛肉。辣子雞丁，一見到面層都咁多辣椒， 口水都流埋。 雞肉本身帶鹹香，再加上辣椒乾嘅味道， 佐酒一流。水煮牛肉, 叫咗個例牌但份量十足, 面有芽菜,瓜,底有紅薯粉而且係扁身嗰隻,最為入味。 牛肉都 頗 多。蔬菜方面，我哋本身想揀四季豆，但餐牌上見唔到，於是選擇了泡椒娃娃菜。娃娃菜 煮得剛剛好， 鮮嫩美味， 而且有啖湯飲， 有酸辣味。埋單六百四十蚊， 雖然有啲小貴，但係食物質素好，而且食完唔會一陣油煙味，坐得舒服最緊要。

最近愛上左食川菜，今晚趁住約左無辣不歡既朋友食飯，當然搵返間坐得舒服而又有好野食既川菜館啦。位於君怡酒店既川熙樓，晚飯時間有得揀任食邊爐同埋小菜，鍾意食各式各樣川菜既我地，當然揀小菜啦。餐廳地方不但闊落而且舒適，佈置仲好有格調，帶俾人中國古色古香既感覺。水煮魚水煮魚有大同埋例牌兩個份量，我地人數唔多，只係叫左個例牌。上菜時散發出陣陣麻香味，雖然面層佈滿辣椒同紅油，但係入口無想像中咁辣，魚塊唔單止無骨，而且鮮嫩軟滑，而且相當入味。除此之外，鍋裡面仲有各式各樣既配菜，好似青瓜，雲耳，芽菜，薯粉等等。薯粉既彈牙又滑溜，吸收晒湯底既味道後，入口又麻又辣，感覺非常過癮。辣子雞丁碟上佈滿辣椒，雞丁炸得香脆，味道辣之餘亦非常麻，一粒一粒食食到停唔到口，不過味道有點濃，適宜拌飯食，亦都係拌酒佳品。重慶酸辣粉湯底呈紅色，酸辣粉用左薯粉，口感煙韌彈牙，加埋肉碎同花生，入口又酸又麻，吸收左湯嘅味道後非常好味，香味十足，簡單既配料反而令酸辣粉更有層次感。呢度既食物相當有水準，環境亦都好舒適，適合一大班人黎食，咁就可以叫多D唔同既食物啦。

2月初有一晚，約咗好幾位全女打朋友去食四川菜～女仔多，去環境幾安靜的川熙樓比較適合。川熙樓好似剛搬去新址不久，又可能因為入咗酒店，招牌唔太顯眼，全場只得兩三檯客。因為有朋友唔食得辣，但又想試試新派川菜，結果點菜就有辣有唔辣。水煮魚用鯇魚，無桂花咁好，但配菜好味搭夠。辣子雞丁味道唔錯又有勁道，但雞丁真係丁方得…好丁囉。其他菜色水準都唔錯，最正係個羊肉鍋，雖然唔辣但超好羊味，真係要連湯都飲埋。豆苗用豆胚，無渣最好～甜皮鴨第一次試，又真係唔辣。晾衣白肉賣相好，汁醬正～辣椒鱈魚嘅鱈魚做到外脆內juicy，樣樣都好好味，係個牛肋肉炆米嘅牛肉比較靱…相當滿意同值得推薦的四川菜。

今日朋友話可以早收工過黎同我食晚飯，難得有個食得辣的朋友available ，即刻上黎OPENRICE 望下尖沙咀有咩辣野好食先。 川熙樓係食川菜的，之前聽人講都話呢間餐廳幾好味，聽左幾年，終於可以試下了。 店內裝修陳設都幾「骨子」，坐得舒服又唔迫，係傾計食飯的好地方。 一坐低，即刻沖壺茶比我地飲，餐前小食有麻辣花生同埋酸辣藕尖，花生辣辣地好醒胃，一食就停唔到口。藕尖咬落質感好爽口，口感似食西芹，但無西芹的草青味，酸酸地唔覺辣，反而好似一啲解辣的食物，中和左其他食物麻辣的味道。 木耳下面有啲青瓜絲舖底，吸收左啲辣汁，撈埋木耳一齊食，調味剛剛好，又爽口又美味。 用左超大量辣椒黎煮，雞丁走過油，好香口，醃得入味，舊舊乾身又無骨，一個人食晒一碟我都無問題。 四季豆有個類似雀巢的伴碟，我同朋友都即刻拆爛佢撈埋啲四季豆一齊食。離遠都聞到孜然的香味，之前多數係用黎炒牛肉、羊肉，用黎煮四季豆都係第一次食，好惹味，用黎送飯一流。 今餐非常之滿足，兩個人食，每人都係$200 ，抵食又好食。