清真牛肉館 (龍崗道) (已結業)

清真牛肉館嘅牛肉餅由我細細個開始食，到大個左食嘅滋味都係一模一樣無變過！我哋當然有叫到牛肉餅，呢度嘅咖喱羊腩都好好食。牛肉餅上枱之後，記住記住要等耐少少先好擺入口咬，如果唔係就好容易燙到口。牛肉餅嘅酥皮聞落去充滿牛油香味，外表煎得焦香。咬落去外皮香脆，食到好多層酥皮。裏面餡料充滿牛肉汁，差唔多有一湯匙，認真誇張！牛肉餡加咗好多香蔥，兩樣材料加埋十分配合，好香口！另外，咖喱羊腩都推介，呢度嘅咖喱唔落椰漿，所以味道比較辣，咖喱汁用嚟送飯一流，羊腩煮得好淋，肥瘦適中，不過如果怕羊肉羶味嘅朋友都有其他肉類可以選擇，唔使擔心。最後我哋仲外賣左雞絲粉皮同牛肉餅。牛肉餅維持一貫嘅水準，不過要趁早食，如果唔係肉汁就會整軟個酥皮。雞絲粉皮唔係我鍾意食嘅味道，我平時鍾意芝麻花生醬，但呢度係用酸汁加麻醬，酸味太多，麻麻哋。下次一定會再叫必食嘅牛肉餅！

行開呢一頭, 順便喺呢區食埋飯啦; 不過話時話呢區選擇真係幾多, 各式其式應有盡有, 都有排揀, 唯有四圍行希望可以揀啱心水啦; 行行下忽然間甩見到呢間食店, 師傅見好耐冇黎, 於是決定黎食番餐!行到埋去都幾鬼多人等位, 等左成十分鐘, 終於有位喇! 入到去人出人海, 搭枱就梗加啦, 不過都幾擠迫! 坐底後即刻睇下有咩野食, 商量一陣最後柯打左呢度最出名嘅牛肉餅, 羊肉春卷同埋雞絲拉皮, 再加多罐汽水!兩分鐘後所以食物一次過到齊, 二話不說即刻食個牛肉餅先, 牛肉餅煎得好香, 皮脆肉鬆加上餡入面汁夠多, 熱辣辣勁好味; 羊肉春卷又係炸得好香脆, 不過餡裡嘅羊肉反而唔覺酥香, 但熱辣辣口感真係一流, 唔錯; 而雞絲拉皮份量唔少, 雞絲夠多幾鬆而拉皮就夠滑, 配埋青瓜絲都幾爽, 不過一樣野唔明就係點解個汁會有d酸酸地, 唔通加左少少醋, 不過師傅真係食唔到!總括黎講食物質素依然維持高水準, 環境真係擠迫, 服務都尚算滿意, 價錢經濟, 埋單八十八, 絕對抵食; 師傅覺得黎呢度食野會得出一個字, 就係"快", 坦白講呢間食店真係快過快餐店, 食都係食十幾分鐘, 你話係唔係快到痺呢? 不過排隊