明閣 (鷹君中心)

平時忙住湊細路, 黎到暑假尾聲,  朋友介紹明閣美人餐做緊限時優惠, 唔洗1千蚊就食到星級師傅手勢, 我地呢班媽媽緊係唔會錯過, 決定約埋靚媽食個美人餐補番下~上完前菜之後, 黎一碗紅燒蟹肉燕窩羹, 用料豐富, 燕窩滋補養顏, 最啱女士食用。之後既魚子醬雪地明蝦球, 魚子醬鋪滿蝦球表面, 蝦球又大又圓, 咬落去好爽好滑。接住係菜類, 麒麟雲腿翠肉瓜, 翠肉瓜好爽好脆, 配有雲南火腿調味, 味道剛好, 唔會覺得太咸。尾聲緊係要食個飯同甜品先覺得滿足。套餐入面有個窩絲滋補竹絲雞炒飯。小窩上,  保住熱辣辣, 竹絲雞可以延緩衰老, 炒飯又炒到粒粒分明, 呢個配搭, 又補又飽~最後甜品除左食左套餐入面既桃膠薑茶湯圓同棗皇糕之外, 我地另外仲叫左楊枝金露。最近日日30幾度, 冰凍開胃的楊枝金露就可以令身體降溫, 加上芒果夏天當造, 加入楊枝金露入面又唔會太漏而且好消暑, 為呢餐媽媽美人餐劃上美味既句號~ 

闊別半年嘅朋友聚會，有人提議去明閣，難得個個都話ok咁冇所謂啦，心諗都係撳定多啲錢穩陣。收工搭地鐵，嘩！原來去會展站超快，之前勁怕轉車同行嗰條奪命天橋，以後唔使怕。B出口一轉就係鷹君中心，地點贏晒，聽講本身响嗰度泊車都有lift直達，而家連搭車都咁方便～一入去waiter已經好好招呼，帶咗我埋去朋友張枱，好有貴賓feel。一坐低幾個女人仔已經決定好食而家做緊special嘅東方美人餐，望一望餐牌，超抵食喎。8道菜又花膠又龍躉又燕窩加埋一都係9百？？？高級食府喎，好親民♥️♥️♥️～餐廳成個環境都好舒服，而且枱同枱隔得相當遠，空間十足，唔會話邊枱嘈到邊枱。菜式一度接一度由waiter送上，我地多嘢傾又食得慢，唔使怕啲嘢放晒响度攤凍晒。講番食物，質素的確對得住個品牌，好好食。唔好睇每樣好似得少少，食到第6道已經飽飽地。其實咁樣好好，款式多，份量拿捏得啱啱好，又唔會嘥嘢，好啱女仔。其中最最最中意係脆皮花膠同個蟹肉羹，估唔到花膠都可以咁整，一咬落去脆皮香口然後就食到花膠嘅黏口，好特別。個蟹肉羹冇得輸，啖啖都係燕窩同新鮮蟹肉，好滿足成餐飯坐足3小時傾足3小時，朋友仔果然冇介紹錯，即場約實下次飲茶試埋點

套餐有8道菜，份量剛剛好，每道菜都做得好細緻。上次食過一次覺得好好味，所以今晚同家人一齊來再食多次。Quality好好，性價比好高，可以一次過試到咁多道菜，好滿足！服務員係一道一道菜咁上，可以每一道慢慢品嚐。蟹肉燕窩羹好多蟹肉，湯底味道好好。蒸蛋同蝦蒸得剛剛好非常滑。花膠炸得好香好脆但係唔油膩，火候剛剛好！蒸龍躉好滑加埋粉絲好好味。炒飯好多料，雞肉彈牙又多雞蛋，正吖！最後既甜品為晚餐劃上完滿既句號，湯丸夠薑味但係唔太辣，紅棗糕真係好香紅棗味但係唔會太甜，回味無窮