一幻拉麵 (已結業)

咁啱係灣仔開完會， 經過想試好耐嘅一幻，就叫埋係附近返工嘅男友一齊食啦。 平日中午12點半左右到達，唔駛等位直接入得。我呢啲重口味鬼本身想揀濃厚豚骨湯底，但男友話之前試過揀濃厚會搞到個湯完全無蝦味。咁唯有揀返適量鹽味粗麵啦。落order之後等咗大約15分鐘就有得食啦，上台賣相唔錯，熱辣辣嘅蒸氣浮起 碗上，啱晒而家入秋嘅天氣。一幻主打蝦湯，我覺得算係係日式拉麵來講幾特別嘅湯底，而且湯味濃郁。老實講，我本人對蝦味並唔係特別鍾情，但係都食到lamlam脷。至於拉麵質地就正正常常啦，不過經過反覆試驗，我發現自己都係鍾情於幼麵多啲，下次再有機會，可能會試下佢個幼麵先。不過呢個湯底的確唔係屬於清淡系列，所以就唔係人人都鍾意食啦。總括黎講，係唔駛排隊嘅情況下，一幻拉麵都係值得一試嘅。

最近天氣熱到好似火爐咁，本來想食船街某西餐，路過呢間人氣過江龍驚見只有幾個人排，即時變陣。 平日中午12點半左右，前面大約有6個人，可能拉麵上得快食得快，十分鐘內就入得喇。排隊個時已經獲發點餐紙，同其他拉麵店一樣，可以自行選擇湯底濃淡同麵條粗幼，但就未見麵條軟硬既選項。 一心黎試馳名以蝦頭熬製而成既蝦湯，原來除左原味之外，仲可以揀以蝦湯為基礎既適量或濃厚豚骨湯，口味可再分為味噌、鹽味或醬油。 唔好諗咁多，一於揀哂有手指公既招牌組合。鹽味蝦湯粗麵 ($88)海鮮獨有既幽香撲鼻而來，濃厚蝦香隨即盈滿口腔。 飽含蝦頭精華、淋上蝦油既湯底自然甘香醇厚，難得既係不帶半分腥、濃而不膩，每啖連湯飲都頂得住。粗麵掛湯力一般，勝在煙韌彈牙，唔覺有梘水味。 貌似蟹籽既脆粒其實係天婦羅碎，同白烚既叉燒一樣咸咸地冇特別。 最欣賞湯底燒得滾燙，加上保溫既蝦油，令鮮味特別突出。可惜配料味道唔算鮮明，湯底濃郁、麵量又多，食到尾確實比較單調，嘗試加入台面既黑椒同蒜泥都冇乜大驚喜。 原味鹽味呢個最「清淡」既組合都尚且如此，難怪聽聞味噌同醬油味咸到痴線、劣評如潮。鹽味適量豚骨湯粗麵 ($88)適量豚骨湯以豬骨鮮味為主，朋