Yardbird

營業中

休息中

95 食評

味道

環境

服務

衛生

抵食

27729

上環

$401-800

日本菜

Liver

3 已推介

$45

kiara_ttwing

等級2

𝙔𝙖𝙧𝙙𝙗𝙞𝙧𝙙 | 𝙔𝙖𝙠𝙞𝙩𝙤𝙧𝙞 焼き鳥一直都超中意食Yakitori🐥每次去日本都會最少食一餐依兩年係香港都不停發掘陸續會同大家分享香港的焼き鳥揀左5款串串分享下🐓🍢➿Breast $45最高質👍🏿超有肉感甜甜的➿Meatball $48每次必點item正常發揮好味的（掛住食唔記得左影相🤣）.➿Tail $45鹽燒好有炭香味香脆得尼又油脂豐盈➿Wings $45偏乾偏細隻一般啦!➿Sweet Corn Tempura $110鹹鹹甜甜的好味😋

𝙔𝙖𝙧𝙙𝙗𝙞𝙧𝙙 | 𝙔𝙖𝙠𝙞𝙩𝙤𝙧𝙞 焼き鳥

一直都超中意食Yakitori🐥
每次去日本都會最少食一餐
依兩年係香港都不停發掘
陸續會同大家分享香港的焼き鳥

38 瀏覽

0 讚好

0 留言

揀左5款串串分享下🐓🍢

➿Breast $45
最高質👍🏿
超有肉感甜甜的

➿Meatball $48
每次必點item
正常發揮好味的
（掛住食唔記得左影相🤣）
.
➿Tail $45
鹽燒好有炭香味
香脆得尼又油脂豐盈

➿Wings $45
偏乾偏細隻
一般啦!

➿Sweet Corn Tempura $110
鹹鹹甜甜的
好味😋

(以上食評乃用戶個人意見 , 並不代表OpenRice之觀點。)

分享
推介

已推介
檢舉

張貼

評分

味道

環境

服務

衛生

抵食

用餐途徑

堂食

人均消費

$400 (晚餐)

推介美食

Alyvia

等級1

話說小妹第一次來呢間店食飯，果招牌隱蔽左小小，同埋室內音樂大聲左小小咁姐～

BTW，都係講返d野食先～小妹推薦以下三款：1. Knee 2. Meatball 3. KFC

首先，「Knee」係雞膝蓋軟骨，唔係平時食開嗰隻軟骨，係成嗰菠蘿蓋俾埋你食嗰隻。小妹食落口，覺得不得了！d雞肉充滿碳燒味、肉質又嫩滑，又juicy，d汁仲會順住支竹籤流到小妹d手指到。極度推薦大家品嚐！

之後就係Meatball。成舊肉一開始醃嘅味道剛好，燒嘅過程中所搽嘅醬油好正，所以食落去外皮夠香，兼且係舊肉裡面有d好幼細嘅好似脆骨嘅嘢係入面，令到食落去嘅口感唔錯，加上肉質唔粗糙，味道唔會話好淡/鹹；再配上生雞蛋醬油，簡直除左用「正」之外，唔知仲有咩可以形容到。

第三，就係用椰菜花扮炸雞嘅「KFC」。如果你係好鬼鍾意食韓國版炸雞嘅人可以食下。先講下嗰外皮，真係炸得好薄，所以並唔會令你覺得食左成啖粉；然後，個醬汁同我平時食開嘅韓國版炸雞酸酸甜甜嘅辣味醬汁係有8至9成相似！然後到個椰菜花，不單只唔乾，我仲見到有汁架！！最後，我一啖食曬，再次感受外脆內軟嘅滋味，再加埋嗰醬汁帶來嘅辣味同埋酸酸甜甜，真係好開胃，好適合做頭盤！

除左以上嗰幾樣之外，小妹都推薦食雞心，因為真係食落去好juicy，同埋好嫩滑。

咁當然「無對比無傷害」，都存在住d我覺得麻麻地嘅食物啦！1. Miso Breast 2. Ume Thigh

老實講，呢兩樣都加左d日本調味料，我都幾有期待，一來小妹都鍾意食味增同埋梅，二來我以為食物嘅口感會隨之更豐富，因此而抱有小小期待去食嘅～點知食落去都唔係嗰回事，無嗰兩種調味料嘅獨特味道，好平平無奇，對比起其他串燒，唉，真係遜色好多lor。

不過總括而言，呢間店嘅食物質素都算高嘅，無論係食材、調味定係燒各方面，都唔錯嘅～至於價錢，就係人頭400蚊到，但係就唔會食得超級飽。

(以上食評乃用戶個人意見 , 並不代表OpenRice之觀點。)

分享
推介

已推介
檢舉

張貼

評分

味道

環境

服務

衛生

抵食

用餐日期

2022-01-07

用餐途徑

堂食

人均消費

$400 (午餐)

推介美食

FeivouriteFood

等級4

197

疫情期間，大家都一定好渴望去地方，因為好想食到當地地道既美食，但其實細心搵，香港都可以食到好地道、甚至有機會超越其他國家傳統既味道，今次去既呢間日本串燒店，絕對唔會比日本本土既串燒店差，甚至青出於藍勝於藍。

呢間Yardbird，2011年係上環必列者士街開業，之後一炮而紅，係2018年搬到去永樂街，由一間只容納到15人既小餐館，變成可以容納到接近100人既餐廳，餐廳環境比以前大好多，而且將酒吧同餐廳結合，不過位置同前後左右幾十間海味鋪相比，係間格格不入既居酒屋，而且係一間專食雞串燒既居酒屋，日本叫燒鳥(Yakitori)，源自日本飲食文化，每一串雞背後都蘊藏無數技藝。大家平時食串燒食開既牛、豬、魚、海鮮咩都無，但一間專攻雞、定位刁鑽既餐廳，反而由小餐廳變成聞名國名既串燒店，2014年係亞洲50最佳餐廳中排名45位，2021年更加得到米芝蓮一星既肯定，靠主打既新奇Fusion日式雞肉料理打出名堂，甚至喺美國洛杉磯開分店，蜚聲國際，連外國旅客都專誠慕名而來，而藝人鄭欣宜都係呢度既熟客。

Yardbird特別在佢用新鮮三黃雞(羽毛黃、爪黃、喙黃)為食材，每日將70-80隻雞分割，以由頭食到尾為理念，除咗雞頭之外冇一個部位用唔到，用哂成隻雞製作成23款雞唔同部位既串燒，而且有好多唔同既刁鑽部位，係平時大家都好小食到既部位，好似雞甲狀線，雞甲狀腺係雞頸附近，一隻雞可能得兩粒，一串雞甲狀腺要用十隻雞先可以製作到，所以係極度罕有，其他餐廳都好難食到。呢度嘅三黃雞都係由合和雞鴨供應，合和雞鴨係一間上環有大半世幾歷史嘅隱世雞檔，每日供應新鮮嘅雞比附近嘅餐廳，隨左yardbird，同為米芝蓮一星嘅belon、louise都係問佢哋攞貨。Yardbird嘅老細兼大廚Matt曾係前紐約壽司名店 Masa 同香港著名餐廳 Zuma 工作，都去過超過30個國家煮串燒，佢覺得香港雞係最好嘅雞種，因為可以控制佢嘅新鮮度，比起餐廳30公里以外、要用兩日時間空運過嚟嘅冷凍雞肉，新鮮嘅雞肉先可以做到好嘅串燒。外國雞全部都係白雪雪，就算點焗都係咁白雪雪，要加色上去，但香港三黃雞皮下脂肪夠厚，焗出嚟雞既顏色全部都好好，好似食譜書上面啲雞咁。喺其他地方好難搵到似香港雞呢種咁好嘅雞種，所以yardbird堅持用依間上環雞檔供應嘅本地三黃雞，作為佢哋燒鳥嘅主要食材，對雞嘅重量有要求，因為要計算切出嚟嘅成數，喺餐廳開業半年之前已經不斷嘗試最適合嘅雞重量，從而製作出最完美嘅雞串燒。

而呢間串燒店另一個賣點，係用備長炭黎燒，串燒都係鋪滿備長炭同日本木炭既6英尺長烤架上燒，本身備長炭最高溫度可以去到800度，火力非常平均，燒到嘢食金黃色，而且好多肉汁，亦都會有炭燒嘅香味，同其他用電爐燒係完全唔同，咁繁雜同考究既方法，將平凡既雞弄得不平凡，但呢類型嘅牌照其實係非常罕有，好難申請到，餐廳要做好多功夫，要比食環署檢查好多次，再加上抽風系統做得好，先符合到條例可以申請到牌照，所以係呢度幾大既一個特色。

以前Yardbird係不設訂座只有walkin，呢家開放可以係官網上訂位。Yardbird本身都已經成日full booking，係羅到米芝蓮一星之後就更加full。如果想訂位可以上官網，去book到一星期內嘅位，每晚12點更新可以book新嘅一日既座位，時間分別有17:00、17:30、18:00、19:30、20:00，但基本上每晚12點開始嘅5分鐘後，18:00、19:30、20:00嘅位置都會全部full哂，因為係正常既放工時間。而人數只係book到最多四人，如果你係多個四個人，可以試吓同時分兩次book，再打電話比店員要求盡量安排到附近嘅座位，佢哋會好樂意安排。

212 瀏覽

1 讚好

0 留言

裝修佈置風格好現代，燈光好暗，係酒吧嗰一種暗，所以影相質素唔理想。座位方面有3款，可以立食、一般枱同吧枱，前邊係休閒酒吧區，會見到一排排梅酒成為餐廳整體內部裝修既一部分，而後面係正式雅座同卡位，餐廳總共可容納98個座位，空間感幾大，座位間隔闊落，唔會話聽到隔離枱嘅談話內容，室內設計師量身設計既枱櫈設計簡單、用料樸實，向復古工廠座位致敬，令新店既室內設計美學同舊址保持一脈相承，不過大小比較細小。中間會有個小角落，賣餐廳自家製嘅五味粉同T恤等等。裝修算係幾簡約，用餐位置唯一嘅焦點所在，就係個開放式廚房，一覽無遺，俾你望到入邊嘅熱鬧，但完全問唔到香味。入面唔算好寧靜，但又未到日式居酒屋個種熱鬧，我會話呢間餐廳似一間酒吧多過日式傳統居酒屋，格局都係似酒吧。呢度唔係日式個種師傅係食客面前燒，而係落單之後，燒好由店員羅過黎，加上店主不惜價錢投資既抽風系統，因為要經過濾之後先可以排出街，抽風系統幾好，所以完全唔會有炭燒味同油煙味。

睇過Menu，Menu全部都係英文，而且店員落單都係用英文，所以難怪吸引唔到日本人黎食。因為呢度有唔少係外國人食客，佢哋對雞內臟嘅接受程度，遠遠冇俾我哋由細食到大咁容易接受，所以對外國人來講，呢度咁多部位嘅雞串燒係幾新奇嘅食法。另外前菜部分有十幾款唔同既沙律，驚唔夠飽仲有飯、麵既主食，有魚、鴨，另外仲有炸物、湯、甜品供應，不過串燒方面就清一色都係得雞。

呢度特別之處係你可以單點想食乜就食乜，亦都可以黎個串燒omakase，講低你既budget，由師傅因應budget去預備份量，如果你係第一次嚟，店員會叫師傅準備一啲比較招牌、人氣嘅菜式。

入去到坐低之後，發覺其實食客都係外國人為主，其他都係本地人，反而搵唔到日本人，呢樣就更加證明呢間餐廳定位唔係日本傳統居酒屋，而係一間創新既酒吧，通俗咁講係一間鬼佬串燒店，食到非傳統既日式燒鳥。驚喜既地方係原來隔離枱個個係藝人鄭欣宜，以前已經係社交平台見過佢黎呢度食，睇黎識食既佢都係呢度既熟客。

210 瀏覽

1 讚好

0 留言

因為我係食8點，8點其實係最後一個timeslot，去到時其實係牆上一個好似機場航班資訊既餐單上，已經睇到部分串燒已經售罄，好似雞頸皮、雞皮、雞膝軟骨、雞心同雞甲狀線，大家就可以知道邊啲串燒係最人氣。上面都有提及雞甲狀腺係極度罕有，通常都係第一款售罄既串燒，如果想食到應該要係6點既timeslot先食到。

一坐低餐廳要先嗌嘢飲，之後先會比Menu你叫串燒或者其他嘢食。酒嘅種類非常之多，有日本威士忌、紅酒、白酒、日本清酒、燒酒、啤酒、highballs、cocktails、甚至係墨西哥式啤酒雞尾酒。
-
1️⃣ Inner Thigh 內雞腿肉 💰45（👅: 8.5/10）

係出面食串燒，只會有雞腿肉，但唔會分內、外，呢度既內雞腿肉都係人氣串燒，食8點既我好彩可以食到，因為賣單時見到佢已經售罄。
想像下人既內腿係邊，就可以諗到呢個內雞腿肉係有幾嫩，嫩滑程度應該係咁多串串燒最嫩，內雞腿肉烤到外面香口，內裡肉汁更加係令到反光，內雞腿肉用左鹽同黑椒調味，雖然佢無雞皮，佢帶有小小雞既皮下油脂，食起黎香到不得了。我覺得烤雞既火喉比牛、豬更加難控制，第一串雞串燒就先聲奪人，已經信心大增。
-
2️⃣ Wings 雞翼 💰45（👅: 8.0/10）

燒雞翼係香港人食串燒基本上必點既串燒，用黎測試一間串燒店既串燒技術質素去到邊，呢度既雞翼特別在會串左一舊檸檬，擺盤上幾特別，雞翼燒得非常好，咬落外脆內嫩，食落多肉汁，再加上一啲好似七味粉加鹽既調味粉，非常惹味。
雞翼入面既雞骨燒到好脆，一咬好似咬碎左咁，即使係咁，但雞肉食落都係好嫩，可見串燒技術非常了得。整體黎講，係一個好食既雞翼。略嫌雞翼既份量有啲細，一串得兩隻，唔太夠喉。
-
3️⃣ Wing Tip 雞翼尖 💰45（👅: 8.5/10）

相信見到呢個雞翼尖上枱會呆一呆，因為會同大家認知既雞翼尖唔同，呢度嘅雞翼尖同雞頸皮有七成似，呢個雞翼尖已經將骨拆哂，將剩低雞翼尖既雞皮串埋一齊。未食之前以為係好脆口既口感，點知雞翼尖食落去係煙韌，比雞頸皮更少脂肪，但有足夠嘅油脂，食落唔膩，亦都唔需要用柚子醋中和佢嘅香口程度，我覺得甚至比雞皮仲要好食，好似係雞皮既加強版咁。
-
4️⃣ Meatball 雞肉丸 💰48（👅: 9.0/10）

雞肉丸就係平時我去日式串燒店必點既一款串燒，即係免治雞肉棒，呢度叫雞肉丸。呢度既雞肉丸係雞搥混合雞背肌同洋蔥而製成，師傅應該係有將軟骨切碎撈入雞肉入邊，所以食落去唔會剩係得啖啖肉，而係咬落去彈中帶滑，多咗少少脆嘅質感，食落去唔會話好乾，非常juicy勁多肉汁，食完完全唔知師傅係點樣調配出黎。免治雞肉棒一般食法都會點蛋同醬油，呢度既蛋蛋味非常濃，質素非常好，蛋係比較稠身一啲，蛋黃唔係咁易整爆，食得出係日本蛋，再加上日式醬油，味道非常豐富同好食，成串雞肉丸食落係比較焦香、濃味，有啲人會覺得鹹咗少少，我自己覺得可接受，不過冇咁鹹可能蛋香更出，但佢已經係我香港食過最好食嘅免治雞肉串。
-
5️⃣ Liver 雞肝 💰45（👅: 8.5/10）

呢款汁燒雞肝，上面既係Yardbird特製既醬汁。基本上每一間燒鳥都有一個秘製醬汁，每間鋪頭既醬汁都唔同，係自己調製。而Yardbird既呢款醬汁由開業煮到呢家，所以醬汁既味道係越黎越多層次，食落去係越黎越特別，好似啲潮州餐廳既滷水汁咁，煮左一盤滷水汁，之後再煮一啲新既醬汁加落舊既，串燒好多時個靈魂就係個醬汁。Yardbird既醬汁食落係多層次，比較重口味一啲，有啲似日式醬油，又甜又鹹。雞肝燒到微焦，入口唔係好爽口個種，而係好滑好粉嫩，呈半熟香軟狀態，唔會有過熟既粉感，可見呢度處理內臟處理得非常好，一啲都唔醒，唔會有血腥味，醬汁混入山椒粉，可以大致蓋過內臟既味，留低既只有雞肝既口感，齒頰留香，鍾意食雞肝既朋友話係食過最好食既雞肝。
-
6️⃣ Tail 雞尾 💰45（👅: 9.5/10）

雞尾通俗既講法係雞屁股，好聽既講法就係七里香。呢度既雞尾絕對係令我大驚喜，雞尾外層咬落非常脆，而入面完全係雞屁股既脂肪，脂肪入口即融，完全係油脂感爆發，食落雞油味香，唔會話食到奇怪既味道，反而每一啖都係好香既雞油香，有油脂感但又可以做到外脆，從未食過咁好食既雞尾，無論係香港食過既其他日式串燒、港式串燒都無得比，港式串燒既七里香有時食落仲要有骨，呢個係完全無骨，係將雞既脂肪擺落口。所以呢個係咁多串雞串燒脂肪含量最高、其中一款最好食最有驚喜既串燒。
-
7️⃣ Gizzard 雞胗 💰45（👅: 8.5/10）

雞胗其實係雞嘅胃，係一個好似砂囊既胃袋，平時多數用嚟做滷味，但今次可以係串燒都食到。
雞胗加上炸蒜，食落香口到不得了，雞胗咬落係非常爽口有嚼勁，感覺好似食緊爽口既魷魚咁，食落唔會有腥味。唔知係第一次食咁驚喜，定係呢度將一樣平均既野食化腐朽為神奇。再一次感受到師傅既火候控制功力、精準調味同處理內臟既手法，無可挑剔。
-
8️⃣ Corn Tempura 粟米天婦羅 💰110（👅: 9.5/10）

呢款菜色係當晚最驚喜，都係我最鍾意食既一道，係一個炸天婦羅粟米波。呢道係餐廳既招牌，都係每枱客必點既菜色。
半個拳頭大小嘅粟米天婦羅，係用天婦羅粉包住粟米然後羅去炸，用小小鹽同胡椒做調味，做法非常有創意，而且好考技術。
外表非常香脆，但炸粉唔算厚，神奇在只用薄薄一層嘅脆漿將粟米可以組成一個波，但唔會一夾就散開變成一粒粒，由頭食到尾都係每粒粟米緊貼住。可以食到粒粒栗米，每粒栗米都好鮮甜，甜香非常突出，咬落爽口，雖然係一個波但食起黎唔會黏埋一齊，粟米入到口係粒粒分明，而且食到牛油既香味，成個食落惹味、大大啖，輕盈唔覺膩都唔會乾。
呢個粟米天婦羅份量都幾大粒，一個人一粒其實已經好夠，再食多粒可以會覺膩。
-
9️⃣ Katsu Sando 💰100（👅: 9.0/10）

呢個Katsu Sando，係一款特別菜式，餐單上係冇，要喺牆上嘅另一塊機場航班資訊餐單先搵到，唔知係唔係期間限定菜式。Katsu Sando其實係好似一個鐵板燒和牛三文治，只不過由和牛變成吉列雞肉餅，一串得兩件，如果四個人就叫兩串。
雞肉餅個口質同之前個雞肉丸好似，都係混入左洋蔥，但呢個咬落更加實在，外層香脆，外表睇落好乾，但咬落去肉汁會咇出嚟。佢冇豬扒肌肉咁厚實，而係加咗菜粒嘅雞肉碎扒，鬆脆得來又惹味。日式燒汁係佢嘅主調，食落甜甜辣辣，都有沙律醬中和一下減低一下佢嘅鹹香，估唔到三文治配搭燒汁雞肉係咁好食，以為三文治食落會好乾，但有雞既肉汁，令佢非常入味，三文治食落輕盈脆身，一啖接一啖。
-
🔟 Clams Yakisoba 💰230（👅: 9.5/10）

呢個其實係一個蜆肉意粉，意粉係用日式炒麵嘅蛋麵，但用好似意大利麵嘅做法，吸汁能力非常強，所以每一啖都係好重嘅蒜香牛油味，再加上蜆肉濃厚嘅海鮮味，非常入味。
而蜆份量驚人，第一次見蜆仲多過意粉，意粉就黎比海量既蜆淹沒，蜆係用大大隻嘅日本蜆，蜆肉非常飽滿大隻，食落爽口彈牙，肉夠肥美多汁，成碟整體味道比較重啲，估唔到一間串燒店，佢個意粉可以咁好食，係當晚其中一樣好有驚喜嘅菜式。
-
1️⃣1️⃣ Soba Tea/PB & J Ice Cream Sandwich 蕎麥茶/烤粟米雪糕三文治 💰80（👅: 9.0/10）
最後既甜品叫左雪糕三文治，味道有兩款，一款係海鹽爆谷烤栗米，另一款係蕎麥茶。雪糕三文治口味會每個月轉一次，所以唔一定係呢兩款口味，例如有黑芝麻口味。
雪糕三文治份量比相像中小，每一個三文治會分開4件，基本上一口一件。
烤粟米雪糕三文治周邊擦左花生醬，食落鹹左啲。
蕎麥茶雪糕三文治入面除左係蕎麥茶雪糕之外，有朱古力碎包住，蕎麥茶茶味清幽，不過茶味可以更出，兩層威化餅咬落香脆，有蕎麥茶脆脆點啜，增添口感，朱古力薄脆同蕎麥茶既味道不謀而合，平衡得宜，食落係偏甜，雖然價錢上進取左啲，不過係一個有小驚喜既雪糕三文治。
-
🍺 Suntory Pilsner Draught 💰58（👅: 7.5/10）
食日本串燒既絕配，多數都係啤酒或者highball，揀左最正常、係日本常見既Suntory生啤。飲落夠凍，夠新鮮清爽，啤酒唔算多。
-
🍸 Yaki Lime 💰95（👅: 7.0/10）
黎到見到有咁多cocktail，諗住一反常態，唔叫平時食串燒既絕配啤酒，比次機會呢度既cocktail，原本想叫有日本地方名既okinawa express但可惜售罄，所以叫呢個Yaki Lime。
Yaki Lime係用烤過既青檸加上冧酒同薄荷製成Mojito，飲落我覺得草青味稍為強左啲，所以唔係咁啱我嘅口味，下次都係唔亂咁嗌cocktail，乖乖飲返一定無伏既生啤。
-
🌟 食物方面黎講，呢度既串燒食落唔似係日本居酒屋食到既串燒味道，反而係比較獨創既特色，加入左一啲Fusion煮法，可能因為本身大廚係外國人，想法都比較新式一啲，所以我會話佢係非傳統既日式燒鳥，但今次證明左外國人都可以煮到不一樣既日本菜色。味道上黎講無咩可挑剔既地方，因為呢度用炭燒取代一般嘅電爐，炭燒做到皮脆而肉唔乾，香口當然不在話下，用備長炭燒唔會燻黑嘢食，所以今晚食既串燒都冇失水準，串串靚仔，色澤金黃，肉汁都鎖到實，醬汁都唔會過鹹蓋過雞本身嘅味道。另外雞既來貨都好重要，有好既雞，無好既師傅，唔得；有好既師傅，無好既雞，更加唔得，好既食材同好既師傅係相得益彰，呢度可以將好似綠葉既本土三黃雞，變成好似牡丹既高質燒鳥。

要挑剔既就係價錢偏貴唔夠平民，當晚大概食左三千蚊到，7個人人均大概300蚊，除左一個人比較大食唔夠飽之外，基本上其他人都食夠飽。串燒每串定價40-50，係香港黎講係偏貴，但我有喺香港食過其他日式居酒屋，人均三百幾，但食囉反而冇呢度咁飽肚，而且冇依度質素咁好。我會覺得依度係一分錢一分貨，如果想追求極致又創新嘅雞串燒味道，香港我會諗到呢間同中環既birdie，而今餐可以話體驗到本地三黃雞喺精心炮製下嘅串燒。

環境方面，呢度唔係平時大家食到好地踎既港式燒串，唔會係街邊、用摺枱、坐紅色膠櫈，一埋位就落兩串燒翠玉瓜、燒茄子既港式風味，都唔係日式居酒屋咁環境非常嘈吵熱鬧，邊食串燒邊飲highball暢談嘅氣氛，而係一間結合左歐美特色嘅居酒屋、食到日本串燒嘅酒吧。而且呢度既抽風系統令到入面唔會有炭燒味同油煙味，呢個係一個好好嘅優點，同時都係一個可惜之處，因為聞唔到香味，少咗好香、好想不停食嘅衝動，少咗呢種風味。

服務方面，串燒燒到有水準需要嘅係耐性，所以第一轉串燒會燒得比較慢，落單後大概等咗13分鐘就有粟米天婦羅同雞翼，之後差唔多每2至3分鐘就會上另一串串燒，上菜速度算正常可接受。而如果大家係第一次嚟，唔知邊啲串燒係人氣或者招牌，不妨比個budget幫你執一個組合，基本上唔係特別太食嘅話，$400-500係可以食得飽，有啲食物如果係一份，店員會幫你砌到變半份，等你可以試多啲，又食到佢哋嘅拿手菜色。另外店員會留意每張枱嘅需要，係收碟換碟、換足籤筒都幾快手，唔會要客人等好耐，而且走嗰時仲會送自家製嘅特製調味料比客人，值得一讚。

如果你覺得食雞料理，比唔上食牛、食龍蝦咁貴價，或者你覺得串燒係下欄嘢，備長炭只係一個噱頭，雞只係代表住cheap，甚或新鮮雞同雪藏雞都分唔到嘅話，咁呢間燒鳥未必啱你，黎呢度就會係追求燒鳥既極致、分割雞既藝術同炭火既堅持。但環境偏暗，而且少咗令人覺得流口水嘅燒烤香味。

欣賞依度嘅野食，無疑係食過最好食嘅燒鳥，慶祝特別日子好值得黎，甚至係happy Friday嚟飲番杯。老細Matt想Yardbird成為香港既一份子，而唔係一間外國餐廳，因為佢係生於香港，套用返一個紐約時報記者對Yardbird既描述，有紐約時報記者形容過Yardbird係呢個美食林立既香港入面，仍然係一間受歡迎同有影響力既餐廳，Yardbird已經係一間成功既香港餐廳。
-
👅味道: 9/10
🍴環境: 7/10
💰消費: $400人均 (服務費:10%)

(以上食評乃用戶個人意見 , 並不代表OpenRice之觀點。)

分享
推介

已推介
檢舉

張貼

評分

味道

環境

服務

衛生

抵食

用餐日期

2021-04-29

用餐途徑

堂食

人均消費

$400 (晚餐)

推介美食

Yardbird 營業中 休息中

Yardbird

營業中

休息中