一豆花 (已搬遷) 新店位置

冰糖豆腐花好鐘意食豆腐花，經常都會食，第一次食一豆花，因無人排隊，黎深水埗甘多次，而家先留意到，阿姐雖然有點鄉音，但好有禮貌，佢既親切感令我食呢碗豆花變得有笑容，不過論食物豆花真係好滑，而且大碗，值得再食。

外賣左碗薑汁豆腐花，只係$9，豆腐花滑溜溜，唔洗加好多黃糖，已經好好味，因為佢個薑糖同個豆腐花好配，一d都唔spicy,但個薑味好出有甜甜地，好食！滿足我會再再次光臨！希望大家都多多支持本地小店，唔洗付出好多價錢，就食到好地道又有質素的食物！ 比起大型連鎖食肆統一的製法，味道就多了一個人情味

係地鐵口有一間專賣豆付花細細間但款式勁多平時糖水鋪食開$15一碗見佢咁平$10,試左一碗,原來好大碗一個人食唔晒紅豆煮得都算淋,又唔算太甜豆付都幾滑,基本上都不過不失

通常我見到有人排隊的地方都會走，最怕嗰種好多人又熱又焗嘅感覺，但去到呢到見到條隊好似行得好快甘，又只有10幾個人，就行過去睇下，原來係派免費豆花，有薑汁同原味兩種。所以就膽粗粗排下。初頭以為可以排到去揀原味或者薑汁其中一款，但排到嘅時候原來發現姐姐只會比一碗原味嘅豆腐花出嚟，糖水，糖，薑汁全部都係自己加，所以可以按照自己鍾意嘅味道而調製。豆腐花裝出來都係熱辣辣嘅，攞上手仲有少少辣手，咁我就加左少少薑汁，糖同糖水都加左一湯匙左右，食落去啲豆腐花好滑，有豆香味比想像中好好多，而且薑汁嘅味道都幾濃，又唔會辣，幾好。所以之後自己都買左兩碗打包番屋企同屋企人分享。講真有時呢d試食活動都幾好，有得試下味，真係正嘅自然有人會買。

烈日當空，經過見到好多人食豆腐花，即刻燃點左吃貨既我!!平時吃豆腐花就吃得多，食黑芝麻豆腐花都係第一次!!黑芝麻豆腐花聞落並唔香黑芝麻同豆味!!入口黑芝麻味濃，蓋過左小小豆味!!豆花頗滑，口感不錯!!

店名：一豆花地址 : 旺角洗衣街155-161A號百寶大廈地下F舖好味指數：7.8／10價錢：$10冰糖／薑汁豆花一連三日免費派豆腐花試食已經完左嚕。老細非常慷慨試食都大大碗，以為平野無好，點知原來係寶至真😁豆花超級夠熱不在話下，滑溜程度可媲美大埔名物呀婆豆花，加上冰糖 、黃糖 、薑汁任落唔嬲，好正呀😱 

經過發現有豆腐花食 朋友仔幾鐘意食豆花 我地又見有個細路係店外食緊 就入左去食啦!佢有唔少選擇,由豆腐花、黑白、紅白 呢d常見既, 到銀杏(?)都有我叫左黑白, 一睇原來係公雞碗來的, 傳統中式糖水配公雞碗, 正!炎炎夏日食碗冰涼冰涼既芝麻糊豆腐花真一流豆花夠豆味,而芝麻糊亦相當杰身, 好好味=]唔夠甜仲可以自己加糖水/黃糖地上有些水積要小心; 枱面有少少痴立立店面阿姨好熱心, 一邊叫賣一邊快手手叫碗抹枱, 又叫我地小心地下有水環境一般 無設計可言, 無椅子, 但整體感覺好正- 溫暖和關心的感覺

路過見到熱騰騰的豆花，店外盡是站著手拿豆花的街坊，忍唔住要試試，看到鋪面內貼滿各色各樣的豆花，由傳統的豆花、薑汁豆花、芝麻豆花、杏仁糊豆花，到新產品薏仁白果豆花都有。我決意一試熱的薏仁白果豆花，相信是即撞豆花熱辣辣沒有出水，雪白的豆花上鋪上滿滿的薏仁和白果，薏仁白果糖度適中配合白滑的豆花，滑嘟嘟的豆花加上啖啖有薏仁香，食後好開心，就像汽車入滿油一樣。

在紅點吃過午餐後，就在深水埗閒逛一會。來到桂林街近汝州街，發現了一間專賣豆花豆腐的店舖－阿一豆花，心想吃一碗豆花也不會太過吧。其實阿一豆花是一間很簡單的店子，沒有裝修只有白磁磚，牆上掛滿了各式各樣的豆花照片，而近天花板一處卻擺放了各款大小樽的腐乳，店舖內部相信是出品豆花豆腐的地方。除了原味豆花外，在下嚐了一碗凍薑汁豆花，薑汁味香濃，但是豆腐花不是太滑溜，沒有即時淜落喉嚨的感覺，但是卻又有豆香的感覺。加上黃糖，便是一碗甜品。在甜品店吃一碗豆腐花，可要花上數十大洋，但是這裡卻只需幾塊大洋，已經不錯了。

本來吃過新香園就應該要起行，但瞥見對面有家豆花店，心想我雖然之後還要吃飯，但吃多碗豆腐花應該不會太飽吧。店面幾乎是沒有裝修可言，就只有一「條」供人「立食」的長檯。牆上有菜單，豆花的款式還蠻多的，有冰糖、薑汁、薏米白果、黑白、綠白、紅白豆花等。不用多想，就要一碗原味的豆花，還要問清是沒有預先加糖才行。 阿姐隨即從店面的大桶裡「片」出一片片豆腐花來。就這樣吃的確沒有什麼味道，豆味也實在味不濃，喜歡的話，除了黃糖之外，檯上還備有薑糖漿和冰糖漿可以加。冰糖漿比起黃糖清甜，薑糖有輕微的薑香又不太甜，七元一碗豆花，最緊要是夠抵食。

是日從「檸茶」的其中一個飯堂新香園走到另一飯堂合益泰途中, 發現這家豆花店。以前或許曾經略門而過, 但是日卻被店子門前的人龍所吸引, 於是便買了一碗豆花來試試。豆花選擇非常多, 包括薑汁豆花、黑芝麻豆花、薏米白果豆花、綠豆沙豆花、紅豆沙豆花等, 首次光顧, 則點選了一碗原味熱豆花, 七元的價錢換來一碗比一般較大的版本, 而且賣相工整, 每片看來頗大; 味道方面, 質感順滑, 豆味頗濃, 加少許黃糖, 能提升味道, 整體來說是碗合格有餘的豆花。看來以後「檸茶」於這區又多一站了！

沿著桂林街，向著荔枝角道方向行走，在汝州街交界，發現一間像新開不久的豆腐花店，阿一。＄6一碗豆腐花，當然便宜，這裡是深水埗嘛，不遠處的北河燒臘飯店，較早前被傳媒報導，老闆與社協合作，以價錢低廉的飯盒，惠及區內的低下階層。所以，仗義多屬屠狗輩，之所以怒火街頭，為何會在深水埗取景，明白未？說回＄6的豆腐花，一如以往的口味，來碗凍，豆香很濃，亦夠滑，但未去到滑得直落喉嚨的級別。澳門的李康記，實在太屈機。豆漿＄5一杯，豆香反而不及豆腐花呢。一共＄11，拿張＄20，還有＄9找回，過隔離買串小食，深水埗，著實有其可愛的一面。