卷之屋

營業中

休息中

應該起碼五年啦，次次來葵芳廣場，就算幾飽都必食呢間店！睇住佢由二樓搬上3樓，但係質素仍然無變，價錢只係加多少少，而我仍然都係咁鍾意😍 因爲佢真係好好好味，而且覺得佢越嚟越好味🥰 第一個必點就係火炙芝士三文魚手卷，手卷嘅壽司飯嘅調味唔會過酸或者太甜。飯同三文魚嘅份量剛剛好，三文魚大塊塊，永遠都大到睇唔到啲飯，非常之抵食～芝士汁唔係平時食到嘅味，侒有特別調味，冇咗芝士嘅膩，好啱配三文魚，不過味道比較咸，有時會叫師傅落小啲😆第二個必點係佢朋友，火炙芝士三文魚反卷，只係將手卷嘅配料變成反卷，方便啲食，不過我自己覺得飯比較硬同埋紫菜冇咁好食，所以我會揀手卷😏

喺葵芳商場求其搵咗一間比較隱蔽嘅壽司店試一試😋 食完覺得真係冇揀錯！非常正👍由於個人比較鍾意炙燒嘅系列同食熟嘅壽司 所以分別叫咗 火炙芝士左口魚裙邊手卷$20 , 火炙芝士三文魚反卷$25 , 火炙芝士吉列炸蝦反卷$25三款嘅火炙芝士都好濃郁！燒過嘅芝士配上壽司真係好正👍 手卷份量好足夠 左口與裙邊都有一半生 但肉質真係好新鮮 😋而反卷既三文魚都燒得幾熟 炸蝦都幾脆😋個人好滿意三文魚同左口魚裙邊👍👍值得推介！叫咗三款火炙芝士 雖然有啲好溜嘅感覺 但真係好好食！ 而且價錢比出面都幾抵 會再幫襯👍

星期六係超多人，逼到個個企埋一邊食但都無損我要食到佢既決心....我叫左呢款火炙芝士三文魚手卷其實反卷都好味，但手卷有塊大既三文魚加出面有啲半融既芝士少少沙律醬，落啲wasabi豉油係好正平時個啲手卷刺身係唔會大塊到，食到落底都有但呢隻可以食到落底都仲有三文魚難怪咁多年 呢間舖都仲生存緊~Ps: 影到超大舊......推介: /5

今日黎到葵涌廣場行街, 緊係順便食埋野啦, 網上SEARCH葵涌廣場既日本手卷/卷物店, 最多人推介係卷之屋, 所以就去試試喇軟殻蟹手卷軟殻蟹好大隻, 唔會係得個樣包到出黎就算, 真係啖啖都食到軟殻蟹加飯, 而且軟殻蟹食得出唔會係炸定係到, 炸得好好, 外脆內軟, 唔油, 正火炙芝士鰻魚反卷即叫即燒, 仲係暖暖地, 芝士味好香, 不過我就覺得上面D醬太多, 所以會有D鹹, 但整體黎講都唔錯既最後要讚一讚當日既 staff, 當我地食完既時候, 佢地好主動伸手示意我地將D垃圾比佢地, 而且佢地全程由我地到店揀食乜至到食完走, 佢地都好好笑容! Nice 🤣

平時黎葵廣都一定會食手卷！呢日行過3樓埋邊呢間手卷店，見到佢d火炙芝士反卷系列好似好吸引，就叫左個火炙芝士三文魚反卷試下。壽司上面既芝士係即叫即燒，所以d芝士食既時候係熱既！芝士份量仲要幾多下！芝士入口即融，同三文魚好夾！不過一般人可能會覺得d芝士鹹咗少少🤣但整體上個反卷真係好好味！

晴寶繼續孖住晴媽勇闖葵涌廣場覓食！第二站：卷之屋🍣🍣剛剛品嚐完晴寶至愛的芝士小食後，當然要陪晴媽食她至愛的日式卷物！今次幫襯的是人氣爆燈的卷物天堂 - 「卷之屋」。小食選舉種類繁多，有選擇困難症的晴媽千挑萬選終於選了火炙鰻魚芝士反卷🐟🧀🍣!反卷即叫即製，感覺新鮮！反卷細心分切成4-5件，一啖一口方便食用，入口鰻魚芝士和飯比例剛好，而鰻魚和芝士味道很夾，不消幾分鐘已全部吃光，還想再encore，但想到還要留肚吃其他美食，決定忍口😆推薦給喜歡吃卷物的大家❤️🍣葵廣覓食之旅仍未完結，請大家繼續留意part 3 👋🏻👋🏻👋🏻謝謝大家收看，如喜歡本食評，請給個❤️支持晴寶😊！

間間手卷店都差不多質素同價錢,所以求其試下呢間。叫左倨蟹子帶子手卷帶子幾甜,但5多, 蟹子都多, 紫菜夠脆, 飯就無特別, 35蚊一般般LA。食到一半基本上無哂D 料, 再落多D料好D LAW

呢間應該係食過既手卷外賣鋪最好食果間最中意火灸既系列 火灸蝦反卷火灸芝士玉子 好香好甜既美奶滋味今次試甜蝦三文魚都夠足料 夠厚切食到去個底都仲有好可惜香港地方淺窄 買完都冇位企黎食要手拎住幾樣野都好狼狽買返去又冇咁好食

每次來到葵廣，都會很想「掃街」，試食不同店家。但是每次都敵不過想吃手卷的念頭，最終還是變成吃卷之屋裡的不同手卷或反卷。芝士炙燒系列很邪惡，在手卷上會佈滿厚厚的芝士及沙津醬再燒，令人食指大動～店家門前也有不少人在等候，有時會比較擠迫。但因為店家效率相當高，常常不到5分鐘就已經做好手卷。店內有山葵豉油及普通豉油提供，山葵豉油不用淋太多已經很辣。三文魚手卷非常足料，厚厚的一片讓人非常滿足。每一啖都是三文魚～不會吃到最後只剩壽司飯。三文魚的味道很新鮮，魚味很夠，油脂分佈也很平均。因為店家每次都是即點即做，所以紫菜脆脆的，不會軟身。壽司飯的酸味恰到好處，吃完會想再點一客幸好店內的手卷價錢合理，不然銀包會瘦得很快

每次去葵芳都好想試新舖頭🤪不過基本上每次都忍唔住走上三樓呢間手卷店🤤呢到嘅芝士反卷係最好食咖😆今次我就嗌咗火炙芝士左口魚裙邊手卷 ($22)好多芝士係上面，加上燒完嘅左口魚夠晒魚油香😙雖然今次份量小咗啲😢不過22蚊真係幾抵食😎✌🏻

呢間可以話係成個葵廣開店賣手卷開最耐既一間，手卷價錢性價比相當高，十幾廿蚊一份今次叫左個火炙芝士三文魚反卷，$26，細細份，入面有6件個反卷除左沙律之外，仲會落埋千島醬再燒，所以味道層次好豐富，好香千島醬味，廿幾蚊食到咁既質素都唔錯

去葵廣掃街離唔開都係食手卷同小丸子 但其實3樓呢間小店既反卷都好正 用左芝士醬同原塊芝士燒甜甜地再配埋鰻魚好開胃🧀🐟 每次去葵廣都忍唔住衝去食D staff都勁好人會主動幫你收返個盤 等你唔洗拎住舊垃圾周圍走🙏🏻

呢間位於葵廣3樓Top世界入面既卷之屋 我已經食過好多次啦😆唔食魚生既我勁鍾意食呢到既鰻魚手卷、火灸芝士炸蝦飯卷、軟殼蟹手卷😆❤️無論隔幾耐再黎食都係咁好味😋而且師傅勁快手 即叫即整 1分鐘左右已經有得食🤣。鰻魚手卷 鰻魚厚肉 口感微彈牙🐟食落一啲都冇腥同冇骨😋👍🏻鰻魚汁夠香甜甜地又唔會太鹹紫菜keep住香脆 珍珠米軟熟 煙煙韌韌每次食到底都都仲食到鰻魚😆

聽說這間店的日本手卷/卷物是全葵涌廣場最好吃的壽司店，因此慕名而來。朋友點了火炙芝士吉列魚柳飯卷 ($24)，賣相還可以，但是飯的比例過多，令到口感不太好。另外我點了海膽甜蝦手卷 ($40)，海膽的份量挺多的，但是甜蝦的份量較少，吃的時候容易被海膽的味道蓋過。

每一次去葵芳廣場都一定會食卷之屋嘅反卷同埋手卷。試過佢好多唔同口味嘅手卷，但係最鍾意始終都係佢嘅芝士炙燒左口魚手卷。香港可以食左口魚嘅餐廳唔算好多，同埋通常都係細細舊，所以一啲都唔夠喉。但係呢度嘅左口魚永遠都係好大舊，又好多油份，夾埋啲芝士黎食真係超級香同好食。另外推介佢嘅芝士三文魚反卷。雖然係反卷，但係入邊嘅三文魚都幾唔算細舊。如果驚食手卷會食到好”呢啡”嘅話，就可以嗌佢嘅反卷，用筷子夾黎食啦。