合益泰小食

營業中

休息中

深水埗系平民美食好地方, 車仔麵, 魚蛋, 燒賣, 腸粉都有, 今日係食出名既腸粉,黎到舖都有幾個人要排隊, 側邊都有人在立食中, 因為外賣無即刻食放耐左會無咁好味. 腸粉分細、中、大碟，分別係$10/5條、$12/6條、$20/10條, $2條堅抵食, 腸粉無其他腸粉的'行' 粉味, 腸粉一層層有彈性而唔會太實, 加埋腸粉阿姐比例完美嘅混醬:芝麻醬, 豉油,甜醬組合, 簡直係世界級超級腸粉,  腸粉每一忽都要點到充滿醬汁, 平時我3, 4條都食唔哂, 今日5條腸粉就咁比我秒清, 諗定下次要買10條.....拎埋個餐盒黎裝. 溫馨提示系要有心理準備:如果立食,  舖頭側面有系巷仔仲有坑渠, 對面系公厠, 外面系鐵皮屋舖人來人往. 

小朋友停課，趁佢哋喺屋企網上上課，我同老公仔去樓下食個極速早餐🤣🤣🤣食最高人氣嘅合益泰小食埋嚟睇埋嚟揀款式眾多，價錢優惠，任君選擇🤣🤣🤣睇吓我嗌咗啲咩兩丁友，少少哋嗌住4樣嘢食先啦混帳腸粉係佢哋嘅王牌小食，我同老公仔都唔客氣嗌咗大份的。又大份又好食，超正，食到我同老公仔舔舔脷😋😋😋大大隻珍珠雞，都係$6雞咋由細到大我都非常喜歡吃珍珠雞，所以我覺得呢隻珍珠雞超好味 魚片粥又係我的至愛，大大碗，粥底又綿又滑，魚片又多又大塊。不過唯一的缺點就係，啲魚片好多魚骨🙈大大粒牛肉球，新鮮牛肉打制而成，咬落去，啖啖肉又Juicy，呢個都係必食推介，三粒大大粒嘅牛肉球，都係$12咋！極速早餐食到呢度，係時候返屋企湊馬騮仔了🐵

合益泰米芝蓮都拎埋其實真係長期排隊，但要食都唔係冇辦法，就係反其道而行唔好買外賣，就咁鏟入去堂食反而通常都唔使排，始終食包腸粉拮串魚蛋未必個個都話想就係坐喺度堂食。個個都知要嚟遞其實要食咩呢？要食一定係食個麻醬，咁食麻醬其實就係食咗腸粉呀。所以如果你，走麻醬，勸你不如唔好嚟。🙄因為個腸粉雖然爽口彈牙但係都係一般腸粉，但係麻醬呀，如果佢有得賣我真係想成支嚟買，自己食我仲會加晒勁多芝麻，又平又抵真係好過癮。😋另外我都會推介佢個豬皮，加埋蘿蔔，成兜呀其實都已經好飽肚，絕對係地踎之選。😎😎😎

深水埗名物，好耐之前食過一次今次難得黎到，當然要回味下四點黎到唔洗等直入坐低之後就越黎越多人黎到，好彩叫左腸粉（細）$10 +豬皮魚蛋（少辣）$19腸粉仍然算滑的，但感覺上就無以前咁好食難道蔴醬少了？還是真係變質呢？但細既份量都唔少，抵食豬皮魚蛋份量十足，依個價錢就有咁大碟估佢唔到辣汁好食，魚蛋大粒有少少彈，豬皮都爽既算係咁，但又未算得上好食總括黎講係抵食夾大件，但味道就普普通通以上食評只反映本人立場，如有雷同，實屬不幸

多年來經過合益泰小吃也過門不入，因香港的腸粉已没米味，只是吃加工廠制造的醬汁，今天經過見没有人排隊就一試合益泰盛名的腸粉。本人只點了腸粉，牛肉球和燒賣，當腸粉上枱一試後，一如過往般没有米味，因這腸粉是廠制，沒有米味也算是正常，卻不明白在此吃廠制腸粉要求口感滑，能有這說法就如只有布拉腸粉才有嫩滑口感，有此說法猶如入素食店吃安格斯牛扒。這類腸粉滑就必冇，但勝在醬汁有用心調制，麻醬有濃厚芝麻香味，而本人最愛吃的芝麻，竟是有以微火炒香芝麻。坊間只此一間如此作為。燒賣有肉味樓，不是街邊小食店燒賣只是吃粉團，至於牛肉球則絕對有驚喜，鬆軟肉球內有馬蹄肉粒，增加咬口層次，味道亦比很多連鎖酒樓高質數。所以吃後再點叫牛肉球和燒賣。本想叫粥同吃，但可惜此店沒有油炸鬼，本人覺得食粥冇炸麵，有如吃雞不吃皮，不如唔好食，所以最後我只點叫豆槳。若然下次再經小店，我也會再光顧，因為這能吃到童年時街頭食物的味道。

深水埗嘅飲食業近年發展蓬勃，百花齊放，幾年間就成為咗平民米芝蓮集中地。講到平民美食就不得不提豬腸粉、車仔麵、魚蛋、燒賣。以上美食都可以响合益泰搵到，作為平民小食店，佢唔係每樣都係咁出色。坦白講除咗腸粉外，其他水準好一般，所以今日集中講佢嘅腸粉 。堂食要排隊，每次要等幾耐吓。如果淨係食腸粉就最好立食，唔駛等。腸粉分大、中、細碟，分別係$10/5條、$12/6條、$16/8條（即$2/條），絕對街坊價。腸粉比坊間嘅幼啲，質感實淨有彈性，配以特製嘅香滑芝麻醬、豉油、甜醬、辣醬，每條腸粉沾上醬汁，入口滑嘟嘟，一口接一口。一碟大腸粉轉眼食完仲想食。講開醬汁，佢比坊間嘅稀，芝麻醬超香濃，放耐咗都唔會黏埋一嚿咁。如果外賣就最好自備食物盒，醬汁一滴不漏最後有個小提議：店舖對面係鴨寮街公廁，側面有坑渠，夏天嚟食都幾有「味道」，建議夏季入舖堂食，立食就最好秋冬季嚟會好啲。

山長水遠黎到深水埗，除左係為左去西九龍中心朝聖，仲係為左食下嘢！見呢間係米芝蓮推薦，價錢又咁平，就梗係要試下啦。排隊排左10分鐘咁，入到間店見到檯凳擺得幾疏，值得一讚。但佢嘅腸粉就認真麻麻地，首先唔嫩滑，咬落亦比較實，一層層嘅腸粉黐埋一舊，而唔係層次分明。唯一鍾意係有得喪落花生，所以食落都幾香口，不過呢一點普通粥麵店都有啦。至於個咖哩魚蛋，喺我已經對呢間店無乜期望嘅時候，佢係唔錯嘅。份量幾多，咬落都算係彈牙，個汁就一般般，有啲稀，咖哩味亦唔夠濃！

深水埗出名多美食，前後左右附近總有一間好食嘅，而合益泰小食就出名滑捋捋腸粉，家陣因為二人限聚令關係，排隊時間會比平時長，今次我就排左二十幾分鐘，不過為左食唔緊要啦🤗呢間鋪頭除咗有堂食之外，出面仲有一個櫃整外賣，所以會有兩條隊！而挨近鋪頭個條隊就係排堂食嘅，外面個條先係外賣，唔好排錯啊！就算堂食定外賣，豆漿都係自己攞杯裝嘅👆🏻杯同蓋就係放喺旁邊👍🏻既然出名腸粉，咁一定要試下，滑捋捋細細條🥰，有咬口唔會一pat pat！另外見到餐牌寫住12蚊3粒燒賣，心諗咁貴4蚊1粒應該有啲料到，又叫埋試下😹😹😹結果無令人失望！！類似平時係茶樓食嘅咁(豬肉個啲)，啖啖肉又香，認真好味😋另外嘅豬皮魚蛋就正常水準，鍾意食嘅都可以試下！

去開深水埗順便試埋呢間好多人排隊嘅腸粉店，佢賣得咁平，當然熱辣辣要企後巷都要食啦！➡️ 腸粉 ($2一條，$10起)⭐️⭐️⭐️⭐️ 店旁有個店員專做企街食嘅客人，一有人叫先即場喺個蒸鍋攞腸粉出嚟剪比客人。腸粉份量好多，食落又香又滑嘟嘟，口感唔錯。為配合各人口味，想要幾多醬都可以同店員講。雖然只係企後巷食，但完全食得出地度嘅街頭風味，醫肚一流！ 合益泰小食 地址📍: 深水埗桂林街121號地舖 .............................. 味道😋: ⭐️⭐️⭐️⭐️ 抵食💰: ⭐️⭐️⭐️⭐️💫

Rice roll is definitely a must try Street food in Hong Kong and I read that this is recommended by Michelin! So we decided to try it when we visited Shum Shui Po!It is very smooth and with a strong rice flavour! You can see the rice being mounted at the store, and then it was steamed immediately, no wonder the flavour is that strong! I would suggest people to share it cause the portion is quite large and better decide which size you want (cause you may be scolded if you are too slow!)

雖然細細間唔起眼，但係經常大排長龍，作為深水埗居民由細到大都會幫襯。最出名一定要食嘅就一定係腸粉，非常滑溜，配上各種混醬兩個字形容-美味😋 $16有八條，唔貴，做下午茶一流！其他魚蛋燒賣蘿蔔豬皮就中規中矩，冇乜特別。順便隨便食下都OK嘅

今日經過開深水埗就嚟食 合益泰。因為疫情關係舖面少左一半以上嘅位置，當食要企係外面等位，有位先可以探熱入座 。呢樣做得好好，原本仲擔心位於深水埗舊區一間老牌粥店究竟會唔會做好防疫措施呢？答案係令人非常滿足。入座後依舊叫咗中腸粉多麻醬、大豬皮蘿蔔、豆漿。腸粉冇失禮，依舊咁滑咁香米味。麻醬都係一絕，香滑！如果要食到條腸粉有冇米香，一定要襯熱同食冇沾到甜醬嘅腸粉。麻醬會突顯腸粉嘅米香(個人想法only)。而如果要食腸粉嘅滑，就要等食到最後，凍左嘅腸粉。熱食嘅話冇意思，因為熱嘅腸粉一定係滑，但如果你等佢凍左，就係見真章嘅時候(個人想法only)。豬皮爽滑，不過蘿蔔就令人失望。雖然蘿蔔冇渣冇花心多汁，但係唔甜，仲有澀味。真係令我好失望。我食左合益泰年資唔多，10年。佢地以前嘅豬皮蘿蔔真係好好食，豬皮爽滑大塊，食落過癮，蘿蔔冇渣清甜多汁。不過今次食嘅係唔甜，仲有澀味，我懷住呢10年嘅感情食落去，最後都係食剩。其實唔止今次，我係呢2年內係合益泰食嘅蘿蔔都有呢個情況。所以我今日決定同收銀嘅姐姐講！(因為佢相對比較得閒同我都要埋單)收銀姐姐好好，佢冇鬧我😂同埋佢都好有心聽我呢個客人嘅feedback。希

去深水埗試下出名既腸粉 openrice search到呢間係滑滑腸粉 試完油渣麵就順便試呢間 堂食要等位 因為好多人 而且地方少同好迫 要撘枱 坦白講腸粉係失望 因為麻醬唔香好水完全包唔到腸粉 雖然自己可以加其他醬 但其他醬加埋都覺得好淡味 腸粉有點彈牙既感覺 而我本身喜歡淋身同滑 所以個人口味覺得麻麻燒賣三粒12蚊 ok既 大大粒 但無特別蘿蔔好食 真係好甜 可以一試辣魚蛋 無特別整體來講 價錢除了ok之外 都真係無咩特別 唔一定要特登黎食 試一次就算

到現時為止, 食過最好味既港式粥舖。 好食到連薯片叔叔退休都要拖老婆黎食。佢既腸粉好味到出晒名係人都知。 佩服老闆咁多人都堅持到用這款豬油腸粉, 仲要佢既特製醬，這種味相信只有正宗香港人先造得出和食得出。 我試過外國既, 台灣, 大陸, 甚至自家研製, 都做唔到這個味道。 而且，即使香港本地, 可以keep到這種味道既腸粉真係買少見少啦。 我朋友叫左皮蛋艇仔粥。 雖然我都好鍾意食皮蛋艇仔粥, 但唔講唔知, 其實佢既白粥先係精髓。 朋友一聽我叫白粥即刻嚴棄，但講真, 我覺佢個白粥真係好綿滑, 這個白粥真係比我覺得食完會元氣十足。 唔知點形容, 真係感到好正氣, 雖然清淡, 但食完真係好滿足。有機會真係推介黎試下。 正宗香港味粥舖。

深水埗好多野食 ，但第一次試呢度嘅既腸粉，老實講食腸粉唔單只係淨係腸粉本身，醬料都係主角。一食落口⋯嘩滑DoDo，感覺到每一條好薄身再卷成腸粉會食到好香嘅米味好出。剛剛好既醬料，不咸不油 。排隊都值得正