吉野家 (已結業)

鰻魚迷既我....見到新出鰻魚飯，當然要來試下啦！仲要話期間限定.....又話特長原條鰻魚.....拉凸......見到店內張相超吸引！實際拎到上手，條鰻魚又薄又細......顏色較淺，一夾就散，完全夾唔起，超腍.....有點失色！鰻魚汁還可以，不是太甜，但份量不多.....只有鰻魚上面果少少汁，不太夠撈飯！好彩珍珠米加上蛋絲及紫菜絲撈埋都夠味！鰻魚飯會跟一杯飲品，不喜歡飲汽水，就加了$3配咗杯凍檸茶啦！

今日係apm行街，唔知食乜又想打邊爐，諗返起有吉野家！簡直係窮人恩物～ 我成日都會黎吉野家打邊爐，無論邊間分店都好，夜晚都係要等位架～呢排出左個相撲手火鍋，入面有雞又有牛，一次過食2款肉雞肉有4舊，牛肉就有一碟，加上4粒丸，2條蟹棒～好抵食呀！我地2個人食，單叫左一個相撲手火鍋，再加左一盒牛肉，一份娃娃菜，一份蟹棒都已經夠曬食！因為有份烏冬夠飽肚，咁樣叫total都係107蚊咋！抵食過叫2個火鍋架～apm有自助調料！可以自己配醬油蒜頭辣椒個d！有d分店係冇架～

吉野家由以前老老套套牛肉飯煎雞飯，到而家越來越多花款，為呢間日式快餐店搶回不少食客；最近這間marketing好強的快餐店又出左新花樣，就係呢杯雙併飲品，蜜桃搭巨峰，打邊爐就話有鴛鴦湯底啫，野飲都有？真係有創意我鍾意

星期一食有優惠，成個四月都好似有，但一定要係星期一食，我食呢個醬煮豚肉都唔錯，跟埋野飲。星期一食就平，早市$19蚊、午晚市都係$29蚊咋，個早餐真係好好好好抵食！

吉野家都係食返牛肉飯好！之前好似唔覺眼有窩夫食，見有新野咪買過嚟試吓囉！點知見窩夫好硬身，有冇香味，淨係加煉奶搞到奇奇怪怪。加多件炒滑蛋同炸魚就已經30幾蚊。仲要件魚柳炸得唔好食！絕對唔會再叫呢個！

平時我都好中意食吉野家家。 由其係吉野家邊邊。今日我係屋企靜休時。 我媽買左呢個外賣返黎。。 我冇留意吉野家出左新野。 一開黎睇 waaaaa 咁既？！？ 睇返張單先知叫 黑松露忌廉 XD 搞咩出D 咁既野既 XXXDDD 睇個都唔係好討好。。黑松露醬係香既。 不過忌廉汁同牛肉唔係好夾。可以講係伏黎既。。。最後我係隔開哂D 忌廉黎食。恕我唔識欣賞， 都係食飯original 既係最好食。當然如果我係堂食， 久唔久會要食蟹子三文魚飯🤤🤤🤤

因為 office免費接駁巴士轉了在觀塘 APM , 所以也要重新覓食啦喂! APM5樓吉野家， 早上8時左右， 到餐廳的客人較少。 我可以很容易找到舒適坐位。買了一份丹麥肉鬆包配豬骨湯烏冬，這份早餐連一杯熱奶茶售$25。丹麥麵包用足本牛油製作而成， 口感鬆軟， 適合喜歡吃牛油的人， 還精心配上沙律汁和豬肉鬆。 將它們放上丹麥麵包上，首先將沙律菜塗在丹麥方包上，讓表面充滿了沙律汁，然後灑上豬肉鬆， 沙律汁像膠水一樣，可以牢牢的把肉鬆貼著麵包，合併一起放進嘴，更感滋味。至於豬骨湯粟米烏冬， 內裏還有一片日式魚片， 烏冬彈牙，爽口， 連粟米粒粒入口也不錯。 食得滿意， 返工也精神奕奕。

睇其他食評先知呢到有自助醬油區，咁就特登係到食埋飯先返屋企啦。七點幾去已經坐爆左，咁等左陣位先開始坐底食。個鍋一開火就知中左伏，啲熱氣一直吹過黎，但又feel唔到有任何冷氣⋯⋯成件事好似焗桑拿咁。咁就一邊食一邊抹汗，等到啲食物熟曬先熄火啦。野食熟曬之後想叫職員幫手熄火，叫左幾次佢都好似扮聽唔到咁(佢有望過黎)，咁我就嬲嬲地諗住叫第二個，但第二個就直接叫我搵個位職員幫手。最後我係要走出位，行到個職員面前叫佢比熄火個舊野我，佢先肯慢慢走過去拎比我。之前食過幾間分店都冇試過咁，如果係為左啲醬油先去，咁真係好唔值。寧願舒舒服去第二間食算⋯⋯

吉野家推出這個黑松露系列已有一段時間，惟小女子的住處區內的分店面積過小，天天坐無虛席，導致一直未能嚐到這份平民餐點。今天剛好要前往APM購物，是機會啦！黑松露芝士牛肉丼(大)($46)，配汽水/茶/麵豉湯。吉野家的牛肉洋蔥配搭是街知巷聞了，煮得軟爛入味，和珍珠米非常合，好吃芝士汁普普通通，就是那種年輕人吃到會覺得沒有味道；長輩吃到會覺得超級濃郁的一般芝士汁，配飯是挺不錯的，個人認為不膩口，算合格。黑松露倒本來就不抱期望，吃時也沒甚麼感覺，拌在一起吃就覺得多了一種香味，但也不怎麼樣。總括而言，才$46一大碗，還附飲料，根本毋須挑剔。

吉野家嘅火鍋真係1年365日都見到人食, 而我1年都會食返1次半次, 最近經過吉野家見到泡菜芝士雞鍋嘅宣傳牌吸引咗, 心裡已經暗中想搵人去試下!!雞鍋上面舖有芝士片, 睇住啲芝士熱融黏住雞肉上面, 但係見證呢個過程已經覺得好盞鬼 👻 未食都覺得高興!!殲滅咗一啲芝士雞肉之後, 就可以放啲配料, 有腸仔、午餐肉、金菇同韓國泡麵..., 唔覺唔覺原來食緊一人迷你部隊鍋 😂吉野家頻頻為火鍋變奏出新嘢, 而今次呢個泡菜芝士雞鍋有驚喜!!! 而驚喜位唔係喺味道, 係整個食一人火鍋嘅過程感覺幾正😆  味道方面, 韓式湯底味道未係好濃郁同唔太辣, 可以話係大眾接受嘅味道同辣度~ 鍾意韓食又想打下邊爐嘅不妨一試!!

為咗慶祝兒童節，特登同姨生女去睇卡通片早場。晨早流流除咗茶餐廳以外，好多食肆都未開。忽然醒起戲院樓下有間吉野家已經開咗有早餐食，就那那林去食個早餐先！唔食牛既我二話不說叫咗昆布雞粒烏冬在外加一份炒蛋。首先講下個烏冬先，烏冬質地不過不失但係味道唔錯，可能係因為個湯底幾好味！塊雞扒冇乜驚喜，畢竟快餐嘅煎雞扒都不能要求太多吧！但勝在可以好易去皮，啱晒又要食又要怕肥嘅我。不過係衰就衰在雞扒切粒，拼埋嘅話都大概有半塊吧！$26.7可以食到一碗烏冬加一杯茶都算好超值，如果下次睇早場嘅話我都會在再返吉野家食依個烏冬。但係最後就必須要劣評個炒蛋！首先＄8一份炒蛋已經係好唔超值嘅事，而且仲要係超級難食！蛋無蛋味，而且仲整到硬啫啫，同個滑字差十萬九千里。結果最尾主張盡量唔做大晒鬼嘅我都冇食晒份蛋

🍗黑松露芝士煎雞飯🍗睇落賣相係唔錯 聞落好香黑松露味但撈埋就發現 啲汁太結 底好多飯都冇汁仲要佢啲芝士係冇味架 成碗飯係勁dry得啲好微弱既黑松露味😲之後我拎個雞汁落少少就覺得幾好食咁叫個芝士飯又有咩意思😞如果佢係雞上面放少少雞汁 個飯會完整好多

星期五好多時候我們會駕車去星影匯看午夜場，因為平啊😝！而電影往往開場時間是十點十一點，所以看電影前晚餐最好去APM，因為商店都比較夜關門，商場零晨一時才關門所以夜一夜商場人流仍然暢旺，特別星期五晚，9點也要排隊等候入座，真是搵食艱難，所以今晚我們決定食吉野家算了😂整間吉野家的食客9成是點火鍋的，Nosir當然也不例外，新推出的珍寶蟹棒火鍋，蟹棒真的很長，味道沒太大驚喜我最喜歡的三文魚蟹籽飯這次超失望，2個字：爛飯😑

食完吉野家個窩真係返唔到轉頭，啲湯底濃得泥唔太咸，啲醬料都唔水，啲配菜都唔錯，賣相亦都幾好，唔會太膩，比起大快樂真係食唔返哩啲垃圾窩，咁既價錢好滿意。不過啲位窄同好難搵位，啲員工好似做得好辛苦態度麻麻之外其他都good！！！

通常黎吉野家, 一係食火鍋, 一係就食下午茶~ 而下午茶就一直鍾情佢既牛肉昆布烏冬! 由17蚊食到依家27蚊...今次呢碗牛肉昆布烏冬好足料, 有好多塊牛肉同洋蔥,  佢既洋蔥係好正既, 熟透而且完全腍身, 一啲都唔辣口, 烏冬應該係稻庭烏冬, 彈牙爽口, 連埋昆布一齊食好味道! 而個昆布湯底都好香, 雖然就咁飲有少少鹹但都會一路食一路忍唔住飲. 仲有一兩件日式魚蛋, 獅子狗做配料, 呢個份量做下午茶岩岩好! 如果佢除左牛肉飯之外 呢個烏冬都可以做下特價就好喇..