和味生滾粥 (已結業)

因為唔想蝦子餅煮足7日，今日就俾佢休息下，出去廟街"掃街"原本想找新xx食魚粥，點知行來行去都唔見突然看見這間和味生滾粥，門口又貼上很多明星光顧照片，應該唔差掛.........終於都係上當我要了魚腩粥 ~ D魚腩煎過既，有生菜絲蝦子餅要了四寶粥 ~ 有魚頭、骨、腩、魚卜，全部都係煎過既味須好...但味精都唔小囉其實如果D魚係新鮮的話，為何要將它們通通醃了同煎過才做粥呢？好似旺角富X，原汁原味食完呢碗粥，立即出現味精後遺症...咳、周身唔舒服今次真係非常和味啦.......

1-8-2009未食 lunch, 3:xx pm 人在佐敦亂行一通嚟到吳松街, 入嚟食碗粥吧. 睇住阿姐喺廚房爆魚咀/魚卜 etc 爆到「逢逢」聲又勁大火, 又叫碗魚卜粥 ($30) 試試.粥底幾綿, 帶濃濃「鑊氣」味及魚味, 又唔會太鹹, 幾好食; 魚卜食極都仲有, 爽口又幾香口, 唔錯唔錯. 但差不多食到底, 撈吓撈吓竟然撈出一隻曱甴屍體, 真係 100 個噁心, 好在到而家個肚仍然無事. 講真, 呢類地 mou 食店衛生麻麻其實都唔出奇, 見到地下有昆蟲爬來爬去都算, 但唔好加料落食物度先得0架! 嚇死人喇!亦因為實在太噁心, 都費事嘈了, 撈佢上檯後立即放低 $30 走人. 後會無期!

推介朋友來呢度食魚粥, 因為我都好喜歡呢度的出品, 雖然都一段時間無來了老闆仍舊的好笑容, 好招呼魚四寶粥的水準還好, 唯一要彈的係今次的魚卜有點苦味但其他的魚頭, 魚骨, 魚腩,都爆得好香口根本就係料多過粥又叫多一碗魚腩粥, 呢個就失色了一點, 魚腩爆得未夠, 但食得出魚肉都好新鮮加上充滿魚湯的粥底, 朋友試都讚不絕口加埋個炒麵, 岩岩好過70蚊, 仲有兩粒免費的烤鯪魚球添走個時先留意到, 原來生菜絲, 薑絲係可以免費任加的, 雖然要自己去拎, 但都ok啦

星期六.冇乜胃口，只可以食粥下午黎呢度入到去.D侍應各有各傾偈.一D招呼都冇.當我冇到因為魚粥是這裡很出名.所以叫左魚腩粥.都幾大碗.料是十足的,單是大大片的魚腩都已有四片又夠厚,每片都是肥美而新鮮嫩滑的鯇魚肉.並且見到碗粥放了數片薑.可能怕有些食客受不了腥碗粥好甜.精髓在於粥本身,粥身較棉.我覺得加少少蔥花吃仲正.會很香口地方都算係普通而舊款式.但是幾好坐之餘又幾乾淨今天$32.記得十年以前價錢亦差不多.差一兩元我都會繼續食既.服務有改善的話就非常好個人心得煮粥用的米最好用東北大米，就是圓圓短短的珍珠米，先大火煮20分鐘，后小火煮1個半小時.煮出的粥特別綿軟

久聞佐敦有間粥舖好正, 今日行過咁啱下午茶時間, 就試一試.見到招牌推介四寶粥粥, 就叫咗一試, 當時四五枱客, 都要等咗十分鐘先有得食. 魚咀, 魚腩,魚卜,骨魚., 材料好香口, 因為見師傅先將料爆香才放粥. 粥底不錯.配料薑絲和菜絲任落,但味精稍重, 食後感到口渴.這裡還有小菜, 下次或會一試.

同媽咪講話搵到間粥店d魚粥唔錯，所以搞到佢又蠢蠢欲動 okok，今晚放工就帶佢去試下啦 到達時大約係 20:30，嘩...真係幾full 下喎 我同媽咪只好被迫同另外兩個同在一四人桌上 魚腩粥(媽咪的)﹕大大碗，碗面全是滿滿的生菜，往粥內一舀，「好多魚腩喎~~」，這是媽咪所說的 媽咪話d粥唔錯，一食就覺得佢一定唔係用米粉開既粥，應該係佢地自家煮個喎 媽咪話d魚腩都好新鮮，所以d粥好鮮甜 最後佢都食唔哂d魚腩，佢話真係好多喎我就照舊，魚腩+魚卜粥﹕保持到水準喎 不論魚腩同魚卜都好新鮮，好好味~ 粥底又甜又富有魚既鮮味，我真係怕會食上癮呀豬潤腸粉 x 2﹕我同媽咪每人一碟 始終都係咁好味 yummy~~ 不過今次差左dd...d腸粉唔夠熱啦 如果再熱d既話，呢餐就簡直係perfect豉汁蒸魚雲﹕份量真係有差不多一個魚頭咁多呀 由肥老闆親自操刀，蒸魚雲既火候掌握得好好，魚雲蒸得好滑，豉汁配上蒜茸既味道又好，呢個汁最好就用黎撈飯喇~ 可惜呢度無白飯供應....炸鯪魚球 (4粒)﹕即叩即炸，真係岩我心意 剛上枱時要小心吃，因為真係好熱架 唔好俾佢既外表呃到呀 鯪魚球混合果皮，真係好香，好好味~

本想到「鋮記」試下d魚粥，但行下搵下...見到門外寫上「不賣隔夜魚腩」既poster的「和味生滾粥」，所以就膽粗粗走入去試下 由於當時係下午4點左右，舖內只得兩位客人，大把位揀丫 無menu架...店內供應既食物，全都張貼在牆上 諗左好一陣，最後選擇了﹕魚腩粥 + 魚卜﹕呢碗粥索價 $ 25，加魚卜要多加 $ 7，所以一共係 $32 等左幾分鐘就有得食喇 嘩...碗粥既份量都唔少喎 仲有好多生菜絲鋪係面，賣相唔錯喎~~ 試第一口粥....嘩~~~ 好鮮甜呀 雖然d粥唔係咁稠，但味道搭夠啦~ 魚腩真係好好好鮮，食得出唔係隔夜貨，真係好掂 加 $ 7 既魚卜，都有4個呀!! 爆過既魚卜一d腥味都無，食落面層腍腍地，內裏就係爽既，真係好好味 成碗粥被我清哂，真係一d都無剩呀豬潤腸粉﹕$ 16﹕即叫即拉既腸粉，真係熱騰騰既~ d 豬潤切粒，食落剛剛好熟，一d都唔覺韌，真係好好味~ 腸粉既皮好軟滑，真係意料之外 唯一差少少既就係少左dd豉油見到有人叫「四寶粥」，好奇四顧睇下咩叫 四寶.....原係「魚腩、骨、咀、卜」 $ 38，真係好期待下次再來試一試這一個「四寶」~今次既冒險遇到d特

那天身在佐敦找Lunch 吃, 走入一間粥店覺得好得意, 食魚粥都有得揀魚標、魚咀、魚腩、魚骨... 好勁o者!我們點了﹕魚腩田鷄粥艇仔粥蜆芥鯪魚球4粒招牌魚腩粥果然正! 加埋鮮甜的田鷄, 好好味! 不過個粥底甜得來有點稀魚粥個粥底明顯比艇仔粥好味至於蜆芥鯪魚球, 好味! 同埋好開心可以散叫, 最少2粒都有~心掛掛好想再去食那除了粥品, 仲可以叫小菜, 佢係用粥料做的, 例如蒸泥鯭、薑蔥魚腩等.. 食食吓, 有個好似老細的人入來, 佢一推門就同全店的客人打招呼, 好似返屋企咁, 而我地就係o係佢屋企食嘢的客人/朋友, 感覺很親切呢

記十一月上旬遲來的晚餐收工已是凌晨，平日這時候該打的回家早眠，是夜唔想空著肚子訓，於是搭程紅色小巴出廟街，在油麻地、佐敦交界落，到附近找點吃，又順手搵搵夜店資料。廟街愈夜愈精彩，獨個兒不想吃小炒，於是故地重遊，到這裡喝碗魚膘粥。小店依舊坐滿人，款式比從前多了，諗了諗，要了碗魚膘粥加豬心加黑百葉，廚房靚姐同時間招呼幾檯客，加埋打著PSP等外賣的朋友，要吃也得等一等。三併粥等上十幾分鐘先有得食，勝在是即叫即做，魚湯粥夠熱，帶淡薄魚鮮味，對著水汪汪的廣東粥皺皺眉，師亦無多無少「風味」依舊，零分粥底真的吃到想喊；走頭無路下轉攻配料，魚膘份量較往年少，得三粒左右（可能是三併關係），老派做法下紹酒爆香，外層黏糯裡面爽嫩，很美味，豬心爽身，但似是下過食粉，無味亦只得個爽，百葉爽嫩天然，吃得滿意。配料是幾好的，奈何粥底比從前差了很多，重量不重質下，比較起兩街之隔的新興棧差很遠，相信今年都無乜機會再來。

09月19日，21:00笨蛋始終是笨蛋，小週末仍幹到19:30出離開深圳公司。在麻辣王吃過魚蛋，便想來碗魚卜粥，補一補。近期去了新興棧和鉞記，餘下來便是這店。店內客人不多，要了魚卜粥。滿佈菜絲的粥約五分鐘後到位。配料：有大量薑絲(用來逆辟味)和菜絲。粥底：夠綿厚，味偏濃而不算鮮。魚卜：約十件，體型不算大和肥美。看來吃魚卜粥，還是首選新興棧。那虎背熊腰的阿姐，粗聲粗氣，招呼一般。

返course落左佐敦搵食,同事介紹過佐敦有間粥品,佢地既魚卜可以一試地點唔太難搵,叫左一碗魚卜粥食,魚云,魚卜都係我既favourate之一,有得"損"我就鍾意,可能你會覺得我核突,魚眼我仲鍾意添呀!講番碗粥,魚卜既份量都幾多,粥底ok,鍾意佢重手地落蔥花,咁樣食粥先會好食,抵讚!粥底偏稀,味道ok,不過如果淡番少少可能效果更佳!

下午四點幾行過，諗起好耐冇幫襯過，入去食碗魚卜粥。對上一次食係半年前，印象好好。今次就改觀晒。可能魚卜爆炒o既時候太多油，成碗粥都好多黃油，而且又勁重味精，粥底又好稀，魚卜食晒，粥就剩半碗。之後仲要去7仔買支水沖淡o的味精。$30/粥 + $4/水 = 一碗粥$34希望下次黎有改善啦。

肥老板走了，牛肉溥了很多，魚ト小了及少了，失望

佐敦有好多粥舖,見li間舖門口有好多明星相就試吓,魚腩粥&猪潤腸粉都OK,魚腩都多,不過味精就多咗D,我覺得粥稀咗D見好多人食魚鮫&泥猛粥, 下次都可以試吓

今日食左佢個魚卜粥($30)及白灼魚皮(16), 魚皮細碟又唔爽滑, 個粥吃了一啖已發覺唔對路, 粥底較稀, 雖然極多魚卜(起碼10個), 但同時亦勁多味精又多油, 兩樣同隔個街口那間鋮記無得比, 勝在佢地方比較乾淨. 或者佢主打唔係呢兩樣野啦, 怪就怪我唔識食.....