噹噹牛涮鍋 (已結業)

上星期經過，發現到呢間新開嘅火鍋店，晚市有個「澳洲和牛」放題套餐，做緊半價，只需$164，咁抵食，於是決定今日走去試試。坐低揀套餐（有五款揀），咁當然要「澳洲和牛」啦（因為淨係呢款做半價），但事隔一星期，限時由120分鐘改到得90分鐘（但其實都夠時間食）。之後揀湯底，一人一鍋（茶樹菇雞湯、鰹魚清湯）。除咗肉類（牛、豬）要叫人落單，其他火鍋食材、醬料、飲品（有支裝玻璃樽汽水，正）、雪糕，自助出去拎。湯底，老實講，兩煲都冇咩特別，叫做有啲味咁啦。牛肉，叫咗6次，除咗有1次比較肥外，其他5次都好靚，因為好薄切，淥十零秒已經食得，都食到啲牛味，尚算滑，唔嚡。豬肉，叫咗3次，質素平均，同樣好薄切，少少爽口，冇豬臭味。主力食肉，其次都係拎咗啲菜、菇、粟米，質素正常。PS：加一加原價，即係$164+$33=$197@

見到新開張，又再抱着讀萬卷書，不如試萬次伏嘅心態入去試一試。結論係有待改進。首先講舖頭嘅擺位係寬敞，完全冇逼夾嘅感覺。一入門口見到擺放汽水嘅雪櫃，排列得好整齊，入邊放住支裝汽水算係特色之選。不過當我開完支汽水之後嘗試搵吓有冇飲管，問侍應得到嘅答案係：「無管㗎，用杯啦。」其實我唔反對環保，不過可以貼返張溫馨提示等我唔使搵。（雖然我覺得支裝汽水係應該要用飲管先啱feel，但若果店主係環保分子我都支持）不過首先未夾之前，就見到個夾餸碗好似洗得唔太乾淨，有少少漬。醬油區隔離擺咗一煲白飯，上面有一盒盒日式咖喱，黐住隔離有另外一煲食物，心諗應該係咖喱，點知幫我筆完飯，諗住筆咖喱嘅時候，發現原來隔離嗰煲係紅豆沙，嗰刻我知我真係諗多咗。配菜類種類都叫做唔少，如果可以加埋蟹柳同埋蟹子丸係最好。主菜牛肉同豬肉，牛肉睇落去個樣唔錯，不過食落去就覺得少少鞋，肉質唔夠嫩滑，反而豬肉有驚喜，比想像中好食。值得一題係之前睇食評係有Häagen-Dazs送，但今日唔知點解話冇貨，有點失望。雖然佢標榜$328半價，但係會跟返原價+1服務費，即係買單都要$200一個人。服務費都值得比嘅，因為侍應見到我哋四圍望，都會主動問

每次同一大班朋友出街食飯一定係食放題火鍋或者日式放題。貪佢有得坐夠耐，慢慢傾吓計，而咁啱知道呢一間餐廳新開張，做緊澳洲和牛放題半價優惠就即刻喺OpenRice book咗枱。每人折後都係$164，非常抵食。湯底有五但選擇：鰹魚清湯、壽喜燒濃湯、簡芹麻辣湯、茶樹菇雞湯、車打芝士蕃茄鍋。任食嘅澳洲和牛牛肉切得非常之薄，所以係真係涮涮鍋，燙5秒其實已經熟。都係靚嘅雪花牛肉，油脂分布非常平均。不過普遍朋友都係話佢豚肉仲好食過牛肉，大家又可以試吓去評價下。其他配菜等方面有一般嘅丸同埋蔬菜，其實選擇亦都非常足夠。甜品係一個香港品牌嘅自家製雪糕杯，有雲尼拿、芒果、海鹽等味道。每人埋單$200有找，任食120分鐘，今時今日我覺得係超值。呢一間新餐廳感覺到佢都非常之用心去改善每一方面。見番佢第一個食評同埋今日嘅比較，都見佢有改進，要值得支持。

上星期五放工約咗好友一齊去食噹噹牛涮鍋，上到去，地方寬敞、乾淨…..仲有一個好有特色嘅樽裝汽水櫃，之後大家order咗澳洲和牛嗰款，每人一爐非常好…..乾淨衞生，再加上澳洲和牛超好食，其他食物都好新鮮，服務態度又好，會再次幫襯

因為見倒有優惠，所以去試下，點知中伏。我老公去整豉油，當夾芫茜蔥時，一堆烏蠅仔喺隻碗度飛出嚟，嚇到我地爆炸，當我哋彈開時，樓面個女仕仲望一望我地，跟住唔理走開，我老公忍唔住同另一位樓面男仕講，佢先攞入廚房話換咗佢。但基本上佢全部比人夾的食物都冇用嘢蓋著，所以連我夾冬瓜時都有烏蠅。但個澳洲牛都算ok, 但實在冇咩其他嘢食選擇，甜品又冇，而家放題週街都係，所以我一次唔會再食呢間，衛生好差，食物選擇唔多，待應經常企埋一面傾計，係碟澳洲牛叫ok,其他冇嘢可取

同朋友喺漆咸道搵飯食， 見到新九記隔離開咗間新火鍋店， 響門口睇到澳洲和牛新張試食半價優惠，唔係嘛， 百令蚊任食放題，我真係冇睇錯呀🧐🧐商量完即刻同朋友衝上去好彩有位上菜好快， 一人一爐，好貼心❤️，食物既新鮮又好味，因為一個朋友唔食牛，所以就試咗兩款：澳洲和牛同黑毛豬，兩款都好好味，出邊配菜自助區，飲品任攞 （酒精飲料除外），哇，仲有樽裝可樂添😍食幾多就自己去攞幾多，地方環境又好乾淨，我好快會再去幫襯

上星期經過見到有人喺門口派傳單，知道啱啱開左間日式火鍋放題，所以就同朋友上去一試，可能新開張關係，唔太多人，被安排坐喺卡位，地方濶落，坐低無耐，有店員埋黎介紹，我同朋友都未知揀咩好，店員於是比個機會我試下澳洲和牛同日本和牛，睇下我地鍾意食邊個先決定，真係值得一讚👍🏻👍🏻👍🏻👍🏻，試完後澳洲和牛肉味重啲，日本和牛入口嫩滑，最後我地揀左日本和牛，當晚主攻和牛，味道實在不錯，好好味！日本和牛高質👍🏻值得一試，仲可以有支裝汽水供應，實在回味😊😋😋，新張期間仲有八折，食到飽一飽，一定有回頭👍🏻👍🏻

見新開張有8折，放一個鐘頭午飯即管去試下。。。上到去人唔多，冷氣強勁，地方寛落但樓底矮，叫左個定量最平果個特選牛肉套餐，牛肉偏瘦同無乜肉味，湯底偏淡，出去攞配料一眼睇哂得佳寶什丸，菜，菇。。。。行左一個圈都揾唔到雪櫃櫃，問侍應先知原來只限一人一杯，落柯打比佢攞比你(真失望，明明寫住飲品及Haagen dazs雪糕可於自助吧自由取食, 但根本就無，唔知叫放題套餐係咪咁先有任叫？)另外估唔到係一樣甜品都無，我重申係一樣甜品，糖水，前菜，小食都無，只得一煲白飯，咖哩汁。。。。第一次打邊爐食得咁悠然自得無趕頭趕命，可能無野食簡，似阿婆食嘅午餐恰下恰下咁。。。。唯一要讚有樽裝汽水同果汁茶，仲有其他款式罐裝飲品，完。