壹匯中菜廳 (置富第一城‧樂薈)

營業中

休息中

早上10:30打電話問仲有冇蒸飯，佢話有即刻落樓，3分鐘到咗收銀櫃枱，收銀叫我揾經理攞點心紙，經理叫返我去收銀直接落單，排咗隊10分鐘終於到我，點知有個再高級啲嘅經理喺旁邊話10:00截單，冇蒸飯‼️平時堂食已經成日漏單，下午茶時段又好少客，收銀員都係求其幫你入單 。有次食山竹牛肉仲有膠紙喺裏面，同經理投訴，佢即刻攞走毁屍滅績，然後先問我要補返個咩點心 。街坊生意做成咁遲早執 。香港飲食業就係俾呢啲人攪軭晒

香港飲食業一蹶不振，找到其中一個原因了，來這就可以體驗到了！服務態度好差，也了解行業都會有差別對待，但也不用對其他人就看也不看，座下了，只換了枱布，沒有杯碟，問了茶，只係叫咪，最後還是什麼都沒有。

星期日晚上同家人忽然之間想落街食飯，來碰碰運氣睇吓使唔使等位🥴哇！幸好7點左右入到酒樓便可以立即安排坐位了。先講下服務，睇得出人手不足，我哋要示意很久才有服務員來下單及斟茶。不過也可以接受的，週末一般都較多人。哈哈反正服務員冇「西臉」已經算不錯了！食物方面：叫了五個菜，條魚確實蒸得不錯，口感鮮味，其他的不過不失，但欠缺賣相，有點差！好似求求其其煮熟之後放在碟上就算，沒有吸引到食慾🥴環境方面：乾淨衛生，座位寬鬆。

老人家嚟飲早茶，完全冇人招呼，離早茶時間完結尚有25分鐘，一直叫人嚟落order冇人應，一個職員話等陣，另一個職員叫佢搵經理，一直未有人落單。服務趕客，對一個人食客(長者)非常不歡迎。管理層需要正視，做好教導員工工作。註：食物包括腸粉和叉燒包少餡，蝦餃尚可

新開酒樓就嚟試吓，之前試過飲茶OK，性價比。就嚟試吓晚飯，叫咗個龍蝦餐，龍蝦伊麵，椒鹽鮑魚加咕嚕肉。龍蝦伊麵，明明一隻龍蝦，但係唔知點解有幾舊龍蝦明顯係死龍蝦的，啲肉好霉，所以唔會再嚟呢度食海鮮。椒鹽鮑魚味道普通，冇乜特別。咕嚕肉明顯啲肉應該好多肥膏，所以炸出嚟冇乜肉味。總括而言，晚市食飯一般，唔會揀呢間酒樓嚟食晚飯，但會再嚟飲茶。龍蝦上湯伊麵，可以揀芝士或者上湯，我哋揀咗上湯。由於龍蝦唔新鮮，所以啲肉霉同埋離哂殼。

下午茶時段到差唔多4點，較少客人嘅幾檯被執檯員工大聲呼喝話要埋單先，令隔離檯客人都話唔會再幫襯。埋單後，亦有另一員工企係旁邊望實曬，但飲茶期間完全冇見佢出嚟服務客人，成個過程根本係趕客人走；同時遠處亦有幾檯較多客人，但冇見到佢哋行去呼喝/勸告埋單，完全係差別待遇。要落場係正常，但唔係呢種態度。食物及茶正常發揮，比較欣賞煎餅，但唔會再嚟食。環境唔錯，冷氣都夠，但唔會再嚟食。衛生程度唔錯，但唔會再嚟食。

沙田第一城的壹滙，D女樓面相當粗口😅（佢哋自己喺度傾計，不是鬧客😂但真係太大聲了）2個人點了一條星班（蒸得啱啱好👍🏻肉質鮮嫩。炒通菜，普普通通，略嫌唔夠味。蒸蟶子(依個明顯唔新鮮，未食已經睇得出😂）其實個場都唔差的，裝修頗新👍🏻但女侍應們可以改善一下，傾計時不要太興奮😆

今日去試新茶樓，下午茶，食物普通，下午茶茶位10蚊一位價錢唔算平，最令人感到不受尊重的係行去收銀處俾錢，個茶樓收銀雖見到我但只顧做假己嘢，一句唔好意思等等都無，要我企左成分鐘先收我張單計數。我問佢茶位幾錢位又唔答，我再問第二次就寸咀咁話自己睇單啦，態度無禮！呢位收銀阿姐可謂趕客至極，怪不得咁多人北上！

今日lunch 就去咗飲茶~呢間酒樓有好多新嘅特色點心例如滑蛋蝦餃煎米粉同紫菜煎芋夾！煎米粉上菜嘅時候賣相好靚，有啲似兩面黃，但係佢係有啲汁嘅，成個Pizza咁大，味道唔錯，啲蝦好大隻好爽脆！紫菜煎芋夾係將啲紫菜夾住d芋溶去煎，外皮脆卜卜，入面好綿滑，幾好食鍾意芋泥嘅唔好錯過！我哋仲叫咗乳鴿同燒腩仔添！上菜熱辣辣，脆卜卜幾好食！乳鴿仲做緊特價～另外甜品叫咗雷沙湯丸！外皮好軟糯，入邊芝麻餡都唔少！幾好食，唔會太甜～