大叻越南牛肉粉餐廳 (海灣街)

營業中

休息中

餐廳坐落於後街，環境不算理想，服務與清潔都屬一般般，但都會心思思過來食炭燒豬扒飯！因為真喺有炭香味，豬扒鬆化，配埋蔥油，次次都食到照鏡，飽凸，暫時此炭燒豬扒飯，絕對是豬扒飯中的冧巴溫

嚟得鰂魚涌啲嘢食都有返咁上下貴，間間連鎖店食到有啲悶不如就試吓呢間小店啦。雖然環境有啲似大排檔，但係佢嘅香茅豬扒飯就真係冇得頂。分量大大件啲肉又滑仲要夠平，你話喺香港島邊度搵唔鍾意食豬嘅朋友都可以選擇食雞㗎

大家都知道係太古坊番工揾到lunchtime平價又好食嘅地方真係好困難，就算有，都一定要一早去排定隊，因為遲左少少已經有一大班打工仔一齊等位 *face palm*呢間大叻越南牛肉粉餐廳係我一個朋友極力推薦，佢話好美之餘又飽肚，成日會一個星期去食2-3次，所以去之前都好大期望! 佢間餐廳係一條窄街入面，佢雖然好多人等位，但因為店舖面積都幾大，同埋普遍d人食完就走，所以d人都走得幾快，唔洗等好耐。唯一一點就係夏天去會有d熱，因為室內位置有限，好多時都係好似d大排檔咁係外面食，不過叫杯凍飲飲住食都還可以嘅~今次我黎到就叫左一個生牛肉河，牛肉薄而有味，唔錯! 我最欣賞嘅係佢個湯底，好濃味，比起一般連鎖店入味好多! 份量都足夠，真係一個lunchtime唔錯嘅選擇我朋友就叫左個豬頸肉雞翼飯，豬頸肉都幾好食，個邊會煎到脆!不過雞翼就普通左少少，係正常質素。

大叻係…抵食夾好味有一種揀餐廳既指標叫「等位」，呢到食 Lunch，十二點一已經要等位架啦，要食就要早少少啦未埋到餐廳，就已經聞到炭燒既香味。呢間餐廳，係食越南野既，但我都唔知越南係唔係鍾意BBQ 既。但呢到既炭燒雞扒，炭燒豬扒就真係呢…冇得彈。根本做唔切，要用炭黎燒，邊快得架，有冇試過BBQ架，啲炭白晒就要換炭架啦，我真係唔明，快快手，用石油氣，煎完就上碟，快靚正，食得飽飽就返工返學返寫字樓啦。但係就係差咗個香字，城市人少聞燒炭味，我自己就覺得好正啦。另外，雞扒係多汁既，唔知係唔係咩鎖住啲肉汁之類啦，應該都係架啦，炭爐溫度高，直接燒落塊扒到，我諗應該係，除非唔係啦。除咗肉嫩汁多，佢仲有燒汁，自己因自己口味加埋啦，就超野味啦。

坐落在鰂魚涌巷仔的大叻, 附近好多office buildings, 唔知佢晚上多唔多人食, 肯肯家既係平日午市真係多人到大得了~$48左右起有一個午餐有湯河, 有凍檬, 有炭燒豬扒/雞扒等等包飲品，點解1230未到已經滿座而一點左右會有近30人企在巷仔上等緊"頭圍"用饍完畢呢? 皆因佢的午餐keep到高水準, 而價位在附近來說十分fair~炭燒香茅豬扒飯 - 真的炭燒2大塊厚豬扒有蜜汁甜香, 飯上則配了蔥油, 下面還鋪了炒了的椰菜, 簡單又好味, keep住呢個味, 根本好難厭~大叻鮮茄牛坑腩湯河 - 大大碗鮮茄坑腩, 茄湯底甜, 牛坑腩有痴住d肥邊, 肉好淋, 很不錯！扎肉雞絲撈檬 - 有扎肉同雞絲夠晒健康, 撈檬底仲有大量生菜絲、紅蘿蔔絲、青瓜絲、幾粒香花生加埋撈汁, 天氣熱熱地時食夠晒清新仲爽性價比高自然長期吸到客, 一定要keep住啊

今日中午放lunch 同同事去食越南野，依間餐廳平日12:30pm-2:00pm前勁多人排隊同迫爆，因為好多人等位，我地都等咗成30分鐘以上先入到去。見到好多等到唔耐煩嘅人都走咗。提提大家，要齊人先入得。間店都算好大。都幾多位。不過唔算闊落，仲坐得好迫。佢有個午餐餐牌，點咗個大叻越式雙拼飯（豬扒及雞翼），$54蚊。配左杯熱檸茶。佢上菜服務都好快手。首先上咗杯熱檸茶，無咩特別同平時飲開跟餐飲果種。講下個飯，雞翼同豬扒份量好多，雞翼炸得好香脆，而且好多肉，入面無血水。而啲豬扒好香碳燒味，而且有少許油同汁，食落去唔會乾身。而個飯係蔥油飯加豉油，食落口好香蔥油味，但飯真係比較硬同乾身，所以我加咗好多甜豉油。抵食平民餐，不過環境同衛生有改善，因為啲餐具洗得唔太乾淨。

咦咦！今日放飯同經理一齊食喎，食咩好呢……都係食返食開嘅大叻越南牛肉粉餐廳。上次同經理、幾個同事一齊食，覺得好抵食，然後開始經常食啦！下午茶餐有幾款飯我係特別推薦嘅，今次我叫嘅係炭燒香茅雞扒飯，經理就叫碳燒豬頸肉飯；另外就係豬扒飯同碳燒豬肉飯都係推薦嘅飯之一。其他小食就冇叫啦，留返晚市嚟食先再試啦！我嘅雞扒飯到啦，唔到經理即刻食。真係好香呀因為！雞扒又唔會太肥喎，有少少脂肪咁先最適合，仲有落薑蔥令到個飯都有香味。唯一唔太好就係佢落太多油，真係好油。

黎過幾次呢間越南野，都係幾好味嘅！可能近太古坊所以lunchtime都比較多人。之前黎過幾次都係食豬扒，有一次食過雞扒，但都覺得豬扒好食啲，有啲似細個食「小巴黎」個種feel🤪除左要等位之外，因為佢啲豬扒都係即刻烤，所以都相對上等得耐，趕時間就唔好食hahahhaa今次等左好耐，但啲豬扒黎到真心熱，仲有少少炭烤味，連平時唔中意食肉嘅我都覺得好食😌聽對面個個人講話啲「秘製鼓油」都必食，但驚太咸我無加！啲portion仲要好多，飯同肉都係！

之前lunch食過一次 覺得炭燒豬頸肉飯真係好味今日又想再黎食其實都知佢多人架喇 不停有人排隊同外賣所以我等左20分鐘外賣都未敢催佢 見前面一位都係問一問佢先有 甘我都問一問我果份有未 店員一話：我唔知呀！你問入面！我就係見入面打晒杖甘亂先廢事問... 但係店員一叫我問既'入面' 係吧台既人佢汁緊野 又同時要管理外賣但係眼見係冇人得閒理我而我lunchtime都過左差唔多一半既情況下都要問下吧店既店員二 點知店員二唔應我不特止仲要用d人地飲剩既飲品一野潑晒落我隻腳度都唔講聲對唔住我忍唔住話：你潑到我wo!店員二依然係冇表示 眼尾都唔望我 然後我同一位貌似老闆既男士講：我想問下我外賣幾時有 同埋你地店員用飲品潑到我連道歉都冇聲 男士都冇講唔好意思都算 要我出到聲問佢拎紙巾佢先拎左紙巾俾我抹腳....之後男士仲要叫我第時打電話外賣快d! 喂大佬 你地午市堂食同外賣自取都未做得切仲做埋外賣送貨？！ 幾好食都好 服務態度甘差都幾趕客架wo!

餐廳位於鰂魚涌某橫街窄巷內，真係唔熟都唔識去食。而且又係太古坊員工們嘅飯堂，平日下午去食的話即使兩個人都隨時要等位。如果坐出面就真係「恭喜」你喇～隔離企住個個等位嘅人，又突別嘈（因為嗌位），有得揀真係唔好坐店外座位。講番食物，必試嘅係炭燒雞扒飯，份量好足料，一大塊雞扒切好6-7塊，好香炭燒味，油份亦十足，非常香濃。飯嘅份量不過不失，但因為油膩嘅關係所以好似特別飽。生菜加雞扒加啖飯食真係一流！聽聞炭燒豬扒都係必食之選，下次要去試下～

救命，無錯。鰂魚涌既餐廳，又係我。早幾日成日食埋晒d湯麵，呢日好想食大塊大塊肉！所以就去太古坊隔離好隱閉既大叻到食飯～見好多扮工仔去食 不論男男女女都肉肉肉肉肉肉。第一個感覺係 好多肉啊！【炭燒豬頸肉飯】$54真係幾大碟下，好簡易啦，有豬頸肉，飯，菜，汁。豬頸肉真係有炭火既香味，惹味，為我苦悶既扮工生活帶來點驚喜。個醬汁係好味既，本身個豬頸肉佢整得都幾肥膩下，而個酸酸味味既汁好fresh，令我可以食得晒成個飯。 如果覺得就咁食白飯好dry我覺得個汁都好適合撈落個飯到！但缺點係，真係幾油下，個菜比d肉搞到好油，本身個菜係拎黎fresh下個口嫁嘛，宜家就唔得囉。同埋個菜過熟，搞到無咗菜應有既爽脆！總結，食得過啊，我會再返去食！唔貴又大兜，係鰂魚涌，呢個性價比高啦！

炭燒香茅雞扒飯 $50中午放飯就響附近鰂魚涌後便街既 大叻! 點左呢個炭燒香茅鷄扒飯做午餐, 大大件得鷄扒, 送到埋枱既時候係熱騰香噴, 令人覺得好新鮮好夠份量!試一口鷄扒, 嘩~ 好好味呀, 醬料混和烤鷄肉入哂味! 好快好快就將整碟雞飯食完lu~ 附送餐茶&免加一, $50好扺食! 中午人多, 食完就要走lu!

他們的午餐十分受歡，迎經常有人在外排隊。 午餐可算是大件夾抵食， 香茅豬扒、炭燒雞扒 番茄牛腩河粉或那個雞絲扎肉凍檬也是十分好味的。凍飲也夠冰凍，但有時上凍飲的時間會可能比較慢。整體來說，越南食品，是很好味的。 位置上可能有人會覺得比較污糟，因為是在內街及小巷。 但我光顧多次也是沒有問題。

呢間大叻越南牛肉粉餐廳午市時段好多人排隊, 原本已經到我地, 不過因為未齊人唔入得, 一定要齊人先比位架...午市套餐有以下呢D, 價格由 $48 至 $54, 唔想食午市套餐, 可以叫MENU果D, 午市套餐都係少左杯野飲姐, 唔駛規限自己食咩.我點A餐 - $50, 炭燒香茅豬扒飯, 跟熱檸水, 特別要求少飯多菜, 菜係炒椰棻. 豬扒個份量好足夠, 有兩大塊, 好有炭燒香味, 好似去左食BBQ咁, 之不過我完全食唔到有香茅味, 係睇番個MENU先知佢係香茅豬扒, 哈~ 基本上個個都係叫呢個炭燒香茅豬扒飯, 因為真係好好味, 豬扒甜甜地有炭燒香, D肉又唔會好乾, 有好多塊, 非常滿足, 仲有蔥花加乾蔥, 送飯一流. 朋友點了湯檬, 又是另一番風味抵食午餐

每次去親食lunch 都預咗要等位, 雖然要等, 但仍然有好多人排隊, 點解?因為真係幾好食!大叻越式飯併飯(豬扒及雞翼) $54 ~ 豬扒係碎上, 份量都幾多同好有炭燒香, 豬扒肉都幾腍同幾惹味。雞翼係炸過嘅, 皮邊雖然少少硬但雞肉唔乾, 都ok。佢嘅蔥油真係冇得頂撈飯食係一流。炭燒香茅雞扒飯 $50 ~ 雞扒幾大塊雞肉幾嫰滑, 有炭燒香幾惹味, 用嚟墊住雞扒/豬扒嘅椰菜絲都幾好食! 淋埋佢哋嘅秘製鼓油, 又係冇得頂! Lunch係鰂魚涌嚟講, 五十幾元呢個價錢連埋飲品仲要咁大碟, 真係抵食夾大件！