大快樂餐廳

營業中

休息中

晚飯唔知食乜好，諗住去酒樓開餐。因時間關係，又怕酒樓會食得耐，就揀咗呢度食個快飯。坐落屋邨商場，環境與一般茶記無異。但坐位寛濶，坐得舒適。超值套餐都算超值，但不包白飯的。粟米魚肚羹 - 味道正常，魚肚都算足料。魚香茄子 - 差了點咸魚香味，但比坊間的少油，感覺冇咁邪惡！啫啫雞㷛 - 係我食過最騎呢嘅一次，上枱見到個漿粉獻汁就知出事。其實味道冇問題，但呢個version真係接受唔到囉⋯⋯西蘭花魚片 - 魚片嫩滑，西蘭花爽口，做得不錯！椒鹽鮮魷 - 漿粉厚薄適中，炸得乾身，熱辣辣，夠脆口。唔想食連鎖快餐店，呢度不失為一個好選擇！

話說呢間鋪頭平平無奇，一開始吸引我的就是個店名大快樂，唔知噶以為是某連鎖店新版，但是都已經開鋪10+年，點解食物都是甘令人失望，環境就茶餐廳無咩所謂，但是整個格調就比較無食慾，無奈肚仔餓，中午時段只有呢間有位，牢騷少講，正題午餐到選擇是A，雪菜肉絲燜米老老實實的，賣相正常，分量十足，味道得個鹹，除左鹹都是鹹，真是呢，可能鹽唔使錢，可能一鍋大的一齊炒，鹽未散開曬。幾經辛苦先食完一半，飲料就已經清左，無奈埋單走人點知比我見到有工作人員直接手推車兩盤牛腩類去面檔位置，問題就是睇落唔似剛煮好，無蒸汽無肉味，重點是食物無用保鮮類物品包好，都算是奇景！問題來了，其他人無反應，這情況屬於正常情節還是是我過分敏感？反正可能到某一日我唔記得左就會再來食一次掛

唔想煮飯的一晚啲細唔舒服食粥我地2口子就去附近快手食今晚特別想食小菜於是執左呢間「大快樂」叫左個2人餐2個小菜加一煲老火湯夠晒食魚香茄子煲熱辣辣 夠晒惹味「送」飯一流黑椒牛仔骨 唔會過份老分量仲唔少再加埋一大煲湯 呢度老火湯真係唔錯 見到枱枱都一大煲啱晒冇咩湯水嘅人👏🏻👏🏻👏🏻

復活節前嘅午餐，星期日常到哩道食飯，係時候評吓佢。拿拿拿……睇……相先！估唔估倒呢？午餐乜乜蒸肉餅，幫幫眼睇吓見唔見有梅菜？哩道最出名係出人意表，次次有驚喜！係咪好介紹呢？講返個餐，外表清……醇，份量一定食得晒，加埋杯有顏色嘅應該係奶茶，滿意到畀0分。跟住出盡力聞一聞，奈何唔覺提神，0分。味道嘅嘢因人而異，健康算唔算一種呢？有分畀係0。不過附近嘅選擇不多，不相百仲只有更差，都係畀返同情分自己1……大分。最後係哩間店街知巷聞特別之處，阿姐不友善嘅招呼，無法估計不同方位上菜特技表演（例如：飛碟、後襲），真係嚇你一驚。最經典場面係鬧客，見過有次阿伯冇記性落錯單兩次，被追住當衆鬧三次直至阿姐口累為止，哩道好平常。娛樂咁豐富係咪好好介紹呢？想畀負分架，都係算總評：正！正！正！（唔使畀人鬧喎）阿門！十分滿分就畀（會唔會多得滯）

今天幸運地在馬仔方面贏左小小，便決定同媽打、二家姐和姐夫在去開既大快樂餐廳食晚飯....我地簡簡單單叫了三餸一湯，味道感覺如下：蝦仁炒蛋： 蛋夠滑..不錯，蝦亦有蝦味..幾好。例牌雞：雞肉嫩滑，保持水準。菜心炒牛肉：菜心稍為老左小小，牛肉味道唔錯。白菜豆腐魚雲湯：豆腐食落帶點酸味..扣點分，但湯味道是幾好的。

是晚，媽媽興之所至，約我和老公與弟弟一起到大快樂茶餐廳食晚飯。這間茶餐廳是我們經常相約的地方，因為這裹的食物一向水準比較好和穩定。我們選了例牌雞、涼瓜炒抄牛肉、琵琶豆腐、蒸桂花魚和例湯﹝霸黃花﹞。味道如下：例牌雞：每次必叫。是晚水準和以往一樣，能保持幼嫩和有雞味，然而size好似較以前細了一點。涼瓜炒牛肉：味道不錯，但份量很多，食唔晒，需打包回家。琵琶豆腐：魚肉和豆腐混合起來炸，十分之可口，一上枱便聞到一股香脆味。是晚傑出之作。蒸桂花魚：蒸完條魚都仍然滑，唔鞋口，都ok。例湯：味道幾好，霸黃花又夠淋，媽媽很鍾意。整體來說，我們都好滿意。

今晚我和家人一行四人再次光顧這間位於華富村的餐廳...這裡每晚都座無虛席..反映出此處食物都有一定水準... 我地今次叫左個A餐再加多碟菜心抄牛肉...我推介佢地既招牌雞...食落去非常之嫩滑..唔係間間可以做到.....另外，其他小菜同平時一樣都保持佢既穩定水準...最緊要既係這裡飯後有免費糖水供應呢.....

本人口味較偏好扒飯，最鍾意食佢0既香茅豬扒飯,好香。可能本人較少食外面的越南菜，暫時覺得香茅豬扒黎講係佢既招牌菜。其他雞.豬扒飯都好食,覺得水準比一般茶餐廳好。而且凍檸茶調較得甜味剛剛好,不會酸。不過套餐午市比晚市多款及吸引。

同朋友一齊食野,四周都好殘舊.一入門口諗住搵位,點知個waiter已經爆大聲咁講:「唔該借借.」咁我繼續搵位...搵到坐低就揮手叫waiter寫野,點知佢地當我地無到.我地差不多揮左手成十五分鐘,都係冇人理我地.咁我個fd直接行去同佢地講食咩,點知個waiter好唔鋸既樣,重好大聲話「咩話?」好啦...我地都算....值得一讚係上菜速度快.我叫左豬扒腸飯,但點知舊豬扒炸到又硬又黑,腸仔又係咁...我地食左野快d走算..番到屋企已經覺得好肚痛.我出去食左咁多間茶餐廳呢間真係最差既一間.唯一好既就係平.

估唔到呢間咁偏僻既餐廳都有得寫, lunch 肚餓黎呢度食. 地方幾大, 是日午餐係咖哩排骨飯$24, 加凍檸茶加$2.咖哩唔香, 得個滑字, 真係食大家樂好過. 排骨好淡, 多骨. 送碗湯都幾大碗, 一定夠飲.

食晚飯叫個蟹肉雞柳伊麵,水準一流.個做法係首先做個伊麵底,然後做個蟹肉雞柳連獻汁擺係面.蟹肉是用真正的蟹肉,並唔係求其用蟹柳算數o個隻.雞柳雖然係雪藏野,但都做得好滑.個汁就極正,加埋伊麵本身0既味道,兩者極配合.要成$30,算係最貴o既碟頭飯.

大快樂系華富村裡算系最好食的食店,無論碟頭飯或是小菜.而我最喜歡的是時菜斑腩飯.喱D 食店當然食唔到好新鮮的魚.但喱間D魚絕對無怪味,而且還有魚味.大大盒,分量十足.值得推介.

我o係香港仔,大大話話都出埋左廿幾年,原因係...我公公o係到住,而呢間食店,都由佢開到而家我都好多時去食,多數會食晚飯...基本上,佢地既食物質素算係幾穩定,唔會好大上大落!而且無論小菜,抑或碗頭野,都算係幾大碟,料亦都落足...就尋晚,我同屋企人共6個去食,叫左4個小菜;魚香茄子煲--好香口,但就有時有咸魚,有時就冇=.=",沙拉醬爆骨--d肉好林,沙拉亦唔會太酸,佢令我爸爸原本唔餓都食左一碗飯+一碗粥;雜菜煲--真係好多菜,紅燒火腩豆腐煲--d火腩又係好林,有肥肉又唔覺太肥;其他小菜亦有d試過,味道亦係幾好...至於炒粉麵,乾炒濕炒都岩岩好,味道唔會太濃,亦唔太淡,大大碟,兩個人食一碟都得;至於價錢,都算係街坊價,尋晚我地叫左4個小菜,4個飯2個粥,再黎一支可樂,仲送埋糖水(真係煲出黎架!)共$175,每人都係$30左右,都算係抵啦!員工方面,個經理真係幾好,會得閒問下我地既意見,但d亞姐就惡少少啦,但整體都算ok既!其實o係華富村入面亦唔多呢類既食店,酒樓就兩間,但食晚飯既餐廳就唔多,所以佢成日都好多人去!若多人食晚飯,你可以去留位添架^_^!