家家頌餅店

營業中

休息中

家家頌既薄餅只係$4,算平,而且都幾大件,不過真係似包多過似薄餅,個餅底都唔脆,而且個邊又係包,係軟既,料方面,最多份量係切左粒既腸仔,差唔多成個包都係,同埋加左少少洋葱同青辣,反而落左好多好多沙律醬,真係好好好好唔似薄名,應該改錯名...佢只係雜錦腸仔包...

昨天要到附近工作, 所以順便買d包回家.買左個又燒包, 粟米蟹柳包等..我自己就試食左個又燒包, d餡料都幾多又好味唔錯..佢地d麵包平均都係$3.5左右真係抵食...p.s入面d亞姐仲好好人真係唔錯

小牛一向好鍾意食呢度既粟米蟹柳包,反而我就未試過,但係尋日佢買左番黎又唔食,我為左唔好嘥,所以食左佢...嗯...個包算比一般大,長長地形,一個頂住人地兩個,以包為底,上舖餡料,有少少似薄餅包,雖然名為粟米蟹柳包,但係除左有好多粟米同蟹柳(真係算多,無呃人)之外,仲有菇同埋火腿,又真係幾豐富喎,而且仲有少少焗檂左既芝士絲添!而醬方面就用沙律醬,落得都頗多...但係我最唔鍾意係個包好油,有點膩,食完好似飽飽滯滯咁...不過話時話,三個半買到咁豐富既包,真係抵!

估唔到呢度有油餅,而且又做唔到都好好食喎!放耐左都仲有點脆,而且香味真係一流,唔算油,夠晒味,雖然唔係好熱好新鮮果種,但係真係好食!

講真,真係無諗過呢間小店的曲奇餅都得架!只不過上次小牛買左一包13蚊既朱古力曲奇番黎又食唔晒,我咪吞併左佢\囉!結果唔食由自可,一食就停唔到手食晒了!因為實太好味喇!曲奇鬆化之外,上面層朱古力簡直係一流,全完係為曲奇餅生色不少!一包13蚊都有好多件,以佢\美味程度,算抵囉!同埋店員都好NICE好好人,去買野都開心D啦!

不得不讚下呢度個阿姐,真係好鬼nice!有說有笑有傾有講,仲笑臉迎人,親切到震!上次食左個雞批,好正!今次試下豬肉卷,同雞批一樣有個爐暖住,所以係熱辣辣既,一家要趁熱食,好好味!個皮又香又脆,而且好係一d都唔油膩,連豬肉都唔會油又唔肥,兩者配合得好好,好似係4蚊左右,雖然無雞批咁大,但係好味已值回票價!我同時買左個迷你車輪包,學cathie話齋,的確好味又抵食!而家仲係$3.5一大條,我切時以為包面會好硬(因為睇落似會硬),但係食落原來成條都好軟熟,甜甜地(甜度適中,唔係太甜果隻),提子份量亦恰當,食下食下就食晒!好味!

想清清地食下方包,呢度原來好抵!半磅連皮方包只係$2.5,一共有四片,而切皮都只係加$0.5…當我想買連皮方包既時候,個老闆娘就真係識得做生意,立即介紹我食連皮營養麥方包,因為都只係$3半磅,又係四片,而一磅仲做特價$5.5!咁我見麥好似健康些,咪買左番去囉!都唔錯喎!同有品牌既唔差得好軟,夾芝士食好好味!絕對食得過呀!另外,服務態度都好好,店員好nice!

家家頌對面o岩o岩開左間新派麵包店, 叫做澳爾瑪, 搶左佢地好多生意. 新麵包舖d 麵包都有別於傳統, 如"紫米豆沙包", "紫米吐司", 講真, 食落味道同普通o既無乜分別, 但係勝在麵包鬆軟, 而且流量大, 成日都有麵包出爐. o岩o岩試左個紫米麻薯包, 本以為裡面有mochi, 原來係蕃薯包. 蕃薯無味, 但係包身好軟, 下次都係食豆沙包好d!

o岩o岩試左呢度o既迷你車輪包, $3.5. 雖然話係迷你, 但係都,8吋長.個包出面脆身, 裡面香軟, 好味抵食!

尋日去左呢間街坊麵包舖買早餐. 眼見對面街o既餅店all day八折,但係就乏人問津, 相反呢間全日鐵價不二,反而依然人流不絕, 我諗如果唔係對面o個間太難食,就係呢間有過人之處.用$4買左條提子條食. 欣賞佢係用麵包做,唔係用丹麥酥條. 試過食過o個d"提子丹麥條",用左過多牛油做個酥條,結果不特止好膩,仲攪到個提子條又鹹又甜,好怪!個麵包包底質素唔錯,略濕,微甜,相信佢個甜餐包同提子餐包都會唔錯! 不過就少左d提子乾,食左成條數埋都唔夠十粒!個包都幾大個,又粗又長,仲重過兩個菠蘿包(咁o岩媽咪買左兩個菠蘿包,所以用呢樣做標準!)