廣發茶餐廳

營業中

休息中

尋日(9-11-2013 Sat)晏晝,男友收工後過o黎,問我想食咩o野,佢買o黎食.我想試吓朝早唔開o既冠華粉麵.就約男友o黎,我o地差唔多1:00pm,但都未開門,咁拉男友去威利啦,點知佢話佢朝早已經食o左.咁…就隔離呢間啦. =.=”行返轉頭時,見冠華o既老闆開閘,試唔試呢?男友話都係唔好喇,佢應該未set up啦.最後都係決定呢間.我要$33.00o既日式叉燒雪菜喇沙,飲熱好立克.男友要$37.00o既卡邦尼焗龍利柳飯,飲凍檸樂,要加$5.00.Order完後,兩杯o野飲先到.我o既熱好立克只加一茶匙糖就夠.然後男友o既卡邦尼焗龍利柳飯到o黎, 重快過我o既喇沙o既?睇睇個飯,我覺得啲汁唔夠,食到底時應該會唔多好食,而勺起魚柳o黎睇,白雪雪o既飯就只係有啲蛋o係o度.之後我o既日式叉燒雪菜喇沙o黎到,碗已經唔大,勺o黎睇吓,原來米線係好少,湯就好多. 好喇,開餐,喇沙係香但辣o左啲,日式叉燒係來貨,雖然瘦但鬆軟.呢個整體唔錯,但冇咁辣會好啲.我又試吓男友o既卡邦尼焗龍利柳飯,魚柳滑唔鯹,而飯呢,竟然惹味,應該落o左雞湯煮吧,而卡邦尼汁味道o岩o岩好,好味.估唔到呢個賣相一般

今(1-9-2013 Sun)朝同男友起身後食早餐去,今次o黎呢間,我o地坐低後,叫o左同為$23.00o既早餐,男友要沙爹牛肉公仔麵,西煎雙蛋,牛油方包,加$2.00要凍檸茶少甜,我要吉列魚柳,珍寶腸,加$2.00將牛油方包轉為牛油多士,再加$2.00要凍奶茶.好快,兩杯o野飲同沙爹牛肉公仔麵到o黎,我杯凍奶茶質地幾滑,奶味唔太重,相對起淡淡o既茶味比較出啲.男友o既凍檸茶少甜呢,佢話好似冇少甜到.而沙爹牛肉公仔麵呢,顏色好深,我嗅到幾香,男友讚好食,因為味道好濃.然後我o既吉列魚柳,珍寶腸配牛油多士到o黎,件牛油多士係厚多士,沙律醬大大pat,吉列魚柳大大件,我以為係吉列豬扒.開餐喇.先食吉列魚柳,好熱呀!味道都正常冇乜o野啦,珍寶腸來貨都幾鹹,一般吧.而牛油厚多士呢,睇顏色就知烘得o岩o岩好,牛油熔晒o係裡面,覺得少o左啲,但口感唔錯.而男友o既西煎雙蛋配牛油方包呢,方包內o既牛油相對多啲,口感味道都正常.西煎雙蛋係半生熟,亦OK.價錢:侍應好似加少o左$2.00,兩個餐都係$25.00.

尋日(30-6-2013 Sun)朝同男友起身後肚餓搵o野食,男友話食呢間,我o地o黎到都11點,o岩o岩有卡位坐,男友揀$33.00o既雞髀喇沙,加$2.00要凍檸茶少甜,我要$33.00o既乾炒沙爹牛肉意粉,飲熱華田.冇耐,o野飲到o黎,我杯華田味道濃濃,唔錯.之後男友o既雞髀喇沙到o黎,影好相食喇,呢個有濃郁香茅味,有少少辣,米線有啲彈牙,雞髀係蜜汁,肉質軟滑.然後我o既乾炒沙爹牛肉意粉到o黎,唔係好大碟,牛肉幾多,不過有少少炒過龍,沙爹味淡o左少少,鹹度夠,只係鑊氣唔太夠,但都算唔錯.其他:呢o度o既麻油係任你自己加o既.

尋日(12-5-2013 Sun)母親節,男友話去我媽媽o既永久居所懷念佢一翻,我o地起身梳洗後,先食個早餐.想去冠華粥品,但未開門,佢o地唔做早市定係o係假日唔做早市?於是o黎隔離呢間,我o地入到o黎o岩o岩每張枱都坐晒人,於是先住其中一張卡位o既一邊.女侍應好快上前問我o地要咩o野食?其實我o地都未睇有咩o野早餐食,佢就介紹男友有麵呀,牛油方包呀咁,我就冇聽清楚.男友就要o左沙爹牛肉餐肉麵,飲凍奶茶.我就睇到牆上o既早餐牌,全部$23.00,要B餐,有牛油方包,煎雙蛋配珍寶腸,要熱奶茶,但叫完後睇到C餐有豬扒或吉列魚柳,不禁話有豬扒o架?佢答係呀,咁要豬扒同珍寶腸啦.啊,好吖,唔該晒.睇睇張單,係23+25,即係男友o既都係$23.00,凍飲加$2.00.之後我o地o既o野飲到o黎,冇耐對面o既顧客食完走人,我o地就要晒成張卡位o勒.而男友o既早餐都到晒,我先飲我o既熱奶茶,茶味都係唔多夠,不過飲到最底係有啲苦澀味.男友o既麵係光麵,沙爹牛肉夠腍同沙爹味好夠濃.而我o個份等o左好耐至到,睇睇,豬扒同珍寶腸都係炸o既,而珍寶腸唔係只得半條,唔錯.好,食喇,炸o既珍寶腸對味道有啲影響,

入去啱岩有卡位,叫咗2個下午茶餐,炸豬排+薯條,炸魚柳+薯條,正!!!食物來到仲係熱辣辣,脆卜卜,雖然下午茶時間,但都差唔多坐滿,D侍應都好好招呼, 裝修咁多年都無乜點變 ,好懷舊

今日去食早餐...塊多士無搽牛油...跟住叫伙計幫我搽番...廚房果個唔知嫌煩定咩事...將塊多士搽勁多勁多勁多,仲勁過波蘿油d牛油,,,多到塊多士跟本就食唔到...跟住個老闆仲不知所謂...見到都扮見唔到....過分過分過分..加多士仲要加2蚊....d伙計話個廚房心情唔好但都唔可以搵客人發脾氣囉...

今日(25-2-09Wed)同男友諗去邊o度食早餐,都係茶餐廳,好耐冇o黎呢間喇,睇睇先.啊,呢o度早餐平過江記啲啲,而且既有通粉,又有牛油方包,於是我叫o左$19.00o既早餐A,有牛油方包,煎雙蛋,我改炒蛋,火腿通粉,要熱奶茶.男友就要o左都係$19.00o既早餐,係牛油方包,豬扒配珍寶腸同熱奶茶.好快,我o既火腿通粉同兩杯奶茶到o黎.先食通粉,好似有少少唔知咩味,火腿份量唔算少.然後我o既牛油方包炒蛋到o黎,但點解無端端會變o左餐包o既?我都冇叫改.炒蛋冇落鹽,咁我自己落啦,點知個鹽盎塞住o左,要自己用牙簽拮返開佢,乜冇客人要加鹽o既咩?牛油餐包大大個,食得好飽.而奶茶呢,好過江記有茶味,但仍唔夠濃囉,乜奶茶真係好難沖到o岩味咩?自己讀書時都沖到同大家樂o既一樣啦,真係唔明.而男友o既豬扒同珍寶腸都到o黎,我都試少少,我覺得鹹o左啲,但都好可口.環境:呢o度開o左好耐啦,裝修冇變過,所以有啲舊.

我幾乎每日都食ga，佢d早餐真係好好食，尤其佢早餐既多士，不過要加錢，但係我都覺得好食，環境亦都算唔錯，佢係我響石圍角既最好選擇。

啲侍應幾好但個老闆..態度真係好差好差..人地食19蚊野.比張20蚊佢.佢會飛返個一蚊比個客...好似睇唔起人咁野食又細又小....有小小呃錢成份..但個老闆既服務就唔係幾好!!!

每當下午茶時間, 廣發便會有特餐供應火退奄列+ 腸仔+ 特厚牛油多士豬扒或雞扒雞中翼出前一丁多士鬆化, 牛油洽到好處. 豬扒很大份, 雞扒則炸得則好, 雞皮還是脆的, 只是雞中翼則沒多少顏色, 看上去沒多少食慾

一定要試