意樂餐廳 (海富商場)

營業中

休息中

由於住附近，所以成日都會去itamomo食飯。多數都係等佢下午茶先去食，因為價錢抵好多，又大碟，夠曬飽，可以飽到去夜晚。平時食就食開炒雞粒飯同鴨胸辣意粉。炒飯質素次次都差唔多，不過略顯油左少少。意粉就一時好多汁，一時比較多，不過味道都keep到嘅。野飲嘅話，覺得熱奶茶最掂，因為無論凍奶茶定凍檸茶都偏甜，但一叫小甜啲味就怪怪地，所以嗌返熱飲最無死。以依個價錢黎講，係個區算不錯。不過有時真係舉好耐手都無人黎serve，搞到好多人都等到燥，不過情況最近都有改善嘅。

放假同呀仔學完游水 又係搵地方醫肚嘅時候 基於牙仔唔鍾意食飯 所以出親嚟多數都係食意粉或者中式粉面 今日呀仔無啦啦話想食長通粉 我淨係諗到附近得意樂呢間餐廳有得食 於是就嗱嗱聲去咗餐廳拿位 因為係假期 12點左右 估到一定要大排長龍 好在到最後咪等左15分鐘就有得入座Menu 都算好多野食揀 而且多元化 實揀到啱食嘅野 呀仔揀咗個卡邦尼長通粉 唔知係咪因為太多人嘅原因 個長通粉10得唔夠淋 食落去仲有少少硬硬嘅感覺 口感一般 但味道又唔錯喎 個卡邦尼汁 唔算好漏 而且忌廉味好夠 但略嫌份量有啲小 個仔食完都話仲好肚餓 另外我叫咗個鴛鴦汁吞拿魚焗長通粉 長通粉都係一樣10得唔夠淋 如果可以10多2分鐘件事應該好好多 如圖所見 個樣都幾靚仔 啲汁好夠芝士好多 吞拿魚都係普通罐頭鹽水吞拿魚 基本上沒有難食的理由 最後我最鍾意呢間餐廳嘅一個原因係 要飲一杯涷檸檬柑橘蜜都係加$3咋 好多餐廳呢杯野都叫特飲要加成8蚊㗎最少總結 間餐廳都算係咁啦 環境裝修都唔錯 坐得又闊落 價錢適中 好適合帶小朋友嚟食

旺角食到無嘢好食咁，行咗去奧運站附近嘅海富商場餐廳裝修帶點工業風，環境唔錯，坐得幾舒服，唔會覺得好迫食物嘅選擇都幾多元化，有拉麵、意粉、飯、長通粉、PIZZA等等，仲有小食同甜品有選擇困難症嘅朋友仔嚟食都幾痛苦，因為太多選擇，唔知食咩好男朋友叫咗個雜扒餐配飯（野菌汁），我就是但叫咗個蟹籽炒飯炒飯不過不失，一個人食都幾飽，份量都唔少個雜扒餐好足份量，有扒、腸、薯條同飯一上菜，waiter好好咁問我地要唔要淋埋汁野菌汁好香，好好味，值得一試啲扒都好夠厚，食落又唔會好柴，雞扒好Juicy，配埋汁又真係幾好唯一要彈嘅係個飯，唔明點解係炒飯，好奇怪不過，間餐廳整體都唔錯，唔會趕住收工就趕你走，可以坐低慢慢食傾下計下次都會再去，試下其他嘢食

今日係附近探朋友, 朋友話依間餐廳早餐時段去到11點半, 又幾好食, 咁就一於試下!差唔多11點去到, 門口都有幾枱人等緊位, 不過5分鐘倒已經入得啦。Menu款式都幾多, 有粉麵有三文治有全日早餐。蕃茄濃湯漢堡扒流心蛋扁意粉, 送熱飲。蕃茄湯真係夠濃夠熱, 亦有蕃茄蓉係入面, 至於流心蛋呢, 哩間餐廳有個牌特別介紹話係用煎焗既方法去整, 標榜少油d健康d, 三十零蚊算有誠意! 另外+$3加既蒜香牛油多士, 烘得夠脆又唔會燶, 不過略嫌蒜蓉牛油唔夠多, 但只係3蚊我就認為抵加比佢既。依個餐total 35蚊, 哩個質素泥講真係不錯!

在油麻地做完嘢，已經2點，便在附近的食肆食午飯才離開。行入海富商場，見到意樂餐廳(Itamomo)，便入去試試。它嘅裝修簡單而有特色，用水泥做牆，木板做櫈，座位濶落，感覺舒服。打開下午茶餐牌，驚訝其選擇之多。它的下午茶由2點開始到6點，啱啱好！我選了西西里式鮮茄烤豬排焗珍珠飯（$35-），這個價錢還包一杯熱飲，超抵！焗飯放在一吋厚的焗盤內，上枱時還熱辣辣的。除咗豬排（已切開一條條），還有好多蔬菜，如蕃茄丶椰菜丶矮瓜丶洋蔥及西芹，能平衡芝士的肥膩感。豬排也很滑及林，雖然估計有落鬆肉粉，但不太多便算。豬排及伴菜炒得香口，加埋蕃茄及少少芝士焗，又香又美味！😋😋😋最後連杯奶茶也是水凖之上，濃淡恰宜，正！👍🏻👍🏻👍🏻

我好鍾意意樂嘅忌廉天使麵平時都會間唔中嚟食下🙆🏻🙆🏻尤其係下午茶真係又平又抵食🤗🤗🤗因爲份量係一樣冇少到㗎👍🏻👍🏻不過今次係夜晚嚟食又嗌咗我最鍾意嘅鮮蜆蒜香煙肉忌廉天使麵 🤓🤓😎🍝鮮蜆蒜香煙肉忌廉天使麵 $52 (飲品半價 凍檸茶$10)上枱已經有好多忌廉汁包圍住天使麵 蜆肉好鮮甜唔乾 仲有啲菇🍄同煙肉粒🥓做配料 天使麵好幼滑 忌廉味濃郁 汁底較liquid 每食一啖都有濃濃嘅忌廉味😇😇

今日朝早想食翻個早餐補充元氣，相以朝早就相約左友人嚟意樂食早餐試完之後，我覺得意大利蕃茄濃湯都幾好食，值得一試！因為想食得健康啲，所以我就揀咗自選雙拼番茄意大利濃湯系列嘅鮮野菌同埋太陽蛋。首先係個通粉唔會太𣺉，都算有返啲咬口。蕃茄湯真係好好飲！佢濃味得嚟又唔會過鹹，好清楚咁係個湯入面試到蕃茄嘅甜酸，大家有機會可以一試！我覺得佢啲鮮野菌係all day breakfast 入面焗過、比較乾身嘅菇，一放落口就有好香嘅蘑菇味之後個煎焗太陽蛋都很不錯。蛋白經過煎焗好香口，而蛋黃亦係好完美嘅流心，同埋佢話以少油去戰局呢款太陽蛋，所以都會用少咗啲油，睇落就更加健康啦最後係咖啡，放落口都幾香醇，唔會「鞋」口，簡直係早晨醒神之選！

今天來到意樂晚餐，連鎖式的經營坐落於屋村中，店內不乏是一家幾口子的飯堂。二人點了鮮蜆蒜香忌廉天使麵、飛魚籽三文魚蛋炒珍珠飯，再多點熱檸檬茉莉花茶。食物還未上枱，單看盤中的餐具也有兩隻叉有殘留飯跡，令人失望😞先來的是鮮蜆蒜香忌廉天使麵，吃不出、嗅不到的蒜，一點也帶不出絲毫香味；蜆挺多的，但怎吃也察覺不出鮮味，若以蜆肉忌廉天使麵為題，則更為適合。反之飛魚籽三文魚蛋炒珍珠飯則為喜出望外，魚籽脆彈、三文魚與飯相配，以$50來說超值優惠。

今日係大除夕，人人都開開心心準備過年。我地都唔例外，為左新年期間食好野留返Quota，午餐諗住食平DD,就揀左食意樂。慢煮咖哩牛腩飯（$51）配合今天的心情，揀左個慢煮咖哩牛腩飯。用金屬煲上的咖哩份量和熱度都十足！牛腩用慢火炆到好淋好入味，咖哩辣度適中，既辛且辣香味濃郁。最愛係個辣薯仔，連埋薯皮一齊煮，用匙羹一督，入面金黃色的薯仔，愛黎撈飯非常正。飯係用日本珍珠米，粒粒精瑩剔透，口感煙韌。難得大除夕前夕都食到咁令人愜意的午餐，為今年畫上完美的休止符。

又發掘到一間堅係唔錯嘅平民貼地西餐廳, 以後喺屋企附近食嘢, 可以多一個好選擇。呢度環境、裝修都唔錯, 地方好大下, 有足夠嘅座位, 坐得好舒服。設計屬於工業風格, 有品味, 媲美大餐廳。有足夠嘅侍應, 所以招呼尚算可以。午餐餐牌選擇非常多, 以唔同嘅種類分類, 都有好幾頁, 都算應有盡有, 而且豐儉由人, 大概由四十幾蚊至過百蚊不等。其中一個嗌咗一份<脆脆炸魚柳伴鮮野菌蒜蓉汁珍珠飯>, 魚柳及飯都非常好味, 如果汁嘅味道就好特別, 都係唔錯嘅。擺碟、賣相就差啲。放棄一個餐飲, 改為要咗個「白湯」, 其實即是<忌廉湯>, 但這個忌廉湯非常非常好飲, 內裏有甘筍 、有蘑菇、又有粟米, 好有心機, 煮得好好味。另外一份叫咗 <西西里式鮮茄烤豬扒焗珍珠飯> 同樣, 個汁、芝士、珍珠飯, 都非常出色好味, 味道好特別, 好高水準。芝士嘅味道及口感, 令人難忘!! 其實豬扒都唔錯, 但只係薄咗啲。內裏的配菜其中有兩片焗矮瓜, 好好味!另外加咗個小食就係<柚子蜜味芝麻烤雞翼> 都好好味, 及好特別。<熱奶茶> 係唔錯嘅

今早去海富苑食早餐🥣。熟蛋配漢堡扒意大利蕃茄濃湯扁意粉配熱檸檬茶$31。餐肉熟蛋意大利蕃茄濃湯米粉配熱檸檬茶$30。無糖鮮奶燕麥片、煎焗流心蛋、蒜香牛油多士配熱奶茶$30。熟蛋配漢堡扒意大利蕃茄濃湯扁意粉：湯底濃郁，漢堡扒美味。餐肉熟蛋意大利蕃茄濃湯米粉：湯底濃郁，餐肉大塊。無糖鮮奶燕麥片、煎焗流心蛋、蒜香牛油多士：好味。

諗住食小小嘢，跟住去大角咀番夜校。點知道行入去睇到呢間啲下午茶都唔錯喎，即刻揾個位坐低先，可能係下午茶尾嘅時間，唔算太多人。叫咗個蛋黃卡邦尼長通粉，再加埋杯Hot嘅磨咖啡。個環境都算唔錯，感覺幾好，又唔係太嘈。啲嘢食終於到啦，先黎杯Hot嘅即磨咖啡，嘩......咁大杯嘅(好抵飲吖)， 我仲喺度諗？呢杯係咪即磨㗎，飲落都幾香。啲嘢食黎啦，嘩.......又咁大碟嘅，下午茶咋喎，搞到成個晚餐咁，食落又幾好味喎。當然果晚都無咗食晚飯啦，呢餐真係勁抵食嘅下午茶。

一早起床有點餓，快快更衣到樓下餐廳買早餐吃，位於海富苑商場，早上人流比較多，但職員動作也很快。我點了一份漢堡扒熟蛋扁意粉配意大利蕃茄濃湯，熱檸茶，蕃茄湯味道不錯，不太酸不太甜，味道蠻清新。

呢間野真係好奇怪，明明D野一D都唔好食，但總係有班學生哥會係出面等住食，不過可能該地區真係無咩選擇，大家又覺得佢餐單選擇幾多，諗唔到食咩個陣又會入去中一次伏。位置位於屋邨商場，因此餐廳食客多為附近住客。店內衛生差，成日有烏蠅嬲住價錢黎講係幾合理，地方又幾闊落，環境舒適。最常食佢個雞扒同流心蛋意大利蕃茄濃湯天使麵，加蒜香牛油多士，流心的蛋黃賣相麻麻，食落還可以，蛋白蛋黃比例OK，勉強合格。整體黎講，黎食cheap野唔抱任何期望就岩，當普通快餐店水準啦。

意樂餐廳沒有流心蛋嘅時候我惟有食菇菌喇！今個午餐我叫了蕃茄湯流心蛋鮮菇天使麵，當時沒有留意好彩我一向喜愛手機食先才發現🧐流心蛋不見了，☹️天使麵好鞋口沒有評論，跟餐仲有片蒜香牛油多士及餐飲一杯。$42和風蟹柳蟹籽珍珠炒飯跟餐飲 $51太美的名字了，米就係蟹柳炒飯加小許蟹籽炒飯，不過都炒得香口乾身，算不錯！九州叉燒豬骨濃湯烏冬連餐飲一杯 $47港式茶餐廳獨特口味。午市套餐