新南興潮式粉麵

營業中

休息中

食物味道一般，同其他同類店舖冇咩大大差別：牛腩味道正正常常，好肥。牛肚牛雜有少少異味，湯底味道尚可，少少偏鹹。河粉質素比同類差少少，唔彈牙同唔香。價錢正常。凍飲加8蚊同埋好難飲。優點係上菜速度好快，位置都好方便，附近得佢呢一間做牛腩。但食過幾次發現佢哋衛生有好大問題：切嘢嗰個人唔帶手套週圍摸再摸牛肉，收銀嗰個摸完錢手指公浸湯，經常有老鼠出沒，仲見過有一次隔離枱食左兩啖發現上錯，個店員直接將食過嘅嗰碗嘢畀咗另一枱，實在有啲誇張。

呢間好似係新開嘅麵店，入去坐低見佢有每日限量供應嘅牛坑腩，問侍應姐姐佢竟然話仲有，就梗係要試吓啦，三層口感三層滋味，最底層牛坑位置比較煙靭爽口，中間牛腩部份炆得夠腍，而且幾入味，最頂層嘅脂肪梗係有牛油香啦，好彩佢脂肪只係佔好少，一層薄薄咁樣。以$45一碗牛坑腩粗麵嚟講，佢啲牛坑腩都幾闊佬，俾得幾多，而且佢個味道調教得幾好，唔會太鹹，唔使食完係咁飲水。另外叫多碟油菜，好似係加咗$12 ，簡簡單單一餐。

因為工作關係路經鰂魚涌，因為唔想食咁飽所以諗住食碗麵就ok，於是就衝入去呢間潮州麵舖坐低食碗麵，味道唔錯，感覺上冇乜味精，難得。我個friend就叫咗牛雜河，我偷咗佢一兩舊嚟食，啲牛雜煮得幾入味，而且一啲都唔韌，我覺得最正係佢哋嘅牛肚，又彈牙又爽口，另一重點係佢嘅份量都幾多。我就叫咗碗豬手粗麵，隻豬手好有彈性，充滿骨膠原feel，不過就唔係好入味，如果煮耐啲可能會味道更好。加咗碟油菜，畀想像中大碟。