明記食店

營業中

休息中

其實觀塘廣場很多小店都有幫襯過的, 尤其係地下果兩檔車仔麵都係非常有水準的, 而且餸菜選擇十分多, 也非常好味。自從 "國泰車仔麵" 執左, 現在只淨返呢一間, 中午一定圍滿買外賣的人群。以前廣場地下大堂全是餐枱及餐椅, 供兩間車仔麵店及一間燒臘飯店的食客用的。但不知由何時開始, 所有餐枱椅都被清走了。顧客多數只能買外賣返 office 食了。唔介意坐迫少少, 可以坐旁邊臨時搭建的一個小角落, 內放了四張枱加椅子, 但很迫。我寧願坐返出面 bar 枱。起碼可以看到老板娘快速淥麵及灼菜, 手勢純熟又快手!這兒有上海麵可以揀, 我要左 3 餸 ($35):兩份秘製排骨一份灼西洋菜西洋菜又香又嫩, 份量不少。排骨是豬軟骨的部份, 可以清楚見到排骨上面白色及半透明狀態的骨, 不算很淋但已經煮得軟身, 可以連骨一起吃了。兩份排骨, 份量是四大塊, 很滿足哩!雖然要坐 bar 枱, 比較不舒服, 但為了一碗美味車仔麵, 間唔中 Ok 啦。支持小店, 還會再來的。

中學時期同同學成日都食明記車仔麵！就算去同學屋企玩都會叫呢間既外賣！最鐘意食油麵加腩汁！豬皮同豬紅一定要次次都咁叫，好少食其他餸！不過果陣唔識打食評！今天趁住聖誕假期、又好耐無食過！便到官塘商場行下，順便食這間車仔麵店！我大約一點多來到、幾多人！剛好有位置、便先坐下！放下報紙霸位！再到出面排隊買野食！都兩年無食，價錢當然會調整！本來三餸一麵連飲品$26今天兩餸一麵是$32 連飲品就要成$40 了我選擇油麵（個人認為識食一定食油麵）配豬紅及豬皮....至於我吃得比較重口味！我加了腩汁和少辣！豬皮頗入味的， 爽口豬紅是軟綿綿一咬就散掉！不夠實質咁好吃！油麵頗好吃的，份量很多！湯底裏略嫌太淡，辣汁不夠，加了點辣椒油！但是辣椒油不太好吃！腩汁應該再多一點吧！

午餐時間想食一哥燒味，但是滿坐見到隔離明記同事話想試下，所以同佢入左去食呢度既裝修好簡單，兩邊既牆都貼左餐牌..除左牆有餐牌之外，每張枱都設有餐牌架！張枱望落都幾乾淨既，仲有啲醬料，筷子，匙羹同牙籤係枱！餐牌都簡潔易明，主要食車仔麵，牛腩，可以配河粉，米粉同埋粗幼麵，或者公仔麵入㠪題我揀左上湯牛肋腩麵同事叫餐肉魚皮餃公仔麵.牛腩牛筋既量適中。啲牛筋都係幾爽，軟硬適中！牛腩有4舊左右，但鹹咗少少碗麵的確好爽口不過湯好鹹食完仲一路好口渴，我估落左好多味精喺入面連埋杯咖啡成四十元唔明點解啲人咁鍾意去，又貴又唔好食，附近有好多野好食過佢

觀塘廣場地下是一個小小的飲食天地真的很多細店食肆集中！燒味飯，車仔麵擋，雲吞麵擋，平價壽司店，小食店等等！是日一早去官塘 寫字樓交收文件...就在官塘廣場路過明記順便食過早餐先！叫咗個紅腸芝士腸車仔麵同凍咖啡很快手等不到五分鐘全部到齊賣相普普通通，，試試麵的口感，又並不是想像中的彈牙....。 但是卻是爽口滑嫰，而且也沒有鹼水的味道，蛋香十足而這個車仔麵湯底不是濃, 但總算是有點味道果種. 不過自己加點辣油都可以, 紅腸是煎過再放湯的, 味道特別的香口. 芝士腸是脆皮的.有芝士流出來.食完夠溫飽, 充滿力量後.肥佬又開始忙碌的外勤工作了⋯⋯

觀塘廣場多野食，是日星期日黎到，開門的只有兩三間，在燒味同車仔麵之間選了車仔麵，一樣好多人，一樣要搭台。兩餸$29，三餸$35，四餸$41，五餸$47。我選了四餸米線，豬排，豬軟骨，貢丸，蘿蔔。湯底是清湯加辣汁，不太辣，湯底有味精，食完勁飲水，豬排香茅醃，煎到乾身，但幾香，豬軟骨入味，兩大舊，份量都多，蘿蔔切到大舊，但有渣，刨得不夠深。貢丸是著通雪藏丸，米線彈牙，不錯👍加$8一杯豆漿，共$49。

返寫字樓既打工仔要擅用lunch time做私人事，好多時都會揀食個快飯~有時去開觀塘工廠拎集運既貨，我就會係附近食個車仔面，我幫襯開明記既鐘意佢地既原因係啲姐姐手腳好快，只要你話佢地知要咩麵咩餸，佢地三兩下手勢已經裝好，收銀阿哥更加唔洗講，收銀快+唔會出錯之外，仲好細心有一次我病左戴住口罩買麵，姐姐問我要唔要辣，我都未應，收銀哥哥已經話"佢病啊"，隨即問我"唔要辣啦可?"。我食到既唔係麵，而係一份人情味誠意推薦大家叫"菜甫蛋"，因為唔係間間都有呢個餸，香茅雞翼都好好味，因為炸過所以好香，即使擺凍左亦都好食~

好耐無食車仔麵啦！！車仔麵亦係香港人喜愛嘅美食之一, 又快, 又方便, 又多款式選擇, 又划算！！一舉幾得, 所以咁受歡迎！！今日去觀塘廣場嗰間明記食店買番公司食先！！因為如果係嗰到食多數要同人搭枱！！我最吾鍾意呀！！不如買番公司慢慢歎！！明記係我心水嘅車仔麵之一！！有成六十幾款餸揀, 麵底都有十款選擇！！仲要超抵食！！一麵兩餸$27, 三餸$33, 四餸$39同五餸$45, 我叫左菜心, 香茅炸鷄翼同香茅炸豬扒, 我覺得鷄翼同豬扒係嗰度嘅代表作！！兩者都炸得很香脆, 但食落又很肥美嫩口, 絕對吾會乾BB！！仲好有香茅香味！！鷄翼肥美大隻, 豬扒都肥瘦參半, 仲有骨連住, 成日接着炸起, 所以先可以保持住佢哋嘅香脆！！新鲜！！麵底我揀左上海麵, 因為出面好難有得食！！湯底我必要求加秘製辣汁, 辣勁十足, 令本來平平無奇嘅湯底, 變得出奇地好惹味, 麵都未食晒但湯巳飲清乾！！

今日約左班FD係觀塘BOOK左間PARTY ROOM玩CARD GAME，本身約左3點，但係上面係冇野食，所以要自己帶野食上去，但我已經遲到啦，所以一出地就衝左去觀廣睇下有咩快靚正!! 一入到觀廣已經見到2間車仔麪店，我都係求其一間，就揀左呢間明記食店。車仔麪3餸$33，超多餸揀，眼望餐牌起碼有40個餸，超誇張，因為太趕時間都冇嘜點諗，同埋姐姐都好忙下，我都係望住個玻璃見到咩餸就叫，叫左個米粉，牛腩，豬耳，紅腸，少辣! 雖然係外賣，但係拎到去PARTY ROOM都仲有好多湯!!冇發漲晒，同埋KEEP到個熱度。個湯底唔錯，加左腩汁同埋辣魚旦既汁。我第一次車仔麪食豬耳，都唔錯!!唔係度度都有得叫，好爽口!!成個車仔米都好好味!好羡慕啲觀塘友，成日都可以食咁平靚正既車仔麪!!

是日去朋友party room玩，求其買個外賣食，本來打算食吉野家既牛肉飯，點知未夠鐘下午茶，咁就轉買車仔麵之前朋友帶我食隔離檔，但作為女孩子都覺得唔夠飽，咁呢次就試下明記，明記簡單d...3餸31，外賣再加一好多野揀，最後選擇左河粉（河粉只愛幼河粉）加3餸蘿蔔~有3大舊，係3大舊，唔係切粒架，食落無渣，好清甜牛肚~呢個就麻麻地，感覺就係未夠入味魚餅~見新鮮炸起，應該唔錯！但我唔記得左我係外賣，拎到返去已經唔香口，都好既，感覺無感熱氣

今日晏到5 點先食飯，諗住求其塞少少野入肚，食車仔麵都無期望，但都唔係咁離譜嘛！？我叫左4個餸加油麵，豆腐干同紅腸浸一浸湯都無理由係凍卦？呢樣都算！齋唔熱我都當正常（算）！|€€]^}^<*+|€}€#*%~%{><¥~€<€€<£<€~ 重點黎喇！「豬扒收左我$6！但係得一條無哂肉既骨+2 粒手指公指甲咁大既肉！」我問阿姐，佢理直氣壯同我講：「係咁架啦！」我只好同佢講：「咁你都唔駛旨意我會黎第二次！」

一年加一次價，成為指定動作，不過我由佢好差水準食到佢而家我差不多日日食，已經有好大進步雖然貴左，但係都尚算公道嘅價錢，其實而家觀塘食飯真係唔平，所以呢度嘅價錢都其實可以接受，食物質素方面，因為掛住食唔記得影相（所以冇圖片）不過依然可以介紹吓，豬大腸(夠林夠入味，正😋）滷水雞中翼（一般，感覺上太早食嘅都係隔夜），豬手(啱啱新鮮纹出嚟，味道好好），香茅豬扒（呢個都真係必食推介呀，夠晒香，又夠大大件）

今晚真要六點準時放工，老遠由葵芳站坐地鐵去到觀塘，因為約左下場去studio配音，急急腳行去觀塘廣場附近，睇下時間只剩得三十分比我速食個晚餐，跳入去觀塘廣場隨便找一間多小小人食嘅小店光顧行到店面前時，店員用很友善嘅方式介紹有什麼車仔餸，聽店員説話口音不太準，兩人看似泰國人～簡單點了三個餸車仔麵，再叫店員姐姐加辣汁，她也隨意落了些給我一個商場嘅地面，沒什麼高雅裝修，也沒什麼高雅坐位，只是簡單放置幾張圓接枱及膠櫈，便成為了一般平民的速食飯堂，可能他們也趕著去當天的晚場而同枱食飯，每每也不斷低著頭一口一口的將食物快速放入肚裏，填飽後就繼續上路，食物嘅質素也應沒太理會吧～車仔麵 - 食物方面質素一般，湯味剛好配上辣汁野味很多，蘿蔔三大舊，香甜又腍又入味，好食嘅豬扒就非常一般，外皮比較硬，炸漿炸得耐凍左使外皮乾固，無咩肉汁及肉味另外個幼麵就好似泰式幼麵質地，個麵蕊比較硬有'骨'唔太習慣，不過整體也可接受，最後也將全部食物順利放入肚內，速食成功，繼續作戰

午餐時間周圍都人山人海無論係大型連鎖快餐店還是小本經營的粥粉麵檔都大排長龍～而我就至中意食粉麪所以就喺“明記”買左碗牛腩米線返公司食～平時我至中意食牛什米或河因有時D牛腩過腍唔好食但今日呢碗幾正牛腩腍而入味，口感唔錯，米線軟硬適中，而湯底味道剛好，非常可口

寒流下細雨紛紛, 當日真係凍到震騰騰.途經開源道, 就衝左入觀塘廣場諗住食碗麵暖吓身. 睇到商場可以俾呢幾間小店擺D枱櫈出黎俾佢地做生意, 實在抵讚. 行吓行吓見到呢間主打車仔麵的明記食店. 有個姐姐夾緊D餸俾自己做LUNCH, 我就好放心咁去幫襯, 因為我好相信一間食店的員工會食番自己整的食物的話, 即使味道未必一定好好, 但至少一定乾淨. 我揀左兩餸麵. 我好鍾意個湯, 清清地, 真係無味精. 一個餸係菜甫煎蛋. 一睇個樣就知道係出自師奶之手, 實實在在無花巧野, 有蛋味, 油香, 配上菜甫, 充滿返左屋企食飯的意味. 另一個餸係炒椰菜, 椰菜炒得很香, 火喉十足, 食落不油不膩, 甘甜清爽. 個阿姐將我揀的上海幼麵煮得啱啱好, 熱辣辣得黎煙韌彈牙. 一碗又平又好食車仔麵只係廿幾蚊, 最緊要係食到個人暖笠笠。

人就是這麼的犯賤，明明嘗過兩次旁邊的國泰好地地，今天臀部又癢起來說要到明記試試，點了雞翼芥蘭排骨河外賣，要辣，見阿姐從那煲咖喱魚蛋裏面舀出一羹辣來淋上面已經心知不妙，那螢光色鼻沸狀的魚蛋茨，放在魚蛋上也會不是味兒，現在竟然和整碗麵水乳交融，走回公司一路上長憂九十九。回到公司一試，令我意想不到的是那鼻涕魚蛋茨竟然能令整碗河粉也帶有啖啖淡淡的魚腥味。車仔麵餸方面通常都放了半天，大多是奄奄一息的了，但明記這三道也做得不錯，雞翼香茅很入味，即使沐浴在湯裏，脆炸過的外皮成了西環裏的浮屍，也憑入味努力板平；芥蘭新鮮爽脆；排骨是鎮江骨走酸少甜版，也不俗，但還是餸飯比較對味。