星河小食 (已結業)

西灣河有平靚正巨型豬扒包出沒呀！香脆豬扒包 ($30)塊豬扒好似手板咁長! 仲要係即叫即炸 所以保證熱辣辣！唔止咁樣 塊豬扒仲醃得好入味 而且又鬆化又冧又多汁😋 D肉汁多到滴出泥!除左豬扒 個包同埋其他配料都好正 包烘得夠熱 微微帶脆 加埋蕃茄 紫洋蔥同生菜 樣樣都好新鮮 份量又多 真心高質呀!!!!咁巨型又高質既豬扒包都只係賣$30 好過食M記啦~~ 女仔食一個都已經可以做Lunch 男仔就未必夠啦

西灣河呢區要食雞蛋仔或格仔餅，通常走太安樓，但那2間已今非昔比，質素極跌，已經列入黑名單久矣！除非行去筲箕灣，今天行過，見平日很多學生哥及媽媽幫襯，人氣幾好，剛巧末到放學時間，又好似剛開門做手意，一於試下個格仔餅。雞蛋仔$14，格仔餅$16，價錢好公道，仲要即叫即做，auntie氣定神閒好幽雅做格仔餅，其間都有數個相信是附近學生哥丶OL買魚旦丶撈面之類的小食，auntie將個格仔餅拎起，點知成塊跌左落地。。。她執起呆了幾秒望住我，問「吾好意思，整過塊比你呀？」auntie應該你第一次失手，尷尷尬尬吾知點算，我心想緊係整過塊，難道要番呢塊？基於auntie好好禮貌，我連忙話吾緊要吾緊要，好呀，你整呀，我等得。話末講完，後面老細走上前，再講吾好意思，親手整過塊，格仔餅末食，街坊溫情禮貌已好抵讚。好快格仔餅到手，熱辣辣好窩心，格仔餅厚身，醬料滿溢，一啖咬落去，超豐富有層次，格仔餅外表微脆，內裡鬆軟，有花生芝麻油香丶奶的甜香丶及粗粒花生的脆感咬口，由於格仔餅比一般大份，女仕可能要分享，否則偶然當正餐，可以省下午飯。$16超水準格仔餅，令人滿足。

經開西灣河，見到呢間小食店好似有報紙雜誌報導、幾出名咁，門口又方便停一停車，就落車買D野食。叫左豬扒包（應該係鎮店之寶）同烤雞全翼，等左5分鐘左右，原來2樣食物都係即叫即整，我寧願等耐小小換來新鮮熱辣既食物。豬扒包好大個，個醬幾特別，最好係塊豬扒竟然好軟淋淋，唔會硬，最怕食硬到死既豬扒，墊底既生菜蕃茄係凍既，食落好fresh， 而包都係烘過、脆的，呢個包好值得食，$30 唔洗食到出面$70-80既質素。雞全翼係蜜糖烤，雞肉好滑，老板控制火喉時間控制得幾好。完全無諗過，係而家物價咁貴既環境下，咁平民既價錢都有咁好質素，一定會再番黎試。

西灣河真乃卧虎藏龍之地也，除了「華記」外，好食店也真的不少。在這間位於橫街的「星河小食」，外表普普通通，Menu又頗雜亂，但在這裏卻遇到近年我在香港吃到最好的豬扒包。個包即叫即整，件豬扒屬厚身，但炸得香脆juicy，屬亮點所在，加上生菜、蕃茄及帶來意外驚喜、甜辣適中的芥末籽醬，配搭得挺出色。雖然個包本身屬一般貨仔（交來的貨不能有太高期望），但總算有焗過，算有誠意的了，加上只要二十幾蚊，整體來說已令我十分滿意。

好味足料用心製作豬扒包又係公司放飯時間 (晚餐)唔太肚餓買個包黎食 點知真係好好味 豬扒即炸脆卜卜加埋d醬汁 好好味呀 又足料 又熱試埋椒鹽燒賣+芝士腸+墨魚丸燒賣好好味 不過唔夠椒鹽味 其他ok啦 不太特別 下次再幫襯!!!

返工行過，想唔到食d咩。見到星河膽粗粗去試下，行到過去睇下似間普通小食店冇咩好食。但見佢大大個海報寫住豬扒包🐷咁就叫個食。老闆就由雪櫃拿材料整，所以在強烈的陽光下照耀了十幾分鐘。豬扒包食落都幾好豬扒不會乾有肉汗，但麵包只是一般而已。價錢在同區不算便宜。

屢次路過星河，均是鐵閘深鎖，緣慳一面。是日中午，往搭隧巴途中經過，碰巧剛開了門。雖則要赴約出席飯局，然仍忍不任要了一個香脆豬扒包。星期一至六，買豬扒包，另加三元可換飲品一杯，星期日則免費送贈飲品一杯。星河乃一間小食外賣店，除了鎮店之寶、最貴的豬扒包$23外，還有雞扒包、各式三文治、炸雞髀、炸雞翼、炸薯條、腸粉、魚蛋、燒賣、咖哩齋、印尼撈麵、雞蛋仔和格仔餅等，售價由$5-$22不等。長方形的店子，一覽無遺。麻雀雖小，但五臟俱全，整齊有序地擺放了各種的廚房用具。豬扒包$23可選配洋蔥汁或芥茉籽汁，小妹揀了較少見的後者，店員即時製作。稍等片刻，熱騰騰的豬扒包大功告成，小妹急不及侍地把包放在門前高枱上打開細看。豬扒包看似極為蓬鬆、沾滿粒粒的白芝麻；中間的豬扒炸得金黃亮麗，火喉控制頗為準繩，沒有丁點兒炸燶或炸焦的痕跡；再加上嫩綠生菜和嬌紅的蕃茄片，賣相不錯。揭開上層麵包一看，麵包塗滿了芥茉籽汁，除了白色的醬汁外，一粒粒細小而深褐色的芥茉籽清晰可見。小店用的乃法式芥茉籽醬，不同於日式芥茉醬的辛辣和嗆鼻，入口酸酸甜甜的，極為醒神開胃。咬下，麵包質感極為鬆軟香脆兼具彈性，集白芝麻香和芥茉籽香於一口，咬

係附近返工，食厭附近d野，見到大大個豬扒易拉架，買個豬扒包試下，豬扒肉汁鮮甜，個包好脆！醬汁酸酸甜甜，好開胃 配上法包，有少少澳門豬扒包feel！個包熱辣辣 , 老細即叫即整有心機 ! 西灣河美食眾多，而豬扒包算係前所未見，22蚊價錢合理，絕對有下次既一間小店

今日食左個好好味道嘅豬排包，所以我不得不同大家分享一下！首先梗係要講下個主角~塊豬排先啦。佢炸得好鬆脆之餘，又唔覺得油膩喎。而且嗰味道仲唔會太濃添！其次就要講下啲配菜啦！佢落左生菜同埋蕃茄。生菜嘅分量啱啱好，唔會太多同埋太少。再配埋啲切片蕃茄，感覺立即好似健康左添！！爭啲提漏左個包，佢用左法國麵包。我覺得咁嘅配搭令到個豬排包變得好有層次添。但係我覺得有得堂食好啲，因為個包真係要一整好立即食，咁會好味啲囉！！！

係附近住，睇住佢開，平均一星期幫襯一次,次次都食豬扒包，真係好正,每次都係，即叫即整,拎上手熱辣辣，個包好脆，本來有菜同蕃茄,個人喜好問題，叫老細唔好落,最鐘意係d醬，酸酸甜甜,豬扒入面夠 "林" ，外面夠脆,好食過m記，特別一提，開放式廚房,每次見個老細好俾心機整個豬扒包,值得一讚

今日要去西灣河文娛中心,有個親戚個仔係星河隔離補習,佢話佢個仔極力推介,佢自己試過都話好食   去到同老細講要個香脆豬扒包，佢即刻攞塊應該醃好既生即豬扒拍拍粉，之後炸，之後落番茄生莱，炸好豬扒放埋去，我見佢唧d醬，唔係普通沙律醬，新鮮熱辣送到我手上，盛恵 $22 ，但個包真係幾大個，所以唔算貴，食完好滿足  個包焗完脆脆地，塊豬扒好淋，配埋番茄同生菜，口感一流，個醬酸酸甜甜，同個包好夾

星河最近換了經營者，除了賣小食，夾肉包及意粉，也賣每日一款的蒸肉餅飯．本人食過無數食店的肉餅，不論平貴，可以說99%的都是一般．而只售28元的星河小食店竟有超水準之作！首先，肉餅鬆軟彈牙而不散，原粒肥肉增加咬口，亦不會令肉餅太油；味道清甜，不落豉油更食出真味．飯質正常佳，肉質新鮮，唯一缺點是肉餅中有少量骨碎．

星期6怕人多,揀左o係屋企附近買外賣食,試下新開o個間外賣先,原先想試下雞扒包,點知賣o西唯有下次再試...最後揀左個肉醬意粉,估唔到都又幾正,肉醬夠多,d芝士都夾到,同埋d肉似用牛肉碎唔係用豬肉碎,$35有埋杯奶茶都唔錯呀,下次會再試下