影片
以上資料只供參考, 請與餐廳確認詳情
招牌菜
食評 (26)
2個人今晚去左呢間,試左以下三樣紅燒豆腐煲, 火腩半肥瘦, 豆腐個面都脆脆地, 最好係佢唔太肥膩好香口好好味椒絲腐乳通菜, 通菜新鮮,油多左小小試唔到鑊氣,好鹹！蒜蓉豬扒, 好多豬扒同好多洋蔥,感覺一流...價錢平...服務ok啦...總括黎講,冇咩要求下呢度都ok既。
繼續閱讀
這夜同老友兩個又去森記食飯，上次來吃味道麻麻，不過食慣食熟點都會俾多次機會佢既﹗八點左右來，是晚天氣仍冷，斜路位無咩人，找到位置坐下，先向肥佬點兩味餸，再叫多三支獅威。獅威慢慢品嚐，等了三個字，一個餸都未o黎，同肥佬講叫佢跟下，佢就話"得喇得喇!"之後又行左去。算，搵個骰盅玩下啦諗住，點知佢地話骰盅用哂一個都無，我地兩個餓得連0的小吃花生都食鬼哂﹗再等多半個鐘即係等左九個字，野食依然未來，火光了，諗住埋單走人便算，肥佬見狀先識得走入去廚房問下有野食未，又走出來同我地講就來就來。最後乾等了一小時，先來第一個餸，就係是日特價$20的沙爹金菇肥牛，味淡，肥牛算多不過相當肥，唔同金菇同吃真的膩死﹗再等多三個字，小炒王再上枱，呢次出品油淋淋的帶油膱味，最鍾意食既蝦乾明顯少左。食完呢兩味餸都懶得再叫，是旦飲左三支啤兩個餸百幾蚊就埋單走人，今次吃得真不快﹗剔除佢成為我最喜愛餐廳先﹗
繼續閱讀
返出黎觀塘食飯, 朋友早就霸好位.今日一嚐森記, 森記鋪頭好細, 所以如果多人既話多數都係坐出面.一行十多個坐一張大台, 張大台真係大到伸長晒手都夾唔到餸咁.叫左8個菜, 仲有汽水$7/支先來魷魚鬚, 炸粉岩岩好唔多, 唔會過鹹, 魷魚較林比較易咬, 亦不失煙韌度蠔餅, d 蠔幾細隻下. 幾香蛋味.沙嗲金菇肥牛煲, 沙嗲湯唔夠味.芝士斑塊, 最好食算係哩個, 芝士味如果再濃烈點就更好, 但現時為止撈飯都依然一流椒鹽九肚魚, 真係好巧筷子功, 好易夾散. 炸得非常鬆脆, 好味過炸魷魚炒蜆唔夠新鮮咸魚雞粒炒飯都夠乾身.另外炒左碟蒜蓉白菜仔, 冇乜蒜香味埋單每人$44, 個人都係喜歡隔離既新南苑, 夠多位同比較靜森記哩d 坐出面有人食煙, 又有人玩骰盅, 黎食大排檔既阿叔大多豪邁奔放, 講野難免較大聲, 認真鬥不過.
繼續閱讀
月前到仁愛圍的新南苑試過大牌檔小炒，今晚又碰巧來到附近，本想「翻炒」，但聽聞鄰旁的森記也是形式相近的大牌檔，加上魚腸做得不錯，故轉過來試試。森記佔據仁愛圍尾段位置，設一冷氣開放小店接通裕民坊及仁愛圍，圍內露天位置亦放有十數大圓桌，鄰旁除了有其他食店，還有遊戲機中心，極具原始大牌檔「路邊」風味。我們一行七人於七時許入座，先點了數個小菜及外間較少有的「風花雪月」啤酒，雖然有聞這裡的魚腸出名，但有同行者不好，故只點了涼瓜魚腸煎蛋及薑蔥焗魚腸兩味。最後邊吃邊加單，結果共點了十二個小菜加九枝大啤酒，真誇張。 蒜蓉粉絲蒸扇貝：扇貝以傳統的蒜蓉粉絲蒸，朋友說肉質頗韌，但小弟那隻還可以哩。 豉椒炒蜆：蜆隻雖然較小，但炒得頗入味；雖然難以證實是生炒，但至少吃不出烚熟蜆肉再以豉椒回鑊的感覺吧。 椒鹽魷魚鬚：魷魚鬚做得不錯，炸粉份量不過多，火候也控制得很好，沒有太乾太硬；小弟吃得味重，如果椒鹽味能重少許便完美了。 油浸筍殼魚：索價 $55，但筍殼比預期為大。魚身外面炸得很香脆，但魚肉仍然嫩滑，簡單配以香蔥豉油已經很好。 酥炸大腸：豬大腸炸得過火了，太乾身，連內裡的脂肪亦被炸乾了一半，失去原有的油香，水準之下。 豉油皇鵝腸：鵝腸以較深色的豉油皇泡製，驟眼看以為是鹵水汁。 味道也算不錯，較可取的是墊底用上金菇及芽菜，不吃鵝腸的朋友也有選擇。 涼瓜魚腸煎蛋：招牌菜之一，魚腸以較重味的涼瓜配合煎蛋，味道很好。怕魚腥或未嘗過魚腸的朋友，可以這道菜作新嘗試吧。 香煎蠔餅：香煎火候剛剛好，用上的蠔也不小，味道不錯，但似乎叫作蠔仔煎蛋會較適合。 椒鹽骨：為滿足食肉獸朋友，特意點了這個椒鹽骨。賣相也不錯，但只是金玉其外，口感及味道均很差，應是用上過份的梳打粉來鬆肉之故，敗筆之作。 沙爹金菇肥牛煲：味道與份量也可接受，不差也不突出，中規中矩吧。 菜膽雞：雞味不足，但尚算嫩滑，不太吃魚也不好肉的朋友確為另一選擇。 椒絲腐乳通菜：腐乳味夠濃郁，但辣味略嫌不足。特別之處是通菜切成小段，方便大家食用，不怕菜段過長令菜汁弄污衣物。 寫到最後，為何不見了之前道的薑蔥焗魚腸，就是因為經過兩次漏單追單過程都沒有到，最後便索性放棄了。 整體食物質素中等，未能多嘗一致好評的魚腸令食局打了折扣。其實是晚食客不算特別多，也不明為何錯單漏單情況不絕，莫非大家認為區內重建在即，早已呈放棄狀態乎？
繼續閱讀
上個月的窮鬼飯局,地點在觀塘仁愛圍的"森記",這一間隱身在觀塘黑白森林的菜館,以各式魚腸菜式最為馳名.所以是夜以魚腸菜式為主角.個人覺得此"黑森林",比前兩次大局的環境更市井,由巴士站走進來,要經過一條又暗又窄,有如城寨的小巷,內裏環境市井麻甩,好多人來一邊隊啤,一邊玩骰盅.我輩草根去慣街邊檔,當然沒有問題,如果是平日出入高級餐廳的人來到,恐怕嚇到要調頭走.因為魚腸並非人人會吃,兼地理環境不算闊落,如果擺三四圍就有點難度,今次出席人數沒有牛頭角同石硤尾多,一圍人馬剛剛好.雖然是魚腸行頭,其他小炒也不可少,先上檯的是森記小炒王,用韭菜加腰果,蝦乾一起炒,鑊氣十足,爽脆可口,自然是送酒良伴,這夜駐場的啤酒妹是嘉士伯.小弟與千里兄雖然一個愛華頓,一個曼聯球迷,但此一刻敵愾同仇,齊齊不喝"利x啤"嘉士伯.飲風花雪月.森記每夜都會有不同的特價菜式,今夜是沙爹金菇肥牛,$20一客,我們一要就要兩碟.特價始終是特價,不能期望過高.果然此沙爹肥牛味道麻麻.沙爹味不濃,牛肉質素平平.來牌檔吃飯,一些香口如椒鹽的菜式不可少,椒鹽魷魚鬚就做得不錯.脆漿不厚,金黃香脆,魷魚鬚爽口彈牙.油泡田雞用西芹,辣椒同炒,辣度只是隔靴騷癢,田雞肉就有點點過老.一輪前奏之後,到第一味魚腸菜式上場 - 涼瓜魚腸煎蛋.說是魚腸作主角,其實此道菜涼瓜才是大婆,因為魚腸的份量比涼瓜少.而主角的涼瓜,不是很苦,食落更覺得爽甜.蛋身煎得恰好,沒有煎到過焦的情況出現.少少的魚腸,很甘香.如果份量多一點就最好.油鹽水浸魚鰾,說到此味,又眉飛色舞起來.小弟在整條鯇魚之中,最愛的部位是這個主宰著魚兒升降浮沉的器官.每次一去到佐敦等粥店食魚粥,總會來個魚卜粥,或者來個薑荵爆魚卜.女仕們吃有養顏之作用,好過一味用SKII.因魚卜本身含有豐富骨膠原.不妨多吃.回到檯上的油鹽水浸魚鰾,做法同我去佐敦魚粥店吃的有所不同,用油鹽水去處理,更突出魚卜的鮮味.接著就來個魚腸"Hat-Trick",雞蛋焗魚腸,薑荵爆魚腸和白灼魚腸.很多人覺得魚腸同雞蛋是天生一對.之所以會有雞蛋焗魚腸這道名菜.森記的雞蛋焗魚腸不用缽仔,只用碟去盛之.賣相像西米布甸,蛋面焗至微焦,食落帶有濃濃蛋香,而魚腸的香味亦同雞蛋混為一體.加少少胡椒粉吃,不錯.薑荵魚腸是以薑荵來爆魚腸,以鐵煲上.上檯時仍"沙沙"聲.食落惹味之外,亦不失魚腸的甘香味道.想吃真一點?白灼是最好的方法,有人會問:{白灼魚腸咪會好腥?},如果未經過處理的魚腸,就拿去白灼的話,或會有這種可能性.但魚腸烹調之前,一定要經過一大輪清洗才能拿去煮.功夫又多,利錢又少,所以坊間不是很多地方願意去做.最多是拿去做缽仔焗魚腸.說回白灼魚腸,用筷子夾一抽,點些醬油,再放入口,閉上眼去領會魚腸的鮮味,感覺幸福盅然.魚腸之後,回復平淡,蝦醬蒸豬腩肉,味道過咸,是蝦醬下得過於重手之故.來多兩味椒鹽菜式 - 椒鹽豆腐同鮮魷.同樣香口,又要拿來佐酒.沒有菜下過肚?炒碟腐乳通菜吧.沒有澱粉質,炒碟豉油王炒麵.做得乾身有鑊氣,麵條均勻地沾滿豉油.可惜沒有余均益在旁,略為美中不足.我們喝了很多啤酒,吃了這麼多菜式,十三人也是剛好一千銀多一點.折合每人付出$80,就換來滿肚腸肥的一夜.實在很便宜.月中的窮鬼局已準備就緒,現今要為七月的大局找地方了.
繼續閱讀