歡樂中式點心

營業中

休息中

#歡樂中式點心 以前喺新蒲崗返工，好多時都會行過大成街街市，不過就從來都冇上去，聽說好似有一間只做早市嘅傳統點心，於是特登去試下。從街市入去兜咗幾個圈都搵唔到條路上熟食中心，原來喺行人天橋旁邊就有一部升降機直上方便好多，加上行程延誤，去到已經十一點過後，老闆正在準備收工💔當時點心所如無幾，如果老闆同我講下回請早我都只能接受。點知老闆問我想食乜，我話蝦餃燒賣雞扎嗰啲，老闆竟然話ok我蒸畀你，嗰一刻真係幾開心又感動，香港係仲有人情味的❤️新鮮蒸出嚟嘅點心好難會唔好食，所有點心都只係$20，一般喺出面酒樓都冇乜可能食到，蝦餃有四粒晶瑩通透，最重要係有筍，蝦肉亦夠鮮，好食。燒賣同樣係四粒，雖然唔見有蟹子，但同樣有大件蝦肉，肉質非常新鮮。雞扎材料豐富，雖然雞肉稍為結實，但整體味道都算幾好，芋頭夠粉，豬皮爽口，火腿正常，腐竹入味。茶錢$5，埋單$65。老闆非常之好人，雖然我可能阻住佢哋收工，但佢哋都願意做埋我呢單生意，我好感激佢哋，希望佢哋繼續生意興隆長做長有。歡樂中式點心黃大仙彩虹道121號大成街街市2樓

位於新蒲崗大成街街市2樓熟食中心，中午十二點收，因為唔係24小時蒸住點心，唔會蒸到爛曬，新鮮好味！點心包括蝦餃都係19蚊籠，認真抵食！！！個人唔食鳳爪，難得有淨排骨飯，梗係要試下。排骨飯拍得住大榮華，排骨肥瘦適中，米飯索咗排骨汁後仍保持粒粒飯，油香撲鼻。燒賣亦拍得住一級酒樓，有鮮蝦、手剁瘦肉及肥豬肉，用嚟送蒸飯口感一流，簡直係絕配。聽講鵪鶉蛋燒賣更加馳名，下次一定要試下。蝦餃係竹筍蝦餃，size較細，但十九蚊冇乜要求。仲有現在難得一見嘅魚子餃，我仲以為魚翅餃入面會有一絲絲素翅，原來係冇嘅，只係得豬肉。咁究竟點解叫做魚翅餃呢？！懷舊大包大大分十分有特色，只係食咗一個蒸飯之後已經再食唔落，打包帶走。叫咗5籠嘢埋單止係102蚊，認真抵食，時光倒流回到90年代嘅價錢

今日去開黃大仙拜神，就上網搵吓黃大仙有咩好食，就比我發現喺大成街街市樓上嘅熟食市場有懷舊嘅點心，可能因為我係11點幾到既關係，我見到舖頭好似冇晒點心，我仲以為早茶完結佢哋要收市冇得食，正當我諗住走之際，個阿姐問你哋想食咩啊，我話你哋係咪已經賣晒喇？阿姐話即叫即蒸 ，坐低啦！佢呢度冇點心紙，所以我都唔知道有咩可以叫，阿姐就用口述講有咩點心，咁大個女第一次聽有魚翅餃，仲有平時已經食唔到嘅糯米包同臘腸卷，我覺得呢度比起茶樓飲茶好食得多仲要冇咁貴，而且仲感受到滿滿嘅人情味

今早很想食點心，去街市食比酒樓更有fu一去到就已經好多人，搭枱係必然的。洗乾淨啲碗筷，就去拎野食啦！因為第一次來食，唔知道原來蒸包係咁大個，以為好似酒樓般「一籠三隻」，等我仲叫了兩個叉燒包😑如果叫少一個，可以留quota試其他!初初行出去時就已經想叫蝦餃，但姐姐話未出要等陣，想不到我走開左，喺咁繁忙情況下，佢都竟然仲記得我等梗蝦餃出爐。有個男人（我想是老闆）都親自拎過來，話「蝦餃無晒，最後一籠比你」。蝦餃賣相幾靚，雖然唔係話好好食，但起碼見到有隻蝦先喇牛肉腸,不算厚粉（有蝦腸/叉燒腸/炸襾選擇）最後都未夠飽...叫多一個魚翅餃試下!都算幾大隻，好有肉地，但我連一條粉絲都食唔到，同想像中有出入。兩個人埋單，加每人3元茶芥，共67元。

大成街街市有檔早茶司令想試好耐，可惜佢收十一點，次次都爬唔到起身去食😂，今次的起心肝早起身去試，舊式既飲茶真係買少見少，大家記得都多多支持尼啲舊香港風情啦🤗。排骨飯 ($19)飲早茶點少得食返個鳳爪排骨飯，可惜司令叫既時候冇鳳爪😢，唯有食個排骨飯，米飯蒸到粒粒分明，豉油落得足👍🏻，配埋排骨本身既汁，唔錯喎。叉燒包($7)叉燒包係一個一個叫，唔好睇佢得一個，比一般食開既大好多😱，一撕開啲料仲要爆曬出黎，超多叉燒好抵食。即拉腸粉($16)腸粉即叫即拉好surprise😍，不過就要等耐少少，腸粉皮有米香，不過有少少厚薄不一。燒賣($16)燒賣大大粒，瘦肉比較多，所以食落去口感硬身啲，不過有大大粒蝦，性價比都唔錯。

歡樂的早市確能帶給附近街坊無限的歡愉，盅頭飯很美味，雪白香糯的米飯配以惹味的排骨或是咸魚肉餅確是大滿足。不得不提每天限量版的蝦較，皮薄蝦鮮夾爽脆，絕不遜大集團酒樓的貨色，怪不得要早點去霸枱才可有機會品嘗。熱騰騰的叉燒包和滑嘟嘟手拉腸粉也非常值得一試。水滾茶靚，一盅两件，確令區內的普羅大衆心曠神怡地展開每天的生活秩序，歡樂只有早市，要享受老香港的情懐，就只有上午過去品茗了。