永發餐廳 (已結業)

收銀好串 態度好差 唔知是不是老細 態度好似趕走客人咁 做得唔滿意唔好做 做得咁辛苦唔好做 如果佢唔係老細就恭喜佢老細請咗咁咁嘅員工 問多兩句都唔想答你咁 我真係唔明點解嗰個收銀都咁燥 建議老細換人

係商場入面既茶記，但有街邊鋪差唔多既性價比，我會比個合格以上既評價。唯一比較奇怪既係某d坐位要經過廚房門口先去到，感覺唔太乾淨。叫左兩個餐，$100左右搞掂，味道對到價。

最近因為疫情經常都要買外賣咁就去屋企附近收得比較夜嘅茶餐廳收銀員（肥女人）聽電話一啲耐性都冇！客人未講完就收線！已經唔係第一次仲要叫熱飲！啤左凍飲仲屈返人哋轉頭話我係叫凍同埋收銀員態度唔好又喺度啱啱沉沉🫣咁完全體驗唔到乜嘢叫貼錢買難受🥹🥹🥹我已經超過10次嘅經歷喺呢間餐廳，可以話係好恐怖嘅經歷幫襯佢仲要受佢氣又唔係特別好食😂好似爭佢錢咁 佢對我個朋友都係一樣咁差嘅態度，而且佢哋嘅食物唔係特別高質，普通一樣蒸魚佢都冇

今日黎左將軍澳既永發餐廳，親民價錢，款式都多。最後叫左個特餐B:沙爹肥牛撈公仔麵配火腿奄列，厚切多士。睇落唔錯。火腿奄列入面好多火腿有少少流心蛋汁好正，個牛油厚多士烘得剛剛好。值得一讚係有一塊仔青瓜蕃茄，唔健康得黎有返少少菜🙈沙爹肥牛撈牛仔麵，個沙爹幾岩味，麵煮得剛好，我幾中意個肥牛，好易咬，唔會好梗。至於個奶茶，係正常茶餐廳奶茶，不過唔係我杯茶，我中意多奶啲😅整體黎講價錢親民，份量足夠，係可以有下次既餐廳。以下係餐牌：

真係垃圾，叫左幾次宵夜常餐，每次翻到屋企都係比錯太陽蛋。今日叫佢換，佢比左一個冇味嘅炒太陽蛋，蛋白蛋黃分開嘅炒蛋都係第一次見。今次我仲專登問佢有冇炒蛋，結果都係錯，其實冇咪話冇囉，又要比，又要比垃圾其實小弟都幫襯左好多年，最近服務野食越嚟越差，小菜越嚟越小，有時仲唔知比左咩我，啫啫雞變左啫啫切雞，又唔係平，成七十幾蚊，疫情前食宵夜叫佢比個餐牌我，就黑晒面，真係食到怕。。。。。。今次真係突破左我底線，以後唔會再食呢間垃圾

喺唔同平台都聽過唔少負評 話員工態度差 又話嘢食唔好食 一於試吓佢 睇吓係咪真係咁差 但係真正試完都覺得真係幾好食！唔係想像中咁差！環境冇想像中咁污糟 而且嘢食上得好快因為呢個係停晚市之前食嘅 而晚市員工nice同都幾有禮貌呀 唔會話粗聲粗氣咁樣！嘢飲呢 話叫咗杯凍檸茶 茶底濃郁 唔會話甜味搶咗杯茶 而且碟密椒雞翼真係好好食 如果大家有機會去一定要試吓 雞翼夠肉地 甜度適中 唔會話係死甜 如果開返堂食真係值得再試！希望大家都去試吓

今晚10點幾本來想食唐記飯，點知賣曬，冇辦法轉頭又開工，就唯有去呢間買個晚餐A，都知沒有好結果，但只有選擇佢，好，等……，一等等咗25分鐘，問亞姐如果未整就由佢啦，佢居然同我講「即叫即整咖，係耐啲」，但我叫嘅係黑椒牛柳雞扒飯，點煎都唔使25分鐘掛，個亞姐仲話「牛扒要煎熟比你」😱煎25分鐘變牛肉乾啦（心諗），好結果等咗30分鐘，攞咗上車食，點知個塊雞扒同黑椒汁都係酸嘅，牛扒已經唔想掂佢，放棄，直接食飯同羅宋湯，我講過，我餓死都唔會再去呢間嘢道食，我會當佢唔存在

☆ 永發餐廳將軍澳貿業路8號新都城中心3期地下G17-18號舖夜收工想食少少野，行過永發見到有個瑞士雞翼撈公仔麵常餐，岩晒呀！٩(˃̶͈̀௰˂̶͈́)و一開蓋，個黑松露炒蛋又幾香喎，炒得都算滑身，多士都仲脆。瑞士雞翼好入味好食！撈公仔麵都無無over咸，同埋最正個樣係好夠熱，因為平時個d撈乜撈乜都唔會熱到出晒煙，但呢到做到，所以因為多熱d公仔麵就無痴到一舊舊，幾好！價錢仲好抵，有埋野飲都係$48咋！( ´▽｀)

今日又去咗永發餐廳食午餐，叫咗一個鹹魚蒸肉餅，係一個非常經典嘅味道，肉餅份量唔錯，鹹魚都大大嚿，送飯啱哂，價錢又合理。另外一提佢個羅宋湯質素幾好，好多雜菜，少少辣唔錯。

今日去永發食午餐，叫咗午市套餐A嘅欖菜豆卜蒸排骨，咁啱阿姐話買完之前嗰啲，要再正，最後15分鐘多啲先到，味道正常，排骨都算多，欖菜味唔出，豆卜正常，啲飯有少少乾，同埋啲豉油都幾油下。正常一個午餐。

好忙呀😅今日見完客人😅唔返屋企食飯啦😁喺將軍澳食啦😁入咗永發茶餐廳😍睇到個餐牌好吸引沒有最平只有更平從來未見過鐵板餐49蚊加3炆有凍飲添睇下嗰啲晚餐好抵食㗎👍👍有一塊豬扒一塊雞扒一條腸仔裏面仲有好多蔬菜㖭 😋💯本來以為佢有薯條嘅😒原來係用蔬菜伴碟🤣但係都ok喎👍我揀咗蒜蓉汁好好味😋加個22蚊仲有個蠔油生菜👍不過肚餓得濟唔記得影相😅從來冇食過咁平嘅鐵板餐👍👍泥到嘅時候仲熱辣辣好有鑊氣㗎 想鋸下扒平平哋又經濟又實惠呢間真係好抵呀😍D肉都ok好味喎 最鍾意佢條腸仔炸到好鬼大條🤣🤣都好味嘅 雞扒同埋豬扒都好大塊㗎抵食 👍👍係差啲薯條如果唔係用蔬菜伴碟用薯條就perfect喇😁😁😁#katkatfoodies

有人話，早餐係每一日最重要的一餐我想講，減肥亦係女人唔放棄自己的事業係早餐哩一方面，我平日都好克制麥皮！（我老公話似我似食紙皮）口味變化？！あの⋯⋯乳酪/ 牛奶/ 生果 / 杏仁奶 咁囉疫情嚴重減肥理論上係易左丫，為什麼會那麼疲倦？終於忍唔住要食返個邪惡早餐去平衡一下疲倦的心理唔係重點推介，但個粉都真係滑得黎有米味半戒澱粉質的我特別敏感蕃茄湯底濃得黎唔會太茄膏重點👆🏽 哩個係奶油豬（圖中的它其實已走奶）外脆內軟 豬仔包我怕𠝹咀，哩個包唔係一整個都硬脆，主要脆係包邊位，所以唔𠝹咀得黎又食到脆口感不能想像我唔走奶會幾咁大獲職員態度良好此終係做本區生意，親切的服務環境係普通茶餐廳，近似「百分比」裝修格局，是衛生的👍🏻沒有去廁所睇環境，唔評論

放假落街食個早餐，見好耐都無去永發咪心血來潮食返個早餐，入到去選擇左好耐先搵到食咩，因為早餐沒餐肉沒有腸仔可以簡。。最後簡左個歐陸早餐。黎到見到果pat汁真的超唔想食🥺首先食塊多士，嘩件多士又唔熱又唔脆，感覺好似食緊隔夜麵包咁，然後食炒旦啦～感覺又中伏，，d旦好明顯係佢地炒左一大堆然後分一少堆比你又少又碎，炒旦加火腿下面果d油夠你煎多隻旦，，非常油膩。豬扒好硬好in,, 仲有果d汁多都唔緊要，但好咸。咁唯有食火腿啦，點知火腿仲咸過d汁，，果一刻我完全唔知自己食左咩落肚唯一慶幸是那杯鴛鴦還可以。

星期日放假起身落樓下食早餐，見四圍都排晒長龍，唯獨是係呢一間冇人排隊，咁就貪方便入去食。第一，啲阿姐起勢咁喺度嗌，一位兩位三位，好 嘈。訓醒係咁俾人係咁嘈。第二，你睇吓我嗌嘅港式早餐魚柳餐，好單調簡單，無多士，係無多士。成個早餐餐牌嘅所有餐都係冇多士！多士好貴？整多士好耐？雖然我唔係好鍾意食多士，但平時食開係有既，令我好唔習慣。第三，魚柳好難食。唯一可取之處係便宜，你話抵食就唔算啦，我唔會講話自己係屋企煮好過呢D說話，我會話去搵第間食

夜收工唔想煮飯，想食啲有少少辣的小炒，經過永發餐廳見佢多人幫襯，加上餐牌上的菜名都幾吸引，決定食好啲叫個「醬爆海中寶」，盛惠85蚊。番到屋企打開已經嚇左一跳，見佢堆滿花生同西芹，可能係我見識少，但食完面頭一層西芹同花生，真係忍無可忍要摷晒啲花生出黎，個底仲有大量紅蘿蔔粒⋯所謂海中寶只有碎濕濕少少急凍海鮮殘渣咁⋯超級呃錢！ 西芹花生炒紅蘿蔔仲要收你85⋯冇下次