泉昌美食 (已結業)

食完一個美味的樂景芝堡後，行過對面街就係阿蘇介紹的泉昌沒有點馳名臭豆腐，只叫了咖哩魷魚($7)、咖哩魚旦($6) 各一串，老細絕對是快人快語的人，建議先決定好食乜再點 (特別係車仔麵)，否則佢會以好勞氣既態度對你 堂食的話要有心理準備，巷仔內極多烏蠅，食物再好味都會影響食欲，如自問頂唔順可以外賣~說回食物，咖哩魷魚食落唔會太硬，咖哩係受歡迎主因之一，其次係魷魚 size 都算大，老細好心情的話份量更多，魚旦亦不賴，夠彈牙!如不介意環境衛生問題，絕對值得推介一下

又行了一行188, 回去搭車之際, 有點餓, 整串野食走人.這兒的選擇的確唔少, 花多眼亂, 沒有idea, 突然見到剛炸起, 大大粒, 問一問阿姐是什麼, 是魚蛋, $6四件, 就來四個吧一路行一路食, 魚蛋好重魚味, 有少少腥or魚露味. 不過熱辣辣, 好好食. 趕上巴士, 繼續食埋剩下兩大粒. 要排隊的, 果然有料到.

是日點了一串魷魚. 發覺是我生平第一次吃這類的香港街頭小吃.係幾好吃.不過... 沒有吃過別的又怎麼知道是最好的呢.所以不能多加評論了. 另外要提的... 臭豆腐炸得漂亮.要小心的是... 單是小站一會...已成了一個臭豆腐人.

又去試蘇小姐的介紹試了咖喱魷魚和咖喱魚旦前者爽脆入味，咖喱味頗香濃，但我第一次吃到凍的魷魚鬚，再看看其他食評，原來也有這個問題，難道凍食是這裏的特別做法？魚旦不過不失

一直都好想試下阿So 介紹的臭豆腐.一口氣買了兩件.結果係失望!! 外層炸得唔夠燶,唔臭, 內裡豆腐有些硬,唔鬆化. 似炸豆腐多過臭豆腐....同埋佢d甜醬,唔同一般味,好怪,茄汁味好重.

等太座收工去潮州邨食飯。望一望錶，仲有大把時間，又去揾嘢食...估唔到食咗咁多嘢，陣間點去食鹵水鵝肝呢?知道呢度嘅臭豆腐及咖喱魷魚頗得手。想一想都好耐冇食到似樣少少嘅臭豆腐la，以前獨步天下嘅太子水渠道臭豆腐絕對今非昔比，希望呢度可以食到好D架la..結果依然係令人失望...雖然皮夠脆，但依然唔夠臭，亦冇嗰種"酸酸臾臾"嘅味...食臭豆腐唔臭，即係等於食羊肉唔膻。咁不如去食普通蒸煑豆腐，或食普通豬肉牛肉好過la...咖喱魷魚反而出色。雖然係完全攤凍晒，食唔到新鮮即做嘅，但魷魚本身爽脆得很，食唔出嗰種鹼水味；咖喱汁杰撻撻，非常香濃，出色...唉...好嘅臭豆腐，何處尋?

上星期去試阿so 果D所謂美食D臭豆腐都OK 但係串魷魚凍冰冰完全吳好食仲要賣食$7蚊串完全吳抵食阿so介紹D野完全吳掂大家可試試

今日見完counsellor 之後行左去搵o的間蘇絲黃極力推介的小食店。要左咖哩魷魚同臭豆腐可能因為我未食過太子的臭豆腐，加上我掃街資歷尚淺o既關係，所以我覺得兩樣都幾好味，唔錯唔錯~第時路過灣仔都會再幫襯的說~~

看見師姐其中一個食評,將灣仔巴路士街"泉昌"的咖喱魷魚,描述得如此感性,動人.個心即刻痕一痕,趁路過188買碟,順便一親其香澤.其臭豆腐亦聞名遐爾,來到魷魚剛好賣光,阿姐等十分鐘.)就來個臭豆腐先.未行近也隱約聞到"香"味,吃落也炸得脆,豆腐質地也夠粗.幾重發酵之後,唔粗有鬼.可惜,我嫌其始終不夠臭,須知臭豆腐不臭,等同一個太監.吃完也未有魷魚,去一去便利店買啤酒,轉頭再來.已經做起一大兜.其咖喱魷魚炒得不太濕,咖喱汁是有層次的刺激,味道豐厚,魷魚自身亦爽脆.還吃到魷魚本身的味道,沒有被化學品折騰到得個爽脆口感.一口Hite啤,一口有深度的咖喱魷魚,這一刻,我還清醒.

成日都好想試蘇絲黃介紹既食物，今日經過就試了。本來只想吃魷魚鬚，老闆話整緊，咁我叫了另一樣出名既臭豆腐，大大件，一早炸好，但仲脆既，其實我本身唔覺得臭豆腐有咩咁好食。雖然無臭豆腐味，但返到屋企頭髮竟然有臭豆腐味......吃完見魷魚鬚整好，所以吃了一串，咖喱汁好好味！！！越食越辣，最後有少少孖潤腸.....都幾多人幫襯。

這天，又刻意拐進小巷。刻意的在小店前放緩腳步，卻又刻意的不跟你有眼神接觸。眼角懾到你，正在專心地，把鐵缽中的咖哩魷魚往竹籤裏串。正在猶疑之際，又是你先開口：「要一串，多鬚，是嗎？」唉！又逃不過你的黠慧，儘管你仍然未有瞥我半眼，但又曉得我正在暗裏點頭。外表粗獷，卻又恫透我心的你，又謂：「再多要一串辣魚蛋，是嗎？」唉！心裏忐忑之間，你已靈巧的把魚蛋跟魷魚一併放進外賣小缽中。再謂：「一串魷魚不夠吃吧？多要一串，是嗎？」無言。你就自顧自的在挑魷魚鬚給我。接過了外賣，跟你從來鮮有交流，但你就把我看得通透。心裏在怕，怕總有一天會愛上你的體貼…想到這裡，毛管直豎…快快跑回家中，開了瓶冰凍的Pinot Noir汽酒，好好的冷靜一下。再細意品嘗，你那馳名的咖哩魷魚。你做的咖哩魷魚就是永遠的彈牙、有嚼口、入味，咖哩汁香濃而又充滿辣勁，完全是我愛的風味。魚蛋的骰而充斥著魚鮮，肉汁豐沃，配合上咖哩汁，是那鼓妙不可言！嘗著，你又在我腦海中浮現…你在專心的，烹著咖哩汁…是你懂得調製攝人心窩的咖哩汁？還是，我醉了？

睇過雜誌都知, 泉昌出名到連蘇絲黃都成日去幫襯! 亞視下午d飲食節目都有介紹過!最出名係咖哩魷魚~~ 又香又爽又夠味! 仲有臭豆腐, 灣仔而家好難搵得到好食!炸魚蛋又係正, 仲有煎爙三寶都值得一試!果度仲有車仔麵, 可配搭唔同送款.平靚正又好味! 係灣仔真係好難再搵到gum 正ge 風味小食!會叫多d 朋友去試下先得!

It's good and very stinky. The boss cut the tau fu into 2 half so as to make it easy to become "fried"....to me, the whole night still have that stinky smell. I think it is better than the shop in Tai Chi.

2006年6月4日，18:30又到灣仔道遊蕩，遠處傳來陣陣臭豆腐香味。原來是從曾令我失望的小店傳來，即管再試一次。向老板要一件，答案是等等先，原來要排隊^m^香味：濃郁，有水準。外皮：微黃，微脆，但仍不夠鬆。內層：仍炸不透，有點兒散。即叫即炸，令整體加分不少。在等豆腐時來了串螺肉:醬汁:極和味:咸、香、辣。螺肉：凍凍的、實實的。要是放入鍋中翻熱，才上醬汁，食味肯定更上一層樓。

見有食友推薦這裡的臭豆腐，今日適逢在呢頭有聚會，就行過來買件，事關臭豆腐做得好的地方已買少見少，我們這些死硬派也就快給把鬼炸雞或炸薯條攻陷的了，所以一聽見有好的就會去試。知道呢間小食店的位置，但一路行過來都一路聞唔到臭豆腐的獨有「香」味，已經心知不妙。行到舖頭前面都一點味道也沒有，如果不是用眼看到，也不知這裡有臭豆腐賣。這種情況得兩個原因，一係臭豆腐唔掂，一係佢通風做到加零一咁好。基於希望是後者的關係，買了一件。臭豆腐炸定，係四四方方一大磚，但擺到很近才有「香」味，只微溫，微脆，無厘火氣。須知臭豆腐唔臭，就只係炸豆腐。吃落更是不濟，非常同意LI兄所說，是炸得不透，原全唔掂！比起太子的臭豆腐，何止差幾皮，係全不能相比。6蚊一件，雖然不貴，但吃這樣品質的臭豆腐，不吃也罷！