浩記茶餐廳

營業中

休息中

我覺得好食過麥記嘅豬柳蛋漢堡🍔下午茶都幾抵食，係灣仔真係算係咁 。就咁豬柳漢堡30幾蚊，加薯條🍟40幾，出面而家買杯廢水都30幾蚊啦 。仲要食完都幾飽肚，我直接當左佢做晚餐🤭呢到20幾年茶記，啲侍應幾好人，有種人情味係到 。呢啲老字號真係賣少見少 。好鍾意呢啲老茶記多過食大集團，唔會啲野一樣味，全部啲野都一模大樣咁 。而且呢啲老字號茶記，先有種香港特色 ，香港人嘅味道 ～ 好好珍惜呢啲經歷過疫情、開關、仲還有嘅餐廳 。

呢間茶餐廳已經食過好多次，無論係自己定係身邊嘅同事都話真心好食！茶餐廳星期一至六都會有大概7個唔同飯餐係全日供應（11點後），每日都唔同嫁！份量唔小，味道都好好👍🏻值得一試！但個人覺得最好食之選…係佢個「必食午餐」！雞扒煎蛋飯真係好好味！雞扒都幾厚，雞扒煎完肉質都勁嫩滑，蔥油薑蓉撈飯，勁好食！煎蛋係流心嫁！蛋汁勁香！😍😍😍另外仲有豬扒同牛扒可以揀！另外佢嘅全日特餐都好抵食，$50都唔洗就有自選麵+腸仔炒蛋+牛油方包+飲品👍🏻

（全自費）位於灣仔的茶餐廳是上班族午餐的不錯選擇。午餐價格大約從$46起，許多人在午市時段排隊等候外賣。上菜速度驚人地快。我點了他們茶餐，凍奶茶底香濃，非常推薦。我還點了沙爹牛肉麵，份量十足，味道不錯，讓人食慾大開。公仔麵煮得剛剛好，有咬口不軟爛。然而，炒蛋和腸仔的表現一般，沒有太出眾的特色。唯一需要改善的是衛生狀況。很多人隨地亂丟垃圾，地上也有很多用過的紙巾。如果附近有辦公室的朋友，建議買外賣回去慢慢享用，會更好一些。😝總的來說，這家港式地道茶餐廳提供快捷美味的午餐選擇，尤其適合忙碌的上班族。快速的服務和美味的菜餚使其深受歡迎。只需注意衛生情況，如果你在附近，可以考慮外賣，以在更清潔的環境中享受美食。===

「外賣自取」Lee間野真心冇下次🙃🙃🙃等左起碼30分鐘，中途問過佢哋2次。第一次問佢地，得到嘅回覆係：整緊啦，整緊啦，等吓啦！第二次追問佢地得到嘅回覆係：下一個到你嫁啦！即叫即炒嫁嘛！（講梗都炒左30分鐘）最後原來根本冇做，又再等多20分鐘。午餐時間得一個鐘，我等咗50分鐘🙃拎到返office，打開發現入邊有三條唔知邊度嚟嘅頭髮。等左咁耐再加埋打開發現左頭髮，覺得太嘔心一野dum左落垃圾桶，所以冇影到。

見到最頂個則食評仍然係自己，都猶豫左一陣⋯⋯再次利申唔識浩記任何人，我一星期叫一至兩次外賣，佢哋應該唔認得我，食嘢冇優惠㗎。啱啱個外賣超正，所以好想介紹比街坊！沙爹牛包＋麥皮$33 only!相入面個包已經食咗三份一，牛肉又香又多又軟滑，非常多沙爹汁！麥皮入面有蛋白絲，煉奶分開上。送外賣妹妹非常有禮貌，仲祝我新年快樂哩！附近肯送一個餐嘅食肆非常少，好在仲有浩記，而且又平又好食！

如果屋企樓下要有間茶記，我屋企樓下就係浩記！一個星期會叫一兩次外賣，附近茶記好少一盒都送㗎。最近可能換咗大廚，炒野好食左，所以寫一寫⋯⋯牛肉炒米、揚州炒飯、鹹魚雞粒炒飯，都好大盒幾好食⋯⋯想清D可以叫豆腐蒸斑塊、蒸蛋，味道都ok㗎⋯⋯叫快餐比較抵，每日有好幾款可以揀，每三個月轉一次menu。今日叫左鹹魚雞粒炒飯，$53，有飮品；再加左半份生菜$10。好似有D貴，但佢D炒飯永遠大盒到可以分兩餐食！（相入面係半盒嘅份量）我起身起碼兩點，有時會叫下午茶餐⋯⋯最like春卷或蝦卷拼沙律，好食又唔貴⋯⋯腿蛋治之類正常質素，奶茶都幾滑幾好飲。至於招呼呢⋯⋯收你個三四十蚊，仲想要乜嘢招呼啊？近月大家唔想幫襯連鎖快餐店，就多啲幫襯街坊小店啦！

今次介紹呢間普通到十分普通的茶記, 好食又唔係, 唔好食又唔係, 好坐又唔係, 唔好坐又唔係, 有服務又唔係, 冇服務又唔係, 終於有樣野係就係抵食! 次次同事 LUNCH 諗到冇野好簡果時一定會諗起呢間, 真係普通到唔普通, 個食評差不多都唔知有咩好寫, 普通到咁的茶記真係普通LUNCH 普通咁去下囉。多數有位, 適合唔同人數都可以砌得落俾你, 好似 Lego 咁。講下野食, 炒野多數夾埋幾單一齊炒, 總係覺得3碟變4碟, 2碟變3碟的感覺, 真係純粹感覺。想快可以叫肉餅, 多數午餐牌最後果個7號餐就係。野飲都係果d 啦, 午餐同晚餐一樣囉。

今朝返工前去呢間餐廳食早餐，平時間唔中會去食下，我叫嘅係麥皮早餐配多士煎蛋，麥皮味道可以，但係唔夠熱，多士就即叫即做都ok，而凍奶茶就比較澀，老實講，食物質素唔算太差，之但係唔會好食到我要受你氣囉，更何況就算你好好食我都唔應該受你氣啦，我今朝食完走去埋單，個收銀阿姐或者係老闆娘聽緊電話，應該係叫外賣，咁我咪等你做完野先囉，我放低張單等佢，佢講完電話就用啲極惡劣嘅態度同我講"拎過黎啦", 咁我都算啦，諗住俾錢佢，跟住佢竟然又係用極惡劣嘅語氣同我講"放低啦" ，之後佢找完錢我冇出聲就走左。我以後都唔會去呢間垃圾餐廳，全香港唔係只得一間茶記囉，我好心慢慢等呢個阿姐（如果佢係老闆娘就真係幾巴閉，應該唔休做生意，完全唔尊重啲客），但係竟然仲要俾人喝，雖然幾十蚊唔係咩大生意，你唔休做我都唔會去貼錢買難受。

唔係第一次幫襯，早知此店出品質素差劣，平時嘅飯都係汁多過飯，由於忙又近公司所以今次叫個炸雞脾應該無咩伏，送到上黎之後開盒發現係唔係炸脾，即時打電話俾佢地話搞錯左，仲明明話聽到我叫鹵脾，講左一論佢話叫人換返俾我。點知上黎果個人兩手空空，再問我拎個雞脾佢睇，佢竟然話呢隻係炸脾，話鹵脾係再深色d。然後佢就走左了。我都唯有食左佢，但係d用係鞋嘅，係鹵水味嘅，我真係唔相信呢件係炸脾，我從來無食過d咁嘅炸脾。雖然我知呢間嘢無人會慕名而來，有d要求嘅都唔會去食，但係呢d服務質素絶對不值得鼓勵。

唔好以為睇落冇咩色水，查實食落幾正架，好似自己屋企整既味道。個炒飯呢係唔乾身架，可能冇用到隔夜飯炒。但係濕濕地又幾正架wo,夠味，叉燒亦都好香，淡淡咁散發左落個飯度。最正係熱辣辣，放落口仲辣嘴既，有助香味進一步散發。炒烏冬睇個樣又係唔多吸引，冇咩色，但又係估唔到咁ok...好有家的感覺，即時諗起媽媽煮的菜式。啲肉絲keep到嫩滑，適合想拿拿臨搵啲野食既大家。

一天早上，在激肚餓的情況下買了這茶餐廳的燒賣腸粉$25來吃，結果變成激後悔!早餐檔設在茶餐廳門口前，小人本想叫著那個阿姐分開盛起兩樣東西的，怎料那個阿姐不理三七二十一把所有東西疊放在一個發泡膠碗裹，狂下甜醬辣醬豉油辣油! 甜燒賣加豉油浸腸粉，一塌胡塗，混醬到爆!  魚蓉燒賣質地很實，腸粉則梅得近乎爛，一叉即散，加上被層層燒賣壓著，根本是沒有一條是可以完整地叉起來的，這樣的混醬食物，怎會好吃??!!凍檸茶本來沒有甚地方可以出事，誰知道連冰也是未分開的! 馬虎之極!浩記，後會無期!

早點出門口，就有時間去坐低食個靚早餐。是日就選定了蘭芳對面，人流一樣多的茶餐廳一食。說真，此餐廳好似仲好生意過馳名的蘭芳。我入了舖，只能找到一張小圓檯，3個大男，夾住黎坐。有時間的早餐，當然也來一個麵，飽飽肚。雞扒是我最愛的配搭，而這裡的扒麵，$24仲可以併多一樣野。那我就把我最愛的雞扒同五香肉丁混在一起。麵湯就不考究了，因為美味，肉粒方正兼少肥肉的五香肉丁，一早已把普通的湯汁變成五香湯汁。雞扒，煎得皮肉帶脆，麵身爽滑，成個麵因為有靚既五香肉丁做配襯，感覺非常好味。奶茶，也是合乎我心意，滑滑的，聞得出的香濃。是值得一飲再飲的奶茶。感覺上，此店比起對面的名店，做得更好。

很久沒有四出試茶了，是日吃畢了粥，當然是未夠飽，人在灣仔，茶餐廳的選擇非常之多，是日就走到人煙稀少的謝斐道找點少人去的茶記，就找上了它，這茶記特別的地方是，它裝潢雖比較簡陋，但就真的比其他茶記供應更多小菜類的東西。坐好之後，就看看餐牌有什麼好吃，當然都要吃茶記的食物，另也找一個小菜吃，見竟然有頗花功夫的鹽焗雞吃，也只收三十來元，當然就吃它吧，喝方面，飯餐捨了例湯，要了熱奶茶咖啡各一杯。先來是喝的，奶茶及咖啡都是用上厚身瓷杯盛起來，茶都蠻夠熱的，但個人認為應該熱多一點較好，用鼻子嗅一嗅奶茶，茶香飄逸，這個茶香都真的很久未有嗅過了，要數具備茶香的奶茶，當然要數長沙灣的新華，深水埗的榮華也不錯，在同區灣仔就金福也還可以的，之後喝了一口，感覺是茶味及奶味很是平衡，教人興奮的是，茶內黑白淡奶帶來的的奶香，又未算強得搶了茶味，入口細滑又夠挺身，茶味能在口中迴盪良久，為味蕾帶來回甘。本人主打的的咖啡同樣的是不太夠熱，雖然嗅起來有點啡香，喝入口味道是濃得來，沒一種在舌頭上停下的啡香，而且味道又偏酸，確是要比一般港式咖啡要酸，不知是否店家下得不夠多黑白淡奶了，入口沒奶茶那麼細滑挺身，怎說也只是合格而已，

我本身日日早餐都會叫外賣, 一個星期做少都會幫襯1-2次呢間浩記但係今朝我叫左外賣, 等左9個字見仲未送黎諗住打去問下, 點知聽電話個呀姐問都未問係邊張order就話送左, 跟手cut 埋線喂大佬.... 我都話比你知叫左咩同送去邊... 扮野都問下啦之後我即時redial 打去問, 換來一句粗口:咁x多單我點x知邊單呀, 唔要咪取消lor!!等左一輪無早餐食, 仲要比人小, 真係一肚火

10-12-2010是日 lunch 只想飲奶茶食公仔麵, 呢條街一間人多擠迫又好似好勁油煙味的蘭芳, 另一間就係呢度, 試試後者吧. 叫了有公仔麵嗰隻唔知「常餐」定「特餐」, 跟腸仔 + 炒蛋 + 餐包 (可加 $1 轉多士) 及飲品一杯熱奶茶: 色水幾「奶」, 飲落算滑, 奶味 vs 茶味約 7:3, 但又有輕微茶澀味, 幾唔喜歡.沙爹牛公仔麵: 牛肉賣相有點「膠」, 不過食落仍然有「肉」的質地及味道, 相信即使有落化學嘢都唔係重手的; 沙爹汁質地幾濃稠, 唔辣, 不過甜得唔似沙爹醬, 似蠔油 / 甜醬油多 d 喎 麵底 (係大光麵吧?) 就淥得幾爽口, 不錯.多士: 一塊薄麵包分成兩片, 兩片都烘得好鬆脆, 不過兩片多士 d 牛油都好少又塗得好求其, 完全係「撻」落去就算 腸仔 + 炒蛋: 蛋炒得偏老, 薄薄一層蛋皮食落偏硬身, 零蛋汁但碟底極多油 烚腸仔就係「廚師」, 食落超鹹, 咬了 1/3 還是放棄.埋單 $25, 乜仲平過街市茶檔 (http://www.openrice.com/restaurant/commentdetail.htm?commentid