瀟灑哥 (已結業)

旺角人流多，小食店遍佈全區，如雨後春筍，多不勝數，任何新潮創新食物都能在這潮流地找到，但要成功在這必爭之地立足卻十分不容易。這次晴寶去食了曾風靡一時的日本玉子燒🥚，這小食材料簡單，製作亦不複雜，但要做到入口嫩滑卻不容易。這次幫襯的小食店名字的確令人銘記於心-「瀟灑哥」😂。這店子食物選擇多，但最岀名的卻是玉子燒！當然要一試，有三款選擇：蟹柳、鰻魚、明太子，我揀了蟹柳味。因新鮮製作，等候約10分鐘。今次選擇回家品嚐，所以選擇外賣，店主細心用錫紙盒裝住，令我回到家中仍能品嚐熱騰騰的玉子燒😋一打開，玉子燒上佈滿沙津醬、木魚和蟹籽🦀，賣相吸引，分量滿多，兩人開心分享剛剛好👭。一切開，有少量蛋汁流心，一入口，滑嫩香甜，相信是加了粟米和忌廉👍🏻，味覺剛好。唯一要改善是此店不設派票叫號服務，只靠店員認人樣派食物，如人流多就顯得不方便。

真心推薦大家係旺角掃街時過黎試下 價錢都幾合理 食物好有質素最愛流心芝士鰻魚玉子燒味道同賣相都滿分 真係有流心效果 食落去好juicy 食食下仲發現有芝士拉絲 鰻魚x玉子燒既味道好夾 好有層次 食完好想再食必食炸黃金軟殼蟹外皮非常之脆 平時食黃金蝦 剝殼之後就食唔到好多咸蛋黃 但係 呢個軟殼蟹就可以連所有鹹蛋黃一齊食落肚 一啲都唔浪費 非常邪惡回味無窮同埋軟殼蟹本身都已經好好味 加埋鹹蛋黃 真係一絕鵝肝多士鵝肝入口即溶配埋脆脆嘅多士 都係無失望 正

魚蛋燒賣食得多，普通點豉油食嘅，咖哩，麻辣，炸都食過.... 但我真係冇諗過可以有避風塘燒賣魚蛋!超特別而且即叫即炒夠唒火氣!! 好惹味又辣得好鬼過癮。只係十五蚊唔算太貴，有八粒而且兩溝仲唔洗加錢。一個價錢試唒兩款口味。我自己就鍾意避風塘燒賣多啲。簡直將魚肉燒賣昇華到神枱級!真係要大力推薦。 見呢間舖又好似有新搞作，經過再試下先!

去親旺角都總會見到新嘢，今次發掘到一間食鐵板小食嘅. 係舖出面望緊餐牌果陣已經聞到超香! 原來個師傅係鐵板上面煎緊牛. 啲香氣真係搞到我流唒口水.我見呢個一口牛係招牌，所以我叫左個勁量嘅! (普通同勁量價錢只係差$20... 梗係叫大份啦! )見到師傅夾啲肉落鐵板果下"滋滋沙沙"聲，應該真係好夠火力! 師傅係塊板上反左一陣，幾下手勢最後加啲黑椒就完成左呢個椒鹽一口牛。粒粒都幾大粒而且充滿肉汁! 真係一啲都唔老而且唔難咬. 以呢個價錢，有咁高質嘅牛真係冇得頂! CP 值超高! 我本身想即刻再嗌多份黎食但諗諗下要留肚，唯有下次再黎食過!

雖然而家少左出旺角，但都要定期去迫下人湊下熱鬧食下野。係旺角食野我一定去家樂坊果條街，舖頭夠集中款式又多。次次都眼闊肚窄，買到食唔落。前日行過呢間舖，見到都有啲人係舖度等緊，於是行去湊下熱鬧。間舖裝修得好日式，食物品種都算幾特別。我試左佢嘅玉子燒，拎上手果陣好夠熱出唒煙! 見到應該係 order 左即做嘅。玉子燒入面有粟米，蟹柳同芝士😍 好好味! 仲有鰻魚汁但我走左沙律醬。我覺得真係好好味,值得推介俾大家! 佢都仲有好多其他款式我下次想再試下。

平時收得夜都會係登打士果頭買 d 宵夜, 但選擇唔多, 一係茶記一係就最普通果 d 街頭小食炒麵腸粉生菜魚肉。之但係俾我發現左一間都收好夜下嘅店, 而且賣嘅食物種類唔係經常食到嘅。幾有風格。果晚十二點半左右佢仲未收舖, 我叫左一個玉子燒, 貪佢唔太熱氣又飽肚。除左我, 果陣都仲有兩個人等緊外賣。我等左四,五分鐘左右, 就已經搞掂喇! 個女店員都好 nice, 同我講佢冇紮得好實個外賣賿袋因為費事 d 熱得濟有倒汗水, 都幾細心。我覺得呢間小店都唔錯, 而且係要支持下 d 小店既。*特登係佢入袋前影一幅相，返到屋企個玉子燒仲暖暖地但啲紫菜木魚淋左。下次都係即食好啲😆

玉子燒好滑好好味，應該加左鲜奶落去，d帶子好鲜甜，好香而且味道不錯，最重要不是太重口味，而且帶子一定要大粒先至好食，佢就做得到，價錢不貴好抵食，這間店舖值得再去

我鍾意炸雞既程度係韓式炸雞, KFC炸雞, Jolibee 炸雞, 豪大大炸雞, 或者街邊不知名小食店既炸雞都會食。而呢間瀟灑哥既炸雞都好唔錯 (雖然佢叫唐揚雞唔係炸雞!)我見到佢個 menu 炸雞係有 3 種味道揀: 1. 七味鹽 2. 黃金味 (即係咸蛋黃) 3. 避風塘味 (呢個勁吸引!!) 我最後係揀左比較普通既七味鹽, 睇下佢乜料。登登登凳!!!! 七味鹽唐揚雞!要讚既係佢層炸皮係超超超薄!! 我諗成舊雞 3% 係炸皮 97%係雞肉!!! 平時有d食到既炸雞外層真係厚到乜咁, 成大個炸粉皮但舊肉得丁屎咁大粒。呢間堅係真材實料, 而且雞肉好嫰, 應該唔係平價雞胸位。良心小店! 又有 heart. 睇黎再去登打士除左豪大大我都可以有多個選擇喇!

早排同 friend 係登打士廣場嘅 cafe gathering.... 正常啲 cafe 都唔荒好食而且食唔飽，但地點方便又唔太貴。。所以係garthering一個好地方。有見及此,我同個兄弟決定係樓下吉幾串野食先上去。就係登打士廣場棟大廈入口嘅隔離，有間新開小食舖。我見都有啲人排隊又唔想行咁遠，就決定係度買嘢食頂下肚。佢都幾多食物選擇，而且唔係大路嘢拮一串串果啲小食。我睇左一陣決定叫望落都幾飽肚嘅日式大阪燒。佢有兩款， 煙肉魷魚就$40 蝦就加多$10。俾錢果陣店員話要等10分鐘左右, 我同個兄弟企係欄杆邊一路吹水一路等。 唔駛十分鐘就有得食。拎上手, 個大阪燒夠哂份量! 好墜手同足料。而最緊要當然係好食! 真係好食。如果唔係之後約左飯局, 我一定叫其他野食。呢間嘢值得推介!第日行過都會試下其他野。BTW, 前少少開左間泰式飲品店,好似幾掂。

周不時都會去旺角掃下街... 估唔到今日有驚喜! 俾我搵到新嘢! -其實呢間瀟灑哥我之前有經過過... 仲食過佢嘅炸牛肉薯餅，即炸幾好味，但未足以我開 post.-我今日係想講佢嘅大阪燒! -料方面有椰菜，魷魚同煙肉。本來可以加蝦但我冇加，結果都已經覺得好好味!-等呢個大阪燒要十分鐘左右... 師父話每邊要烘三分鐘總共烘三次先會好食。我落單之後佢先溝材料而唔係一早溝定👍🏻 呢樣要加分-終於等到，啲菜仲係脆口又冇草青味😍 真係好好食。而且份量好夠，夠兩個人 share. -我一定會再 encore 呢個大阪燒，為左佢，等耐啲都唔緊要!

經過旺角，唔想又係食炸雞魚蛋燒賣果啲，所以今次係街尾果邊開始行。行到登打士廣場隔離見到一間鐵板小食叫瀟灑哥。見到佢煎緊牛好香但佢有好大個牌賣玉子燒都好吸引，所以我冇叫鐵板小食。玉子燒應該都係招牌菜... 我前面都有個女仔叫，等左兩三分鐘左右，唔算好耐就有個熱辣辣嘅玉子燒喇。我揀左明太子味(佢本身仲有個粟米味)，入面仲有芝士同粟米。上面就有蟹籽同木魚絲紫菜。我食果陣仲有少少拉絲效果! 暖笠笠有足料，好好食