煌宴酒家

營業中

休息中

屋企人生日 諗住去酒樓食下海鮮😗點知酒樓食海鮮咁伏☹️乳鴿佢都排得幾靚 啲肉都嫩滑 同埋都大隻 有肉 皮都脆脆地 算係唔錯嘅一道菜 😋我哋最期待嘅龍蝦到啦 size都算係有返咁上下 但個汁係冇味嘅 龍蝦嘅肉又唔彈牙 又唔爽口 唔算好新鮮 到個豉椒炒蜆 真係我煮都好食過佢 可能佢唔記得落鹽 顏色係有 但係隻蜆係一啲味都冇架！真係點解可以一啲味都冇😭好彩啲蜆係冇沙 但都應該係我食過最難食嘅豉椒炒蜆🙂*同埋如果想員工幫手影相都要小心啲 幫我哋影相個員工爭啲連部電話都跌埋

係呢間酒家飲過幾次下午茶係幾好，但未試過佢嘅晚飯，所以今次特別去試下佢嘅晚飯,首先見佢有個3選1 有個可以送碟叉燒，叫咗個波羅炒骨及個炒通菜。個叉燒係細碟，肉質都食落唔硬，所以都可以，送嘅嘢係咁常下啦，個波羅骨就肉比較硬，味道就一般，碟炒通菜就入味，都想唔錯，但出菜就出得好慢，來咗個餸茶唔多食完其他餸都未來，食得唔係咁舒服，食下停下等，所以試過一次就算。

新冠疫情影響下已經好多個月無跟好朋友聚舊，趁最近疫情稍為緩和於是決定約返啲好友出黎聚聚，傾下大家呢幾個月困系屋企嘅時間系點打發。今晚約左朋友系將軍澳新都城煌宴飯聚，換轉系之前晚飯時間加上星期五嘅日子一定要等位，宜家無訂位都可以直入去攞位，本來以為宜家生意淡靜會推出啲平價套餐，點知系連特價菜都無，真系有點失望，可能系商場入面嘅關係，價錢一啲都吾平，比起系市區嘅酒樓食可能重要貴。掛住同朋友傾計，忘記左映低餸菜，點左2隻乳鴿，金銀蛋勝瓜，茄子牛仔骨，通菜炒蝦球，咕嚕肉，除左乳鴿覺得幾好味之外，其他餸菜都系好一般，不過系至在同朋友吹吹水見見面而已。

親戚話樓下間酒樓非常抵食，於是吹雞叫我哋入去食番餐好嘅！有龍蝦有蟹真係好吸引…星期一至四一圍都只係1688龍蝦大大隻，起碼有三隻！每人分到半邊或者一隻蟹鉗， 一定有肉食！龍蝦都幾新鮮幾大隻，肉質彈牙結實， 高水準翡翠彩雲雙蚌仁， 味道幾好，但唔係重點…所以已經唔記得詳細係咩味蒸元貝元貝唔算好大隻，但係都唔會太細，蒸得剛好 ，上面的粉絲先至係重點，正！瑤柱雪燕，正常，有口感，不會有太多生粉太杰的問題炸子雞！好食，嫩滑有雞味！高質！金蠔發財大利煲沙巴金花斑， 魚肉蒸的剛好好鮮嫩，條魚都好新鮮，高質！重頭戲長腳蟹，因為食到隻手太污糟所以冇影相… 長腳蟹好足秤，蟹肉都好結實，而且非常之鮮甜！ 畀客人影完相之後，會幫客人分蟹，剪好一隻腳啫， 蟹膏好多蟹頭都有肉，大家都食得好滋味！可能個人比較鍾意食凍食嘅長腳蟹，今次食熱食覺得冇凍食咁好食，但係都唔差 ，148蚊一斤嚟講算幾抵！可能抗疫期間酒樓都要諗盡辦法吸引客人，圍餐真係非常之抵食！而且每樣食物味道都很好，碟頭亦很足！絕對食得過！

提早團年，第一次光顧這間酒樓，早幾天已訂座兩圍枱，並且下訂金，要那個套餐都已經安排好，我點了兩份一樣的套餐《賀春宴》，沒想到都會發生這種事情。其實食物方面算是正常好食的，但服務方面實在....想找個侍應幫忙都真是得難，真的是叫天不應叫地不聞，每個人都好似當你不存在看不到一樣，嬲嬲豬。光是要求上菜都分別跟三個不同人說了，給侍應拿走要求換的東西也沒有換回來，後來要找另外一個侍應幫忙，最後要等到35-40分鐘之後才能吃到第一道菜，老人家跟小朋友也給餓壞了吧！而且上菜不是跟餐單順序的，這道烤乳豬本來是最先上的，後來變成這晚的第二，三道菜，混亂非常。《鴻運乳豬全體》《發財好市大利》《 紅燒竹笙海皇燕窩》燕窩在哪裡？可能是溶化了吧？《 碧綠蝦球蚌片》《 金銀蒜粉絲蒸元貝》《 清蒸原條大沙巴躉》《 金瑤柱扒豆苗》幾乎沒有看到瑤柱，只看到很多金菇碎扮瑤柱？《 脆皮金雞報喜》《 五穀豐登》《 賀節糕點》這個薑汁千層糕很好吃，熱騰騰軟糯的。

住附近 ，一個月飲茶食飯都 5，6 次... 不過真係忍無可忍.... 同先生 2 個人通常唔搭枱， 但d 人成日自出自入 ， d 阿姐見坐低就開咭俾人.... 最過分係 9 點幾等到 11 點， 早茶都冇得飲.... 點解 ？！ 因為d 人唔拎飛就衝入去坐 ， 搭枱嘅 一見有枱自己又搬過去坐....咁不如唔好等位啦....但成件事都唔可以怪晒d 員工 ！ 因為真係冇乜樓面.... 踢晒腳 ..... 而家寧願揸車落九龍灣飲都冇咁谷氣

一日之計在於晨，今早相約家人黎飲早茶，早市的酒樓是街坊的聚腳點，全場都差不多爆滿。但店員姐姐比較少，所以僅有的店員忙過不停。早茶的點心紙有唔少特惠之選，蝦餃每籠2粒，每人可叫一籠，$4.8。蝦餃是剛蒸好，熱呼呼的，蝦也非常彈牙😋😍蒸鳳爪排骨飯，飯不會很油，比較乾身，像客家的蒸飯。🤤$10.8我們還叫了早晨孖寶雞包仔及奄春蛋燒賣。$22.8我們2位埋單都係用左$65包茶介，已食到好飽，比較大家常食的快餐店🥞🍳🍽試下中式酒樓食返一盅兩件也是其中一個性價比高嘅早晨選擇。🤓

星期日一家尼到度食晚餐其中點了優惠4隻「蒜蓉粉絲蒸大元貝」88元但結果太過份，於是要影低寫食評元貝係粉絲墊底，一薄片元貝肉放面，與殻分離開頭以為廚師將舊肉切開易熟d但用筷子搵均成個貝殼，都只有圖中一片望落仲似乎少咗一忽但影相時我係未食架！打橫睇睇添切到薄過筷子頭呀！另外三隻都係同樣情況（但家人已經食緊所以無影相）粉絲同蒜蓉份量係好充足，味道都無問題但呢片薄肉食落口係又鞋又無味我非常懷疑粒肉同個殻無關係個殻只係一個器皿究竟係d「大元貝」天生骨骼精奇定係有人唔老實將一粒肉切開三、四片賣呢？相信大家都心裡有數負評！

這是一間十分混亂的酒樓，無論在排位，叫號，點茶等等；只於排位，無論你是自己或搭枱的安排，極之亂；點茶又錯漏百出，至於服務員的態度還可以，但可能因人手不足的關係，十分趕；食品方面，味道還可以；但仍然覺得只此一次，下不為例！

嘢食過得去，賣相 ok，香味、味道有一般酒樓嘅水準，扇貝嘅火喉恰到好處，不過炸子雞就有啲過左龍、啲肉比較 un。服務算係咁，有咩要求等一陣都有人幫我地跟。不過環境就真係超唔掂，二十人迫埋坐一張十二人枱（係，真係 20 人坐一張 12 人枱！），每次上菜啲滾熱辣嘅食物就咁喺頭頂經過，真係好牙煙，感覺好似要挑戰健力士世界紀錄一張枱坐最多人咁，目測好多枱都係坐得好迫……超無奈！咁岩呢晚有婚宴，音響有啲嘈。一句講哂，以後都唔會再嚟！

7/3/2019 @ 將軍澳 煌宴酒家今晚約咗班親戚食飯，去咗將軍澳煌宴酒家食圍餐。上湯焗波士頓龍蝦伊麵， 龍蝦超大隻超多，起碼每人分到半邊龍蝦十分大碟！伊麵夠味而且唔會一攤攤。乳豬全體又香又脆，而且乳豬一啲都唔肥！豬皮炸得非常脆身翡翠彩霞雙蚌仁，蚌十分爽口 蜜糖豆新鮮爽脆！碧綠龍躉斑球，斑球超正！ 啖啖肉得黎，肉質十分結實彈牙！蟲草花蒸班腩， 十分香，有魚的香味亦有蟲草花豉汁的香味金蒜粉絲蒸元貝， 不用點底下的豉油都十分夠味，蒜蓉十分濃味海黃金瑤燴雪燕，大大碗， 唔會好杰或者有一pat pat未煮開嘅生粉臘味糯米飯，屋企人最愛係咁話好食好食一品燒雞， 唔會好油，雞皮仲係脆的，有雞味星期一至四去食12人一圍只係1688，真係超級抵食！！

當晚到新都城3期買野,經過此酒樓,見內裏面幾新淨光猛又見menu上有優惠,如48元半隻北京片皮鴨,半斤蝦/切雞免費等...,於是我地两公婆不妨入去一試.....!入面台上有部大營幕tv可睇感覺唔錯!!!睇咗menu後就叫咗清蒸沙巴龍等仔,上湯花膠春菜,半斤蝦,半隻片皮鴨要(加20元)冇問題始終唔係貴.....!首先係半斤蝦上抬,不過不失但有兩隻梅梅地;等一輪後蒸魚到,見到只係一条死魚,現今周圍都係用緊平價遊水養魚,竟然仲用死魚,我地心想希望還有兩餸會好d,,,,,,跟住上係上湯花膠春菜,係乜味都冇,一般人會煮得好佢好多,我地只係食d菜,d花膠唔知咩膠來我地唔敢食;其後再等等等.........再等等等.....,最後終於等到片皮鴨上枱,好嚇人......,成個碟得d好細片7~8片,勁似人地隔離抬食剩既餸尾,個籠薄餅全部都好濕叠實晒係拎唔到上來,再換一籠又係好濕仲發現有隻死咗既烏繩仔..........!成餐飯要等等等d餸,仲要你食成差唔多兩個鐘,可能佢地想d客留耐d係度充生吓個塲面......!另外,此酒樓係大型連鎖式食肆,冇想過佢會咁差!以特別優惠方式吸引客人入去,好有呃人feel,

新年去食開年晚飯， 門口已經冇接待員，拿位要自己行入去叫人先有人應！😓坐低，講完要加多一位，總共講三次先有人黎開多個位！🤬點菜叫足五分鐘都冇人應，但係見到有一個侍應做足一張枱，其他枱既客人係無理過！要自己起身去搵人點菜😡🤬分翅，6個人分8碗，真係大吉利是🤬阿姐話：「一次過分晒佢，唔駛放過碗係到！」😡😡😡😡😡😡😡成餐飯野食只係不過不失，服務仲衰過茶餐廳！🤬😡🤬😡🤬😡

12月28日星期五10:45am在煌宴酒樓，一名女員工工作態度十分惡劣，我當時Order咗嘅食物還未到，打算叫佢替我跟進一下，我見到佢擺明見到我叫佢的，但佢扮睇唔到我，之後我再叫佢，佢竟然乸起口面，話唔好叫我，服務態度有待改善👎🏻X＝愛

新都城其實都幾多酒樓，週末既時接近間間都要排隊，上星期食左煌宴酒家附近個間，因為見唔洗排隊，點知真係中中地伏😅，所以今次見到呢間唔算多人排就等一等。.呢間酒樓都幾靚，環境乾淨，服務都OK- 乳鴿做得幾好，皮夠脆夠香，而肉唔會好‘蘇’，有肉汁👍🏻- 薑蔥牛柏葉份量都幾多，仲有好多菜係入面。牛柏葉還算新鮮爽口，不韌，而且都幾香。 - 黃金糕有三大塊，椰香味都幾出，口感好煙韌，但偏硬，唔夠軟熟，同埋都幾乾👎🏿👎🏿 - 叉燒腸粉粉皮好厚好粉，難食👎🏿👎🏿 - 椒鹽魷魚蘇係呢堆野之中最好味，炸粉薄得黎炸得香脆，不會油膩，魷魚都算新鮮，還算爽口彈牙，表面灑左避風塘調味料，令味道更上一層樓👍🏻 - 奶黃包好差，仲差過超市個d，奶黃味好假，餡又少。整過黎講，不過不失，但又未稱得上好味。