影片
更多
2020-09-06
4808 瀏覽
又喺星期六嘅行山日，無辦法啦，封場搞到波無得踢，行山就喺另一大「勞動」嘅興趣。今次唔再晌附近行，趁好天氣，跟朋友走遠啲去到粉嶺沙頭角，行鹿頸一帶，但都揀條輕鬆啲嘅，由鹿頸行到去谷埔附近，再折返，平路多，丁點山路，計埋啲打卡時間來回大概2.5小時，算好輕鬆，沿途都有點靚海景。最後，返到近鹿頸附近，揀咗晌「發記士多」打躉嘆抖兼食晏，貪佢人少啲，又對到海景。先介紹吓環境先，晌呢啲地方食嘢，小弟就覺得環境一環頗重要，因為食物點好都唔會做到龍飛鳳舞咁。晌鋪面就一眼睇晒，雖然喺「士多」咋，但都花咗啲心思，尤其部分露天位，大大張藤椅，配合大傘加上樹蔭，好有渡假感。唔知大家有無留意，佢個場每樣嘢都好新簇，枱櫈呀，膠簾呀，都唔會殘殘舊舊，地方非常整潔，予人觀感好好，而且，餐廳尾裝咗兩部「窗口機」，估計太熱嘅時候，拉起晒啲膠簾，開埋冷氣成個場就爽晒。雖然今日都幾熱吓，但又幾好風，加埋吹風扇都夠涼。再者，依家疫情雖已大大緩和，拉起晒啲簾通通風仲好。上文講過揀呢度都喺因為有啲海景睇吓，所以，我哋就專登揀咗藤椅後面張1號枱，望住個海。點解唔索性坐藤椅？一來吹唔到風扇，二來食嘢真喺唔太方便，齋飲嘢就得。介紹吓有乜
先介紹吓環境先，晌呢啲地方食嘢，小弟就覺得環境一環頗重要，因為食物點好都唔會做到龍飛鳳舞咁。晌鋪面就一眼睇晒，雖然喺「士多」咋，但都花咗啲心思，尤其部分露天位，大大張藤椅，配合大傘加上樹蔭，好有渡假感。
唔知大家有無留意，佢個場每樣嘢都好新簇，枱櫈呀，膠簾呀，都唔會殘殘舊舊，地方非常整潔，予人觀感好好，而且，餐廳尾裝咗兩部「窗口機」，估計太熱嘅時候，拉起晒啲膠簾，開埋冷氣成個場就爽晒。雖然今日都幾熱吓，但又幾好風，加埋吹風扇都夠涼。再者，依家疫情雖已大大緩和，拉起晒啲簾通通風仲好。
上文講過揀呢度都喺因為有啲海景睇吓，所以，我哋就專登揀咗藤椅後面張1號枱，望住個海。點解唔索性坐藤椅？一來吹唔到風扇，二來食嘢真喺唔太方便，齋飲嘢就得。
介紹吓有乜嘢食，晌門口有個牌寫住啲推介，每日限量嘅烤沙頭角吊桶仔，冰菠蘿（唔喺茶記嗰啲菠蘿冰呀）。
其他食物，主要就有三文治、多士、公仔麵、港式小食、茶記熱飲同埋汽水，絕對喺大路嘢。不過，嚟得呢度食嘢，就唔好同市區啲茶記、快餐店比，定價肯定貴一截，當喺支持吓呢類鄉郊小店。
順帶一題，士多裡面仲放咗啲「那些年」我細個時嘅零食，雖然只得幾款，就算唔買，回憶吓都幾過癮。
枱面貼咗張提示，到士多裡面點餐，食完後將餐具送放到去回收區，簡單嚟講就喺無乜招呼。從觀察所見，由落單、煮麵、到送餐嚟都喺一位阿姐一腳踢包辦晒，雖然，都見到兩位老人家幫吓手，估計喺其父母，但都喺坐晌度「座鎮」吓居多。
此外，一切餐具都喺自助，就放晌鋪前右邊。雖然喺咁，但落單時阿姐會問你坐幾號枱，之後，煮好會送嚟俾你，仲連埋基本餐具。
綠寶橙汁、麥精 $12好懷念呢啲舊式雪汽水嘅凍櫃，依家賣少見少，難得老細「還原」士多模樣，整番部擺晌度座鎮。所以，原來想飲忌廉，即時轉汰揀綠寶啦。
順帶一提，店家嘅飲管用上「小麥吸管」，估唔到就算喺家鄉間士多都咁支持環保，抵讚架。不過，吸管好幼身吓，啜起嚟感覺無咁有感。
而綠寶橙汁，老實講，絕對喺懷舊吓大於好唔好飲嘅考量，綠寶算喺死甜嘅橙味糖水嚟。
五香肉丁煎蛋出前一丁 $38老婆今日都破少少戒揀多咗肉，無辦法啦，幾款食材都喺肉，五香肉丁相對無咁加工（比起火腿、餐肉、腸仔），就以五香肉丁配煎蛋（要加熟，但可選太陽蛋）。份量都幾十足，俾夠兩隻蛋，五香肉丁估計都有半罐份量，連啲罐頭內嘅辣油都唔嘥，倒咗唔少落去，加重「五香肉丁」風味，真喺不得了。其實，整個組合都無得點輸，但加咗咁多辣油，老婆怕太油，結果同我交換咗個麵底嚟食。
火腿餐肉出前一丁 $38為咗試唔同款式嘅食材，小弟就揀咗火腿搭餐肉配出前一丁（可揀福麵或福米），同樣份量無欺場，火腿都應該喺用白豬仔。火腿、餐肉都煎得香口，表面仲有啲焦脆感，啲麵又煮得剛好。搭埋老婆啲煎蛋、肉丁，小弟碗港式「四寶麵」真喺食得我好飽。
上文提到碗筷自助收拾，幫忙回收，我哋都好乖、好合作，食物殘渣倒去廚餘隔，碗筷就放晌膠盆內。
有時行山後嘅食評都會分享少少行山風景，由於今次嘅景都幾靚，又唔難行，值得分享一下。
結論，去到鄉郊，如果你想慳錢嘅，一喺就自己帶食物嚟野餐，一喺索性搭番車出市區食個午餐、茶餐。否則，慢活一下，坐晌度吹吹海風，食個餐蛋麵，可以講喺港人嘅浪漫，兼且，支持吓呢一類鄉郊嘅補給站。
張貼
