羲和小館 (已結業)

1) 上菜速度極慢，落單時間12:45,但去到13:15片皮鴨仍然未上檯。三催四請後都淨係上兜皮&醬俾你，隻鴨？再等10分鐘喇你。2) 醬汁上明顯有頭髮，照樣上檯俾客人。3) 餐廳入座率不足五成的情況下，一直舉手都無職員理會，要自己起身去搵職員跟進。4) 姓翁的女職員(Lily)態度散漫,即使見到顧客舉手示意亦不予回應，其實咁唔想做野就返屋企喇。5) 食物質素一般，個牛奶布甸完全無味，只係一舊白色既固體，垃圾。東薈城有咁多間餐廳，今次竟然咁唔好彩俾佢厄左入黎食，真係諗返都揼春。垃圾餐廳無下次。

我係星期日晚飯,一行8人,好在早前訂了位！！點了一個6人套餐,原先怕不夠,但原來每款餸都足夠份量,有烤鴨、酸菜魚、4款前菜、5個主菜、2個主食、1個湯、4款甜品選擇、還有1杯冷/熱飲品！！食物有特色,擺盤精美(絕對適合拍照👍🏼),味道有好80分(係有兩個餸比較鹹),服務很適度(不會叫天不應叫地不聞😃),甜品,飲品正常冇特別！！大致感覺良好,唯一係出餐太快😂,可能係自己食得慢！！整個套餐價錢真值得一試再試！！

一行6人，櫃檯俾咗間房仔我地。唔知係咪星期日晚市好忙，落單同上菜侍應都嬲爆爆咁唔係好應人。最先上菜係片皮鴨擺盤好豪華，侍應上完菜就走咗，當我地望住分開咗3碟嘅鴨肉同多種醬料，唔知從何入手之際，同行一人發現轉轉盤攝住咗一張“說明書”。原來3碟分別係鴨皮、鴨胸肉同鴨腿肉。鴨皮可以點爆炸糖食，好有趣。鴨胸胸肉就咁點自家秘製黃芥末。鴨腿肉除咗傳統包青瓜絲、京蔥絲、甜麵醬。仲可以用新式食法包山楂條、紫洋蔥同藍莓醬。顏色好靚。桂花蜜山藥相比平時食開清爽的山藥，呢個比較粉，好似食緊好粉的蘋果咁。配埋清甜桂花蜜。 大家一致覺得應該歸類到甜品類，最尾先食。蝦乾冰草表面一粒粒冰粒咁小透明，食落都好似咬緊薄冰咁清爽。配醋汁好似食緊沙律咁開胃。啫啫a菜煲辣子雞被辣椒與香蒜覆蓋的雞粒炸得穌脆可口。不得了。十級juicy。酸菜魚魚肉嫩滑，裡面自帶配料萵荀與薯粉。鹹鹹酸酸，無食到好重味精味。NICE!鮑魚雞粒炒飯是晚vip，極有鑊氣，飯粒粒粒分明，得到大家一致好評

我大囡真係好鍾意食片皮鴨，好多時去東涌行outlet一定會去食。還記得上一次食2020年10月，正值疫情期間，所以都少人出街。但上次食，會有👨🏻‍🍳廚師即場表演🔪片皮「鴨」，今次完全冇，由廚房切好上菜，而且份量好似少咗😑😑。另外點了一份「小籠包」皮厚不好吃、「鹹蛋魚皮」算是好了、「羲和小肉餅」更是難吃🙃🙃

最近成日去東涌，outlet、大佛、行山、機場、維修區⋯⋯好似同東涌特別有緣。本來想食酸菜魚，後來發現呢間《羲和小館》除咗酸菜魚仲有烤鴨食，又可以食小籠包，滿足各人的願望！午市套餐包咗幾個唔同組合，四個人食到最尾都食唔晒，要將個「鮑汁雞粒燜飯」打包返屋企😝烤鴨好肥美，片皮鴨燒得好香脆，肉質鮮嫩，質素真係唔錯，不過係有啲油膩，所以其實四個人分差唔多。濃湯酸菜魚，熱辣辣酸酸地夠晒開胃，食完片皮鴨感覺冇咁肥膩。不得不提特色前菜［蜜汁脆芋絲］，好似食薯條咁脆卜卜，加上拔絲蜜糖，好食到停唔到口！靚湯有松茸素羹，金湯海皇羹，清甜滋潤好好味。總之呢餐就大滿足，食到捧住個肚走！

東薈城擴建重建後多咗好多餐廳，今日嚟到羲和小館，平日六點入都有幾枱客食緊了，估唔到愈夜愈多人，證明真係唔錯？羲和三寶 烤鴨🦆師傅即場片皮，之後俾咗張卡仔我哋介紹食法🫢 原來呢度賣點係會跳舞的烤鴨😧三食分別有鴨胸皮、鴨胸肉、鴨腿肉。而跳舞就係鴨胸皮沾上藍莓醬及爆炸糖，本身都怕伏，但點都要試吓吧。咦～點知又幾得意喎，味道不差，仲有D夾添。食得又玩得，雙重享受😂 鴨胸肉建議就咁蘸秘製黃芥末醬食，酸中帶甜，好過癮😍 本身都鐘意食黃芥末的我幾鍾意！最後就係傳統食法：包薄餅，加甜醬，青瓜京蔥絲；另外就有藍莓醬夾山楂條和紫洋蔥。要一讚的係鴨皮係出煙的，薄餅又有㷫住所以唔會變凍變硬👍🏻上海擔擔麵🍜同平時食果D不一樣，花生味無咁重，反而係麻味重。麵都唔係食開彈牙的，係腍身的上海麵，所以口感又差咗D。金沙海皇豆腐🍲呢個係因為想食豆腐清清地而點，反而有驚喜😃大大碗石鍋好鬼熱，食到尾都仲係出煙的😝 要慢慢食。個咸蛋黃芡好香好正，海皇好鮮，如果送飯一流🥶羲和小肉餅呢個真係好奇試，一卷卷好似好得意。但咬落係似酥餅咁。。但又黏黏的。支試管係醋來的，加落去調一調個味，等個口食落無咁膩。但總結係試過就算了🙈

巧耐茅食片鴨，見到午餐有追加優惠就黎試吓。羲和馳名烤鴨跟餐追加$228 有半隻，師父將烤鴨分成3個部，再跟一個八醬拼盤及一籠暖暖地嘅薄餅皮，不過等候時間長左d，可能等兩枱叫左半隻先起。層餅有10塊，每人食5塊再追加一個午市套餐，兩個人夠哂飽。

除非你想浪費錢又食到一肚氣，咁你你入嚟呢間餐廳啦我哋叫咗一個四人餐首先飲品淨係上咗三杯要催先上埋第四杯（仲要上錯）片皮鴨皮唔脆、肉質好普通所謂八寶盒嘅source好少要佢加醬，竟然係要收$20一碟於是就話咁唔要啦但依家上咗3次，要我哋拒絕3次埋單見到張單寫免費贈送（真係笑死）未試過食片皮鴨（$498）係要逐碟變我醬料錢前題係佢本身跟嗰碟醬少到食幾塊就點哂！甜品又係另一個笑話未試過牛奶溝水甜品楊枝甘露嘅顏色味道淨係可以食到一小啖全餐飯最好食嘅係宮保大蝦（5隻）服務態度好一般成日都唔見啲侍應，見到講咗要咩又無咗影食四位數嘅飯，竟然係要我出去櫃位埋單

間中都有幫襯呢間食肆，以前食品各方面都唔錯而且職員非常專業及會講解各款食物名稱及安排由頭盤開始順序上，今次中午同家人叫咗一個兩個自選套餐一個六人及一個兩人，點知一開始就上一隻片皮鴨先，跟住全程無交代就鍾意上乜就乜無哂次序，全部短時間嚟哂枱面擺都唔夠擺，因為兩個餐共有三十二様嘢食及隻半片皮鴨，你話點擺兼唔知食邊様，啲嘢凍哂嘢又點會好食呢！當時仍未客滿，職員叫都唔睬喺度傾計你唔問佢佢都唔問你飲乜餐飲，好地地一間餐廳搞成咁真係可惜。

慶祝媽媽生日叫左個1388四人餐點完餐啲野食係一炮過上哂期間多次同姐姐講想慢啲上食唔切怕凍哂完全無視客人既要求直至桌面放唔落我問姐姐，都冇位放仲繼續上既？姐姐只係話:廚房做左我地就上，然後轉身就走我地唯有叫另一個waitress 幫手最後加左個蓋比我地但其實後尾啲菜都凍哂唔好食要打包拎走食物方面味道非常濃，係樣樣菜都好重口味，成晚不停飲水總括而言，食物味道太濃應該好重味精，待應服務態度差，完全唔推薦

假日去咗東薈城行街，梗係喺附近搵下有咩好食，見到網上食評好壞參半，一於試試佢😂兩個人唔係食得好多，當晚淨係叫咗半隻片皮鴨.🍴羲和烤鴨（半隻）烤鴨分為三部份上碟，包括有鴨皮、鴨胸、鴨腿。而配料十分豐富，除咗平時嘅醬汁同青瓜之外，佢呢到仲配有爆炸糖，創意十足，好有驚喜！第一次食有爆炸糖嘅片皮鴨，口感好得意😋.而肉質方面，皮脆肉嫩 肥而不膩，師傅切得剛剛好，唔會太厚或者太薄，食起上嚟好有口感。店員服務態度都十分好，下次會再帶朋友嚟食👍🏼👍🏼

從來都唔寫食評但呢間實在太差！不談好不好吃，叫左半隻片皮鴨上咗3小碟全部都係炸到燶咗嘅皮同肥膏，一點肉都無。隔離人哋叫一隻鴨就係正常嘅片皮鴨。都唔駛差咁遠呀。小炒皇芋頭條放太耐，又油又硬 。酸菜魚自己超市買湯包整得仲好食過，條魚‘拿’到肉質好難食。真心覺得佢地無誠意，無技術，以後都唔會再嚟!

自己嚟咗東薈城行街，行到夜晚肚餓，路過羲和小館，抱住一試嘅心態入到去叫咗個片皮鴨食🦆當晚入到去環境十分舒服，唔會坐得十分之擠迫，建議早少少入咗出餐會快啲。呢晚嘅片皮鴨都算新鮮，而且片皮鴨嘅皮燒得夠脆，鴨肉都非常之鮮嫩，唔難咬開。片皮鴨最重要嘅仲有嗰塊麵皮，因為除咗薄之外，如果太厚都唔好食，而呢間整嘅麵皮都非常之薄，同埋唔會一出籠就凍晒👍當晚我只係叫咗個片皮鴨，份量係啱啱好。如果叫多個人，就一定要加多一至兩個小食😋

情人節套餐 $688 💞🍯蜜汁脆芋絲套餐以哩道香脆甜蜜嘅小食作為開胃前菜 用切成絲嘅芋頭被炒到焦糖化嘅糖包裹住 咬落又甜又脆！🥣湯/飲品套餐可選擇黃扒魚肚或餐紅酒 我地揀咗湯 每碗湯都有一大塊花膠~🤰主食🦆義和烤鴨（半套）師傅將烤鴨分為鴨皮、鴨胸、鴨腿三個部份而配料(八寶盒) 驚喜十足！ 除咗有平時食開嘅醬汁同青瓜之外 仲有爆炸糖、果醬同山楂糕~ 創意滿分！小編第一次食有爆炸糖嘅片皮鴨 口感又幾得意🤣🍤金沙蝦球分量比想像中多 表面以鹹蛋黃炸至金黃 咬落好香脆 蝦球好飽滿~ 好食！🥬啫啫A菜砂煲入面有唐生菜、蝦乾、魷魚 全部都煮得好惹味~ 不過味道偏鹹🍲海鮮湯泡飯海鮮湯底味道偏清淡 入面有菇、冬、蝦仁 份量唔算好多不過兩個人食啱啱好~🍮甜品甜品原本係跟仙桃牛奶布丁 但可能當日太多人叫而售罄 最後以楊枝甘露作結🥰好滿足計埋茶芥同服務費最後$799埋單💰💰小編覺得呢個價錢包咁多嘢都算幾合理👍推介！

來到 ‘’義和小館‘’ 試試馳名烤鴨🦆🥢1️⃣點了烤鴨半隻 ~ 分3part食法:1. 加上藍梅醬及爆炸糖2. 加上黃芥末醬3. 以粉皮包着芹菜、山揸、洋葱....等*第一種食法幾特別（爆炸糖），成功有脆口的感覺😆2️⃣冰鎮磯煮鮑魚 ~以切片送上, 比較容易入口,,口感爽口彈牙😬3️⃣黃金蝦球 ~ 份量十足的玻璃蝦, 入口啖啖肉, 外層以金黃蛋黃, 陣陣蛋黃香🦐4️⃣金銀蛋豆苗 ~ 不夠鮮嫰🥬