自己友

營業中

休息中

首先佢d 枱凳搭哂出餐廳外面，露天食飯，環境差都算，諗住食個午餐，50幾蚊。叫左C餐，落哂單，轉個頭又話無，但見到後到既人個個都有C餐，留哂比熟客🤷🏻‍♂️都算數，之後黎到個餐既食品又同餐牌唔同，帶子轉左蝦，好彩有見到先，一陣食左起敏感就仲衰。如果你唔係熟客真係唔好黎！！！！我以後都唔會再黎！

赤柱大部分都係貴價西餐廳，而呢度嘅價錢就貼地好多，就算平日都好多人幫襯，相信食物質素唔錯🙈我哋分別叫咗香煎海鱸魚加龍蝦汁($52)同埋香辣茄子肉燥($52)，兩款都揀咗配意粉🍝食物上枱後就隨即問你要唔要加芝士粉，作為芝士控嘅我當然好開心😆雖然龍蝦汁嘅顏色好茶餐廳，但見到隔離仲有啲椰菜就覺得幾有心思😝魚柳咬落微微脆，唔係上咗好厚粉漿再攞去炸，可以清楚咬到魚肉嘅嗰種質感，同一般茶餐廳同嘅魚柳都有啲分別，明顯厚肉有咬口好多👍🏻至於醬汁方面就唔好要求太多啦🤣至少撈意粉好好味，而且意粉唔會煮到過淋😋茄子肉燥個賣相都好吸引，有唔少大大粒嘅肉碎，醬汁都唔會落咗太芡🤩食落發現呢個配搭真係好夾！！！利申：呢篇真係唔係鱔稿😂嗰種香辣唔會令人覺得好刺激，而係超級惹味、愈食愈正🤪茄子亦都唔會因為走油而變得好油膩，又保持到靚靚嘅紫色，總括而言係色香味俱全嘅選擇😏

去到佢話會門口啲位唔開，但轉頭又會開俾熟客。咁自己等位，佢又會先上菜俾更遲黎嘅熟客。十幾個遲到嘅熟客食完，我哋都未上菜。到你問吓有無漏單，佢直接話唔等得可以走先😠除非你係熟客，否則你去到只會受氣。服務差差差👎

去赤柱想避免食太貴，都會係赤柱市集入面搵食。呢間算價錢正常，$49-$60一個午餐，包飲品或湯，冷熱同價。食物今日揀嘅係魚柳意粉，$59，揀左凍奶茶。水準係正常cafe質素。聽講咖啡都好飲，下次再試。

今日有事要來赤柱下午有兩個幾鐘休息時間咁就同朋友行左黎呢度食個lunch啦.我哋食黑松露鴨胸三文魚意粉飲凍奶茶.午餐來講佢都幾飽呢份意粉真係食唔晒意粉煮得啱啱好唔會太軟或者太硬鴨胸份量就比較少搵左好耐先至搵得到細細舊但黑松露味係幾香的總括嚟講 食得飽就算.d侍應都好好人始終赤柱呢啲郊外地方都有好多小昆蟲咁岩有一隻飛咗入餐廳我同我friend都超級驚侍應們見到我地咁都有走過來安慰我地原來佢哋餐廳入邊有個箱係專門用嚟對付小昆蟲的😂😂.食完之後我哋都坐左一陣先走chillllllllll

本身諗住去赤柱大街食快餐，上openrice 見到而間鋪頭就試下。雖然佢開係內街，但係入到去見到坐滿已經知道沒㨂錯。啲西餐仲高質過出面二百幾個啲水準，$60有羊扒食仲要好淋好入味，一啲都唔騷，龍蝦汁配意粉又好夾，份量夠大碟，一個男仔食都絕對夠飽。職員又nice, 本應我同女朋友有兩杯餐飲，其中一個叫咗餐湯得返一杯，但我同女朋友想飲唔同野，個水吧聽到自動沖多杯比我地。 完全估唔到，食而間絕對抵過係大街個啲鋪頭，下次黎會再食！

今天在赤柱練完龍舟之後，朋友帶我到這家餐廳吃午餐。餐牌有三款午餐選擇，我選了蝦肉田螺黑松露炒意粉。意粉的味道偏淡，但是口感不錯。而且價錢相當便宜，意粉連凍飲都只是$48！！！

係有誠意既餐廳, 假日去赤柱, 朋友介紹既係大街行入去既小街, 去到爆左位, 只好坐戶外有3個午餐揀。 朋友揀左海鮮叉燒咖哩意粉。 咖啡係香口唔辣而我就食呢個, 蘑菇汁豬扒意粉, 可以揀飯或意粉。 再包一杯冷熱飲品。 我叫左凍檸茶少冰少甜, 真係少冰wor 食物都算好快手, 侍應都問左幾次有冇漏order仲有一個餐係羊扒, 就要等得耐少少。結果係下次我黎赤柱都會食呢間

我們一行四人包括一位手抱的BB一同走到該餐廳門口一心想試下個午餐，一到門口話要等位，我們排第一，之後有兩group 兩位在我們後面等，都安排俾佢地先入。都算！當你想俾張四人枱我，之後有張四人枱又俾其他排我後面的人，明知我哋有大有細不照顧我哋都算，仲俾其他人打尖！個店員真係好無愛心!!仲叫我哋唔等就走！超級過分！就算赤柱啲食店全部關口我之後一定唔會再食呢間嘢！就算啲嘢幾好食，幾抵都無用。一啲都唔體諒人。（ps:最重要係我們態度好，我小朋友又好乖，等位時全程無嘈又無跳來跳去！)

十二點半行完山入到赤柱食午飯, 附近好多鋪頭都未開, 出名的餐蛋麵暫時小休, 要到下午3點先重開。走出赤柱大街來到呢間食店, 堂食幫襯的人都好多, 午餐共有4款選擇, 我和朋友試了鴨胸意粉,青咖哩雞肉飯, 跟餐可以揀湯或飲品。點餐後, 基本上唔洗等, 野飲, 餐湯好快就到;意粉同飯都好快送到。在路邊樹蔭下食飯飲野,都唔錯。食物味道不過不失。陸續好多人等位, 餐湯同某款主菜亦暫停供應, 生意唔錯! **橫街的露天位幾好坐, 難得在街頭食個飯!

是咁的，我本身住在附近，幾乎每天都會落去食早餐(如果趕得切響上午10:30前到達😜)當然，有時會因為遲咗起身，所以未能品嚐佢哋既早餐。不過唔緊要，佢哋仲有午餐同下午茶，天天不同，任君選擇，適合懶訓嘅我！首先，我想講下杯奶茶，一般嘅奶茶我都要落糧先入到口，而佢哋呢度杯奶茶呢，就唔需要啦！唔落糖都好好飲😋！食物方便呢🤔，用料新鮮，分量剛剛好， 味道完全適合嘴刁嘅香港人，選擇非常之多，實有一款啱你！仲有佢哋秘製嘅芥辣，簡直超讚👍🏻！其實我講到幾好都無用，大家不如黎試一試啦！

今天發現在赤柱大街的橫巷內，竟然有間新的餐廳，簡約裝修，位置寧靜，好似去左南歐小店，就試下先，午餐價錢亦相當合理(在赤柱這個遊客區直頭經濟)是日餐湯：老闆話每日自己煮的，今天是薯蓉忌廉湯，味道ok, feel 到用心，不似茶記貨色。7分德國腸拼漢堡扒跟蘑菇汁：汁ok, 不太重味，漢堡亦不會太死實。6.5分青咖喱雞意粉：雞肉也算滑，汁有咖喱香且不辣，但醬汁有d水水，唔夠杰身，意粉也只是白烚，沒有炒過。5.5分最後加錢飲杯Cappuccino，杯就靚，but coffee味不夠。這間算可以啦，休閒地食食，平平地ok啦。

行完赤柱賣物會，同同學仔去食午餐，再次到呢度食飯，事前打電話想訂位，店方話午市只可walk in! 去到好好彩有張大枱！午餐只淨兩款牛肉嘅！（有客人唔食牛肉所以走咗）同埋蘑菇湯只淨一碗！其他只可以跟餐飲！真係有啲無癮！跟餐蘑菇湯：估不到咁好味，蘑菇味好香！啡色啖啖都係蘑菇嘅味！好足料！好味！肉醬意粉：簡單淋肉醬汁在意粉上！肉醬有啲結塊，而且有渣！雖然味道酸酸地開胃，而且落肉醬好多！意粉有咬口彈牙！紅酒燴牛尾飯：朋友食！佢話牛尾唔夠淋！凍檸水：朋友飲！店員有禮有笑容！攞碟仔分食物好爽手！不過同廚房溝通就要加強，好多時都要行入廚房！港式西餐小店

在赤柱閒逛，見到路邊一張廣告牌介紹呢間餐廳，行到上去見一間小店，店面唔大，格仔桌布加鐵椅！裝修簡單！冷氣唔夠，我們坐內圍都覺得熱！餐牌只有午餐選擇！餐牌其他食品無提供！所以好快落到單青口煙肉香草忌廉意粉（$42）青口有啲韌，味道有啲木，唔夠鮮味！煙肉微鹹，青紅椒絲淋咗，意粉份量唔多，而且偏淋！無咬口！唔係我喜歡嘅口感！店員會問可以加芝士粉，，加咗就香啲！紐西蘭羊仔柳配露絲馬莉汁意粉（$ 48）只有三小片羊仔肉，肉質硬，味道微膻，醬汁味道鹹香，但唔覺有香草味，份量唔多，都唔夠撈意粉，意粉偏淋！無醬汁的話無乜味！一般！凍檸茶（跟餐）有柄玻璃杯，茶底唔濃，味道清爽！唔會過甜！店員爽快，同熟客有傾有講，主動問食客要不要芝士粉港式西餐！

碗粟米薯蓉忌廉湯好足料，啖啖都系粟米，正！咖哩牛腩飯d牛腩好“林”好入味，一d都唔辣，大人小朋友都食到嚿魚好滑！最衰系地方細，客人不停黎，加上落大雨，出面又坐唔到，好彩個個客人都好合作，食完即走讓比人坐！