街坊茶座

營業中

休息中

諗住隨意落去紅橋附近先搵野食，經過門口有個好親切嘅女店員問我哋食咗嘢未啊？入去試吓佢哋嘅嘢食丫～就咁就入咗去食我哋嘅早餐（當時已經係午市時間） 我地一個叫咗個常餐豬扒煎雙蛋公仔麵，一個就叫咗是日精選午餐星洲炒米，好食！👍🏻佢啲豬扒啲肉質幾好，唔會好似出面有啲茶餐廳咁用嗰啲急凍咗好耐嘅萬年肉，同埋個公仔麵煮到軟硬程度啱啱好👍🏻星洲炒米一嚟到掛住食就唔記得咗影相，佢落得都幾多叉燒條去炒，然後個調味同出面一般餐廳嘅味道有啲唔同，略嫌辣味爭啲，不過都幾好食～老闆娘好親切，見到我望住人哋隻雞髀雙眼發光咁就叫我下次嚟試吓，話佢哋啲雞髀係生炸，好好食😋

今日放工，同老公喺屋企附近睇吓有咩好食，行行吓見有間舖頭（但係個招牌其實無發光睇唔到間鋪）。門口侍應叫我地入去試吓去啲菜，我見佢咁熱情介紹就入去試吓啦。我食嘅呢係一個二人餐，佢話有一個招牌菜，再加一個小菜，兩杯嘢飲，前菜，再加送兩隻鮑魚。第一蝶嘢食嚟到，係一蝶鵝，應該有半隻鵝嘅份量，好入味同好好味，但係隻鵝既皮太肥。第二牒我哋揀咗西檸雞， 份量都好大份，味道啱啱好，唔會太酸又或者太甜，好好味。 最後既兩個鮑魚都保持到水準。因為份量太大份啦，所以食淨咗一半，打包左返屋企，食咗兩餐先食得晒 埋單$188 ，真係好抵食