誰是老闆 (已結業)

是日落大雨唔想行太遠，就近近地去左附近既茶記食晏。老實講，佢既午餐，4字頭，係附近黎講係中高，有少少偏貴。今次食左個椒鹽豬扒飯，附熱飲。幾快手，就有得食豬扒飯，份量都唔少，豬扒溫熱，咬落鬆軟，幾有椒鹽既香口味道，不俗。至於隨餐附送既熱飲，我飲左熱奶茶，就冇乜特別。總體黎講都算係一餐唔錯而又飽肚既午餐，雖然未必性價比最高。

今日LUNCH的目的地，就是這間在這區薄有名氣的誰是老闆。朋友試過這裡的泰式菜好食，今次就特地叫了這個泰式雙併餐($38)配料選擇了雲吞加香煎魚餅。雲吞不錯，鬆軟可口。香煎魚餅用鯪魚肉，口感不俗，香脆可口，不過比我預期中細。豆卜吸取湯汁後也好入味，整體OK，但又不算驚喜。下次再試個冬蘟功餐。

睇完大家評論之後，決定去誰是老闆試下肉餅。肉餅可以話係家常菜之中既家常菜，差不多個個媽米都識整，通常唔會差到去邊，但出街要食到水準以上既肉餅要靠運氣。肉餅較軟滑，應該肥肉較多，但彈性較少。 也有少許馬蹄碎和豬肉筋，豐富了口感，但稍嫌太少。 肉餅味道偏甜香，其實不錯，只是吃到大半時稍膩，最後吃不完。

今次約左個朋友係荔枝角食下午茶由於附近都係工業區，最多選擇一定係茶仔朋友建議去佢平時食開既飯堂，貪佢大件夾抵食wor 下午茶menu都好多選擇我地就點左沙律併雞脾和芝士焗肉醬意粉雞脾足足有一隻手掌甘大，而且燒得非常香口多汁，肉質咬落腍滑，味道不錯，沙律係薯仔什果沙律， 著仔份量比什果多，整體新鮮清甜，十分開胃 另外，芝士焗肉醬意粉份量算多，意粉軟硬適中，食落彈牙有咬口，酸甜蕃茄醬汁加上面層既咸芝士，焗到有少少拉絲的效果，食落惹味 以甘抵食既價錢食到吾錯既下午茶，果然值得推介

今天去了誰是老闆吃午飯，其實已經是第三次光顧了，覺得這裡的麵食一般般。因為下雨關係，貪小方便又在這裡覓食。今天很幸運，不用等位，而且是卡位。我點了咖哩龍利柳飯和凍奶茶。五分鐘左右，熱呼呼的飯便到了，碟頭飯來說賣相算是不錯。咖哩吉烈龍利柳飯咖哩味道很不錯，很”傑”身，微辣，咖哩味算正宗，不會太稀，咖哩汁吉烈龍利柳炸得算鬆化，魚肉不“鞋”，對這個飯很滿意。友人點了肉餅飯，不停稱讚肉餅很好吃很好吃，大家可作參考！

誰是老闆? 初時我還以為這設問句的答案是客人才是老闆。後來才知道原來店主是基督徒，店名意思是神才是老闆。細想又確有道理，人們既然應為神效力當然神才是老闆。實在相當有心思。我order的便是這個日式鐵燒鍋飯(雞扒)。$44，凍飲加$2。一向慣了這類鍋飯通常都是鍋大大，飯不算多，餸更少。想不到這個日式鐵燒鍋飯竟然份量十足。(之後一路食一路吹水，發現朋友們也已食完一會了，我卻還未吃完，原來不止份量十足，是頗多，食完好飽。)雞扒切燒一塊塊，厚身，又腍又爽滑。而且相當惹味，有肉汁又不太油膩。飯軟硬度適中，醬汁味道不錯。另外店內有很多聖經金句，食飯都可以研習到聖經!

唉～這天因為肚子餓了就在回公司的途中走到這間餐廳坐下來。見到還有一段時間才真正做下午茶就叫了一個麵食醫肚。 這個安格斯牛肉冬蔭公湯烏冬實在麻麻。湯底像是蕃茄湯拌了一些干紅椒，絕對港式，但也說不上難喝。烏冬是讚岐烏冬而並不是一口粉的那種。牛肉是吃火鍋最貴的那種手切肥牛，誠意滿分。這餐並不難吃但我感覺浪費了一個quota囉。

在長沙灣返工已一年多, 最近最得我地心既飯堂就是走路大約2-3分鐘既誰是老闆. 皆因佢既lunch menu既選擇好多, 平時都係A-E餐, 但佢西式, 中式, 仲有日式, 每日都有好多不同款式供選擇~ 而且味道不錯, 仲大大碟!好似今日我就叫了一個日式既飯. 是個燒汁玉子雞扒鍋飯. 單看賣相已很不錯. 味道也很好啊~ 雞扒煎得很香口, 配以燒汁很野味~ 還有蛋可撈飯食~ 正呀~ 相中那兩個波型炸物是玉子豆腐來的~ 炸得很脆, 但裡面的玉子豆腐卻滑滑的~

長沙灣食lunch ，識食梗係食下午茶。前兩日睇同事講話呢間嘢夜晚幾正，等唔到夜晚，嚟個下午茶試試佢先啦不如。真係估呢度唔到，佢啲餐具其實都幾正，味都幾好，但都係嗰句，個汁有啲咸得濟。嚟起呢度食飯，不如試吓吖。

今曰係長沙灣工作,去食午餐,近近o地就揀左依間餐廳,入到去見有肉餅飯就唔諗la..因為好耐都無食過,就試下,個餐1黎到,係超得意,係用過木筒裝住d飯,賣相好正,其實而家食飯,賣相是不能小的!肉餅味道咸咸o地,肉質嫩滑唔錯,但係d飯就扣分了,大淋,飯味1般,但整體算ok,唔錯的選擇!

以前係荔枝角做野，同事請食下午茶，都會叫呢間，我覺得都几好食，而家好耐冇食，重遊舊地食番次先，炸野佢地都出名，所以叫左個下午茶日式炸餃子，首先，炸得好香脆，表面有淺淺的金黃色，表示唔會太燶，咬開餃子，裡面肉餡好多，仲有少少汁流出，唔會乾身，我加埋辣醬一齊食，下午茶份量就可以，几好味，最後，呢度環境又闊落，整體几好

是日午餐選擇了誰是老闆這裡快餐, 中餐, 西餐, 扒, 日式, 泰式, 蒸飯什麼都有今日唔想食飯, 叫左個泰式魚餅+蝦球金邊粉超大碗, 仲有我喜愛既豆卜加料, 湯不會太咸魚餅蝦球炸得好香口又好味, 放落湯面度食感覺冇咁熱氣我幾鍾意食呢個喎 下次再點, 可以試下佢d雞翼~

呢間野算選擇多，有中式、西式、日式、連越南野都有得食。不過要快，當然係食套餐啦！是日叫了拿破侖雞扒意份，雞扒大大塊，意份大堆頭，不過略嫌啲汁有點杰。而且經驗話俾我知，原來燒汁同拿破侖汁個味道係一樣嘅！所以大家唔使諗可唔可以轉汁了！

今日與大顆同事們去探舊同事和她的小BB， 之後有人建議去tea。當時已經下午5時許，下午茶時段快要結束，於是就近地入了一間附近的茶餐廳。這間店的店名挺有趣，叫做“誰是老闆”，不知這個“誰”是哪人？不過從店內牆壁，大概可知一二。店主大概是個教徒吧！牆身不少地方都有聖經金句， 這個可能就是店名指的“誰”。店內地方寛敞，食客不多。我們因為人多的關係，侍應立即快手地找來一張長枱給我們。安坐後，我們開始研究餐牌。這裡的下午茶餐依地域分了幾類，分別是中港台泰和歐陸， 款式多得令人眼花繚亂，有選擇困難！由於之前吃過了豬腳薑，不太餓，於是簡單地點了奶醬多配熱奶茶。食物等了不久便上枱， 先來的是熱奶茶，茶味較濃郁， 入口尚算順滑，過用了鋼杯盛裝，雖然保溫， 但比較燙咀，要小心。奶醬多士切成兩半，多士中間微焦，夾著的煉奶和花生醬多到差點流出來！多士烤得香脆而且夠熱， 奶醬又塗得夠多，所以味道很濃郁，每一口都充滿了煉奶和花生醬，不錯！誰是老闆重要，最重要是食物質量好，價錢也很抵吃。說著吃著，一個美好的周日又過去了……

係偶然經過餐廳 , 見到門口餐牌鐵板餐五十幾蚊就有交易 , 所以就走咗入去 , 結果冇叫到五十幾蚊嗰啲 , 叫咗個貴啲嘅紐西蘭特級西冷鐵板餐 ,以為貴啲會更好 , 點知係嘛嘛 ! 首先西冷細件 , 比起最近幾次食過價錢相若嘅牛扒細咗 25% 至 35% 不等 ,牛扒入口較硬身 , 唔似加咗鬆肉粉 , 不過幾十蚊一個嘅港式牛扒餐 , 唔會真係用好靚牛扒 ,加些少鬆肉粉無防 , 個蒜蓉汁反而幾得 , 另外 , 等都等得幾耐 , 杯檸檬茶都將近飲完先嚟 !