譚仔雲南米線 (牛頭角下邨廣場)

營業中

休息中

想堂食要杯熱水浸下筷子都等唔到，樓面地方又多垃圾，水吧樓面又唔夠人，唉😮‍💨又落咗單，唯有轉做外賣（其實未比$，好想一走了之）但費事咁衰格😪😪😪外賣等左好耐

入座後，等了10分鐘仍然冇人幫忙落單，係咁叫我等一等，到我真係可以落單嘅時候已經過咗下午茶餐時間， 侍應聲稱因為過咗時間入唔到機，所以落唔到單，本人認為這是餐廳的責任，我已等待一段時間都冇人幫手落單，導致最後真正落單時間已過下午茶餐時段，是否應該酌情提供返下午茶餐給我？侍應聲稱因人手不足，係要等㗎啦，叫我下次早啲到，仲叫我唔好發脾氣。我同侍應講，我根本就唔係發脾氣，只係講道理，人手不足喺餐廳嘅責任，唔係我嘅責任，但而家導致我叫唔到我想要嘅下午茶餐，調返轉叫我聽日早啲到，我要早幾多？

今天本想去幫襯三哥,但疫情反覆,樓下間三哥無開, 米線癮又起, 唯有去幫襯譚仔啦!其實三哥同譚仔我同樣鐘意，佢哋各有千秋，好難去比較邊一間比較好食，始終大家嘅食物都各有優點同缺點今次就叫左三餸, 豬腸 脆肉鯇同埋金菇麻辣小辣, 湯底夠曬味道, 呢度嘅脆肉鯇又薄身又脆口而且好有魚味，絕對唔會將貨就價，而且米線煮得幾好，軟硬適中。小食叫左 雞腳筋,同埋 土匪雞翼 上面好多蒜頭雖然食完好口臭不過真係好正, 佢地嘅招牌土匪雞翼就唔使多講啦, 不過其實本人係比較鐘愛 麻辣雞翼多D不過唯一令我失望就係杯凍奶茶，一飲落去好澀，應該係茶底唔新鮮，放左一段時間，我即時同姐姐反映好采佢哋都願意俾我加錢換其他飲品，真係麻煩曬佢哋

今日周日，朝早同中同去咗打波🏀⛹🏼‍♂️，打完波之後，就三條友一齊食譚仔，在附近一齊去咗牛頭角下邨果間，中午一點到，等左5分鐘入得。三個人各自嗌左米線再加多碟酸辣雞腳。我就叫左金菇、牛肉清湯米線$38，加$8要左杯凍奶茶，唔錯，牛肉都有5、6舊，金菇爽口，最後仲差唔多飲晒所有湯添。我哋一邊食一邊傾計，由入餐廳到出番黎差唔多一個鐘頭，店員都冇趕我哋走，不過我就覺得野食慢左d黎，由落單到上菜差唔多用等咗成15分鐘。

一日新嘅開始怎少得一份豐富有營的早餐🍽 最近發現附近譚仔轉了早餐款式呀！有更多選擇更加豐富😋除咗G餐是譚仔米線系列外，其他係西餐。由A至G餐咁多款，可以成個星期每日唔同款，才$30左右咁平，就食到個咁高質素早餐！?真係仲方便過我自己煮😆，好抵食呀！ 今次我就選擇了早餐B🍞牛油厚多士🐔脆皮雞扒🍅茄汁豆番茄,🍳煎蛋/炒蛋/烚蛋,🥓火腿/餐肉/腸仔唔夠飽？任何早餐都可以加配迷你家鄉泡米通粉或迷你火腿通心粉 (唔算太迷你都大碗，我見到對面個陌生男人食得好飽) 講番個🐔脆皮雞扒，沒有想到酥脆外皮下就係嫩滑無比嘅雞肉，外酥內嫩💦，唔會好燶或者好油膩，味道啱啱好，有別於普通的煎雞扒嘅水準，好值得一試😋。🌭腸仔有煎過，不錯唔太鹹，個太陽蛋🍳又煎得幾靚，將飽滿多汁太陽蛋配上牛油厚多士真係大滿足! 下次想試埋個家鄉泡米通粉，好似都幾好食幾特別。

譚仔，一個月總會食到五六次，特別係一個人嘅時候，快靚正。套餐就係乜餸都有啲，豆卜，竹苼同菜索曬啲辣湯底，好入味，通常散叫我都會嗌呢幾樣餸。譚仔同三哥嘅炸醬味道都幾大分別，個人鍾意食譚仔炸醬多啲。

話說我已經好耐冇食譚仔，之前朋友講起話tam jai出咗新嘅湯底話唔錯，等我又跟下風先！🏃🏻‍♀️脆肉鯇木瓜魚湯米線（$43）其實見到佢餐牌寫小心碎骨我已經淆緊，但好彩最終係一條魚骨都冇食到鯇魚都有成6，7舊。而湯底都唔係話好濃味，但勝在餸都幾多木瓜口感就硬啲，都有4，5片。不過E個新出品就覺得幾岩啲唔食得辣嘅人（例如我），不過都係嗰句，譚仔嘅湯底應該有大量味精，食完嗰晚超級口渴尖椒皮蛋（$22）辣嘅皮蛋，冇咩特別好講平平哋嘅小食唔錯！總括而言，得閒落嚟食下😹

今日突然之間心情唔好，好想食辣野，咁啱又經過譚仔，見到佢嘅辣味小食好似好吸引，所以就叫咗一個川椒皮蛋。其實本身唔係好鍾意食皮蛋，但譚仔嘅辣醬真係不得了，令到人一試難忘！

其實之前我已光顧兩次，今次第三次，我每次都買過橋米線，之前兩次太太太鹹，而叫三小辣是不辣是鹹到苦，其實上兩次都好失望，今第三次再比最後一次機會此店，結果都係失望，又係太鹹，不單止今次最差連內裏D餸都差，雞太碎，豬潤超細嚿，而且還比漏咗兩片三層肥豬肉片，而另外豬肉一片果款D肉好梅，我本人是非常喜歡吃過橋，不過我試咁多間嘅譚仔過橋，你此間分店牛頭下邨近街市對面果間是實在太差啦！我以後都不會去光顧！我已經給你們三次機會，都係咁，我打電話去同佢講，個同事話不嬲都係咁份量係冇改過，我話我唔知你份量有冇改啦我淨係想話俾你知你呢間分店同其他譚仔雲南米線嗰啲味道全部唔一樣啊。旺角豉油街嗰間分店都唔係咁嘅味道，深水埗又唔係咁，九龍灣德福嗰間近MegaBox嗰度啊嗰間都唔係咁樣囉啲味道好好味㗎！觀塘嗰間都唔係咁！係真係得你呢一間牛頭角下邨街市對面嗰間，真係好差個過橋米線我食咁多年最差呢一間！你哋真係要好好去檢查下啦！

每次一諗唔到食什麼又或者趕時間最好就是食譚仔~快靚正，今日order 米線套餐番茄湯底再加一客蒜泥白肉perfect，通常食車仔麵或者米線就好頭痛唔知食乜餸好，譚仔最好就是食套餐因為唔使諗食乜餸一次可以滿足好多個願望，套餐有魚蛋,墨魚丸,牛丸,豬潤,牛肉,豬肉,雞肉,腩肉,火腿,炸醬,酸菜,芽菜,韭菜,腐皮,生菜,豆卜，一次可以食十幾款餸不過今日冇要辣要咗番茄湯好似爭少少，下次都係要食番辣味較為野味啲現在有張一人小食coupon 送

經常食譚仔都有啲悶，因為選擇配料吾多，所以一見有新野食都會試下，之前食過豪華版譚仔金裝接財神過橋米線，有 #黃金蟹蓋🦀 #常滿福袋💰#笑蝦蝦🦐 吾知大家有冇食過呢？啲配料都幾有新鮮感，個時想如果之後有就好了。估吾到現在都可以食到自製半豪華版😆只要外賣自取就得，加$2 有小食🥒（四川青椒皮蛋/麻辣豬耳/紅油木耳/紅油青瓜）/配料💰（福袋2件 /熟蝦 ）/飲品🥤。我的半豪華版加左蝦同小食，即時豪華左😎

平時間唔時都會食下譚仔，今日去咗呢間分店食，叫咗兩碗米線，一碟豬耳一碗米線係牛肉四小辣另一碗係豆卜豬潤蕃茄10小辣米線比平時淋咗好多如果可以爽啲就好啦，唔知係唔係煮太耐豬耳就正常味道

清湯竹笙好似好淡，但其實清湯都好鮮甜，加上叫左香草雞翼做餸就夠飽。平時食開土匪今日想試下新，但發覺都係差唔多味😂 蕃茄湯豬腸，啲腸洗得幾乾淨，蕃茄湯今日唔係好清，多左少少味精，同埋冇平時咁多蕃茄蓉，但都Ok。呢排街上好多毒素，食多啲蕃茄可幫助排毒 🙏🏻龜苓粒蘋果茶係新野，都幾清，粒粒幾有咬口，好Fresh 既感覺。譚仔全線採用紙飲筒好環保，但放得耐好快林晒，建議大家飲一啖就拎返出黎打橫放係杯上面😂

雖然由中學已經開始食潭仔食到依家，但咁多年依然都無減對佢熱愛。最鍾意雞肉麻辣五小，加個四川麻辣雞翼同凍豆漿，簡直係人生一大快事。 今日又去左食潭仔，貪佢近屋企得黎又多餸簡，好多人鍾意食土匪雞翼，但重口味的話，特別偏愛四川麻辣雞翼，可能因為佢辣，所以顯得更加惹味。米線方面簡左個雞肉麻辣湯底，咁多年都係唯獨偏愛佢雞肉，唔會好鞋，份量又ok 。

好耐無食譚仔啦，今日去到先知而家出左下午茶。我就嗌左最基本個個金菇米線(清湯底)加紅油木耳。平時都係嗌豬潤冬菇，今次第一次食其他。金茹分量好少，米線分量都係比正常少(餐牌有寫明)。平時正價時段我嗌少米線通常都會食唔晒，但今次呢個下午茶餐就食得晒。湯底同平時一樣，都係咁好味，忍唔住飲多2啖。總結 :下次會嗌返正價米線，一黎價錢唔係貴好多，但係可以食到自己鍾意嘅餸。價錢$34 (外賣加$3) 一餸米線 + 小食 +熱飲