越南表嫂

營業中

休息中

深入元朗區搵食，突然想食越南河，搵到這間越南人開的餐廳，便去一試。餐廳非常簡陋，就好似坐在走廊用餐一樣，店舖真的非常很細，侍應好似係越南人，叫咗生牛肉河，牛肉正常味，不太差亦不是勁好，湯底亦不錯，炸蝦餅等咗好耐味道OK。

點了3碗湯粉外賣，送來時只有乾乾的粉，3碗都沒有湯！越南粉沒有湯基本上等於沒有了靈魂，打開時真是極度無語。而最令人憤怒的是，再次聯絡餐廳，他們說只會退湯費$40！那有沒完成的餐點只退湯錢的道理？？不說越南粉沒有湯基整4上已不能喇。餐廳熊度也非常惡劣，拒絕退款令人咋舌，真的十分差勁！

網上有人介紹過呢間越南表嫂好食，不過佢個位置係後巷附近，環境比較一般，佢可以坐低商場內食，有冷氣，不過商場有少少異味，唔係人人接受到，我會坐低食係因為啱啱做完運動肚餓，見自己出過汗，都有啲臭，所以坐低食少少嘢就走人🙊講返食物，我叫咗碗炸雞翼撈檬，$48，都幾大碗，食得夠飽，檬粉幾多，而且佢隻檬粉幾爽口，個撈檬嘅汁分開上比我，不過我倒哂落去撈，將啲生菜絲、洋蔥絲、青瓜絲等等撈埋一齊食，幾好食！炸雞翼睇個樣好似麻麻地，不過食落去有少少牛油味，炸得幾好食，仲唔油。總括來講食物ok，環境唔得。

一直想試呢間野但兩次都有不愉快經歷第一次經dim order apps叫自取一直無接單 去到諗住拎先話已經無合作即場落車又話d野賣晒 好 比多次機會第二次經網上外賣平台自取拎到返屋企打開個撈檬 最靈魂既撈檬汁竟然無比到， 完全唔知點食打去同佢講 佢話退返錢但經網上外賣平台退錢其實好麻煩再打去同佢講時 一個電話轉左三次人佢自己都唔知自己想點 話轉頭打黎轉完個頭就緊係無打黎啦呢啲餐廳真係自己搞死自己😇無下次

好好食啊！今次兩個人去專程造訪，可以食多啲嘢，除左豬頸肉法包、火車頭撈檬之外仲叫左鮮蝦扎肉米紙捲、炸蝦餅、越南冰滴咖啡~食物質素依然無令人失望，尤其是法包，真係好香脆又足料🤤 炸蝦餅好厚好多肉👍🏻每人$108.5食到好飽 XD 呢度樣樣嘢都份量幾大，記得食得曬先好嗌！

上次食覺得超好味，價錢又平，之後一直心心念念，今日終於入元朗可以再幫襯😍今日叫左椰青🥥、火車頭河粉🐄同埋豬頸肉法包🥖椰青：正常貨色火車頭河粉：第二次食，湯底胡椒香味凸出，鮮+香，扎肉、牛丸、牛肉片、牛腩份量十分慷慨，河粉都較潮州粉麵河粉爽挺，唔係軟爛到斷曬嗰種～ 個人覺得好食過芽莊！豬頸肉法包：上次外賣，成粒鐘後返到屋企嗰時仲係好脆好好食！今日堂食仲正，豬頸肉好juicy，法包好脆好香口，其他配料都好夾好足。必食👍🏻希望下次可以試埋米紙卷同春卷～ 滿足😋註：1. 間舖好細，全間店得四張唔算坐得舒服嘅二人枱俾你堂食，多人一齊食/住附近嘅話都係外賣好啲2. 老闆娘唔算態度差唔會黑口黑面，但都唔會好親切好殷勤咁招待你。不過算啦，咁平價錢又無加一，經營小店係辛苦嘅，體諒吓啦！希望小店可以加油，生意興隆，繼續整多啲正宗美食🤤

［📍元朗｜越南表嫂］呢間絕對係近年食過最好食既越南菜佢係一間家庭式經營既舖頭 只有小量堂食位大部份顧客都係外賣 可以電話落定單先都得佢地既野食 每次都係咁熱辣辣 而且好入味越南法包好夠鬆脆 餡料好夠入味 成件事好惹味米紙卷既菜 食得出非常新鮮配搭埋佢地既秘製魚露 酸酸甜甜 好清新 好好食

店舖雖小，但食物質素搭救。主要都係做街坊生意。店員都好NICE，假日可能都要排一陣隊。🔶豬頸肉法包 $42★★★★☆法包焗到好香脆，入面有好多餡足料，個調味好好，有啲青瓜同蘿蔔絲，好清新。仲要食落勁JUICY濕潤，d汁水一路食一路滴出嚟，唔會食到覺得口乾乾！每次都必食！🔶生牛肉湯河 $51★★★★☆湯底勁好飲，夠哂鮮甜不油膩，真係可以飲曬咁制！河粉夠滑身，生牛肉唔會鞋口，肥瘦岩岩好。唧少少青檸汁，加埋啲指天椒，更開胃。呢款牛肉湯河比較上係清甜路線，食落好舒服，唔係走濃郁牛味個隻款。🌟總括：每月都係回訪嘅越南小店，特別掛住佢個法包，真係食過咁多間入面數一數二咁好食！

📍越南表嫂 ⭐️小巷有驚喜越南小店其實好耐之前已經bookmark咗，亦都經過好多次🙈但係一直提唔起心機去，因為佢嘅舖位真係比較細同迫。點知一試眼前一亮！🤩越南表嫂嘅評價都比較兩極，不過我覺得佢嘅嘢食水準中上，而且平民價，好抵食！✨豬腩肉法包 $42 👍🏻👍🏻👍🏻我覺得「叮」左下嘅位係佢個越式法包😍因為佢嘅賣相真係好一般，我知道我唔應該以貌取包……不過咬落去嗰下嗰個脆皮嘅感覺，加埋啲肉好Juicy，正🥰同埋因為我冇食過越式法包，所以可能因為咁先覺得佢咁特別！我個fd去過越南食，即刻問吓佢係咪差唔多😂佢話呢個包比較厚，但都係好好食，仲要聽咗咬落去脆嘅聲音！✨越式火車頭河粉 $65 👍🏻👍🏻（内有：生牛肉、牛丸、牛腩、扎肉）水準發揮！個湯好清香，都好足料！📍越南表嫂元朗教育路15-19號嘉城廣場地下20-21號舖（公園對面)

堂食嘅火車頭河粉同外賣嘅豬頸肉法包+越式春卷都超級好味，仲要好平！大力推薦！火車頭河粉個湯底好清澈鮮甜，極香牛骨味，而且好多優質牛肉食，扎肉都好惹味爽口，食完超滿足😋豬頸肉法包就外賣，搭成粒鐘車返到屋企，個包都keep到香脆，入面嘅肝醬都超好味，一定要試越式春卷都係外賣返去，用焗爐焗返熱食，個皮好脆，入面足料，只係鹹左少少，不過整體都係好正今次試過之後，就知道一定有下次，到而家我都係心心念念佢個法包🥖大推！

必食既係越式豬腩肉法包，佢個調味好好，d汁油一路食一路滴出嚟，有啲青瓜同蘿蔔絲，非常之新鮮，仲有兩塊好似雞肉火腿片嘅物體，唔會覺得個豬腩肉非常之油膩、重口味，我覺得肥瘦啱啱好，一定要趁熱食叫咗越式春卷撈檬，個汁係另外上嘅，你可以自己加幾多，個越式春卷脆嘅，所以你最好提早夾起佢先，再倒個汁落去，咁就唔會整濕個春卷，佢入面唔係檬粉嚟嘅，熱辣辣嘅，好味嘅調味同埋好多蔬菜絲椰汁冰係好重椰汁味，好似椰汁西米露嗰種感覺雖然店舖比較細小，但係啲嘢食真係好好味，而且完全唔貴

呢度係我第一次寫嘅食評，忍唔住要開返個AC。由佢啱啱開舖我已經成日幫襯，仲介紹埋同事朋友去食。無可否認，佢味道係唔錯。但係自從多咗人報導佢，我明白加價都係基本操作。但冇諗過連份量都咁少，我叫咗一碗牛腩河加$13墨魚餅，打開得一塊，老實講都真係幾失望。

是外賣店，位於小巷裏，不難找。可以先打電話下單，到時就取食物，方便省時。越式火車頭河粉（可轉檬粉）$65内有生牛肉、牛丸、牛腩、扎肉！足料！湯底勁好飲！筆者可以飲曬d湯！🤤越南春卷$32必叫！正宗越式春卷！炸得香脆，沾上甜酸汁好夾好開胃！扎肉法包🥖$42法包一般都偏硬，不過佢都唔算咬唔落，係好食既！好多餡！比足料！🐷🥬豬肉碎生菜包$60菜同肉碎既份量都好多！有啲辣，好惹味！🤤食過翻尋味，住屯元天既街坊不妨試下！📍元朗教育路15-19號嘉城廣場地下20-21號舖（公園對面）

首先叫咗個椰青＄30咋～**出邊餐廳通常收你$40-$50一個豬扒河檬 HK$46* 豬扒醃到好入味，香茅味超級濃郁，而且好大塊，一啲都唔un* 湯底味道超豐富, 個檬粉好入味 •豬頸肉法包 HK$42內有：青瓜、豬頸肉、扎肉，，肝醬，酸蘿蔔絲、芫荽、特色越南醬食到豬頸肉本身油香，豬頸肉好夠油脂又厚實，醃得好入味，燒得啱啱好，其他配菜酸甜清新夠晒fresh，食落去酸酸甜甜，無草青味，加埋豬頸肉同外脆內軟既法包，配合得很好，冇油溢或羶味。大大塊肉食到係咁跌肉出嚟！個包好厚實，有重量有飽肚感，仲要好食，真係抵食～炸蝦餅$48正常，外面好脆 入面蝦滑好彈牙。酸辣無骨鳳爪 $45唔係好夠凍，不過好夠味，同彈

話說3年前同朋友去過越南，當時經常食河粉同法包，日日食到我都怕，呢幾年我都無再食越南菜，但難得放假，女朋友又想食呢間遠近馳名嘅越南餐廳，我就就咗去買外賣。我好早已經去到，但店舖已經接咗好多單，開咗半個鐘，我都要等45分鐘先拎到嘢食，而且店家有啲亂，出嘢食好似無跟順序咁…但食嘢最緊要味道！ 首先一碗生牛肉湯河，湯頭清甜，牛味亦足，可惜牛肉好韌，但呢個價位都正常嘅。另外又叫咗一碗豬扒拼墨魚餅撈檬，個豬扒唔錯，香茅味足，肉質唔柴，墨魚餅就非常惹味，口質彈牙，墨魚味又夠，可惜得一舊，如果鍾意食，應該要叫小食，個汁就酸酸哋，都幾開胃。最後仲有最驚喜嘅豬頸肉法包，法包非常脆，豬頸肉就正常味道，因為佢個醬太出色，如果經過真係會叫一個食。