越港正宗越南湯粉 (已結業)

琴日下午去灣仔做完嘢，見到有間新餐廳，入去試吓，估唔到有驚喜。見主打係「蕃茄蝦湯濛」，諗住試吓，點知老闆話午市已經賣曬濛粉！有啲失望，於是就咁叫咗個雞翼河粉。下午茶餐嚟講，河粉份量好夠。本身冇諗過係炸雞翼，因為平時我麻麻哋食炸嘢。嚟到先知，仲擔心會好乾，點知雞肉好入味多汁，表皮都唔會話炸到好乾/過油。不過比起雞翼，最欣賞係湯底👍🏻👍🏻👍🏻食曬成碗河粉都唔會口渴，睇餐牌先知啲湯係用新鮮牛骨淆嘅，同味精湯真係好大對比。特別叫咗杯越南咖啡，幾香，值得一試。員工態度親切，服務都唔錯，應該會再幫襯。

復活節去灣仔，聽朋友講有間新開張嘅越式食店唔錯，入去食lunch ,估唔到有驚喜，下次會再去。呀媽叫左碗蕃茄蝦湯金邊粉，番茄蝦足料，第一啖飲湯，鮮甜又有濃郁番茄味，下次我都要叫返碗獨食平時去食越南野，我例牌叫生牛河，今次都係。個湯夠熱，牛肉嫩滑，幾好 飲品試左老闆推介嘅熱鮮柑橘水，第一次飲，估唔到味道清香，成張枱都聞到，浸耐左唔似檸檬水會澀，飲完好開胃估唔到當日有新鮮熱辣嘅椰汁糕（老闆話之前未推出架），原來熱辣辣食好煙un , 又唔會太甜，啱晒我口味食物好味之餘，老闆又好人，仲話晚市可以問佢有咩菜式，唔一定叫餐牌上嘅野。下次會再黎，希望到時有更多新菜式。

灣仔食嘢多選擇，但好食又抵食嘅越南餐廳就真係無乜。呢間位於麥加力哥街新開嘅越南嘢真係灣仔街坊嘅好選擇！餐廳唔大，但好乾淨好舒服。重點係食物質素好，我哋叫咗燒雞串、菠蘿軟殼蟹米紙卷、火車頭同埋蕃茄鮮蝦湯檬，樣樣都落足料！最欣賞係雞串又香又juicy，個汁少少辣，正。火車頭湯唔係味精底，清得嚟有牛嘅鮮味，加埋啲herbs層次更豐富，真係可以飲晒。不得不提牛丸好正，肉味濃又彈牙，如果哎其他湯河都可以加，夠flexible👍🏻蕃茄鮮蝦湯檬同樣出色，六十幾蚊碗但啲蝦竟然有鮮味！配料亦好多，每啖都好滿足。價錢方面都係街坊價，平均每樣$50~$70左右。下午茶時段四十幾蚊有碗河㖭。老闆好踏實，無搞啲咩噱頭，但就係呢種實而不華令人食得好安樂滿足。推介！