辛味屋

營業中

休息中

久久冇入荃灣多左好多新野，行過見到menu幾吸引又抵就試下。已經到下午茶時間，但仲有lunch set ，每個餐$6x-$7x左右，一個主食加小食同飲品。我叫了辛味豚麵，幼麵吸晒湯汁都頗辣，其他朋友點的拉麵就係曲麵，佢地話都彈牙，咖哩飯都好食，係正常份量所以加上小食就好飽。小食要左沙律、燒雞軟骨同餃子share。沙律清爽，菜新鮮，燒雞軟骨逼晒油脂出黎好香脆，餃子正正常常，4隻抵食！冇期待之下尼間餐廳帶來驚喜啊

啱啱去完日本去到當地食啲拉麵真係好好食!!!令人念念不忘...返到香港都食返一碗相當有質素嘅拉麵先得喇，去止止引！都唔知話好彩定唔好彩因為落雨天去到唔使排隊！Yeah~~朋友多可以叫多兩個來試吓！我係重口味自選揀咗蒜泥湯底！勁多蒜！正呀！麵底硬度都選左正常，味道揀左濃。其實呢個麵都幾fusion , 肉同脂肪比例剛剛好嘅叉燒食落好有層次，唔覺得肥！同場加映食咗幾個小食，豚角煮！串燒燒得好惹味！食落一啖肉中帶點油，係好滿足的！仲有個蟹子沙律！都幾大份gaaaa 整體而言，保持一貫嘅水準！食物質素不錯，價錢合理，one of my favourite!!

點了一個滑蛋吉列豬扒套餐，包一碗湯及沙律。自己本身對食的要求不高，但這個餐的味道，我不會再來。賣相都OK, 但一食落口，吉列豬扒好似浸完水咁冧哂，飯的水亦太多，以致成碗嘢都好似食糊仔咁。湯和沙律就正常嘅。

叫咗兩個飯+鯖魚+餃子+雞泡魚干，第一樣上菜嘅係雞泡魚干嘩，見到真係凸咗眼！係咪聖誕整鬼我呀？廚房做得出固然犀利，待應拎得出嚟放落客人枱，更加不得了，收我$55再加一，都話哂$60蚊吖，俾小小誠意好無？仲要係「淋謝謝」唔係「干」

行到荃新天地搵地方食午餐，成個場都好靜，食肆人流都唔多。哩度午餐都有幾多選擇，有雙併定食，咖哩飯等等。叫咗個辛辣壽喜燒，選烏冬。個壽喜燒主菜係豬肉，加咗泡菜，紹菜，少許生菜，甘菇，冬菇等等。壽喜燒係未熟的，連爐一齊上，烏冬就微熱湯底主要係泡菜味，味濃唔辣，豬肉有3-4片厚切，入口有嚼頭，其實都幾有韓式泡菜湯的味道，烏冬份量就較少，入口都幾彈牙。現今食個拉麵，都要$70-80，而這個餐都只係$72，（$68，另要加一），其實都唔算貴，仲要有個爐熱著嚟食

又到午餐時間就真、外面看著餐牌都算吸引，有我想食的同埋價錢相宜。店內人不多或者可能地點都偏的關係，同埋暑假未完小朋友特別多一個set 有湯及沙律，味道好幾好吉列豬份量也多，都幾好食，又可encore 了

朋友話時不時都會諗起位於TST既一間日式蛋包飯專門店，但可惜我唔太中意食呢類野，所以一直都未有同佢去食。今次就係荃灣搵到一間類似既餐廳，而且除左提供飯之外，仲有烏冬，岩哂唔想食飯既我。店外擺放住D套餐模型，賣相非常吸引~~午市定食價錢亦唔貴，最平$49已經可以落樓。我點左個吉列豬扒咖哩烏冬$62，包款前菜薯仔球同海帶麵豉湯餐廳聲稱用日本直送讚歧烏冬，係唔係真我唔知，我只知個烏冬麵粉味好重，又軟淋淋，欠缺左讚歧烏冬既彈牙感…..如果真係日本直送加讚歧烏冬，咁煮麵位師傅都好唔掂，再好既食材都浪費哂。吉列豬扒炸粉個厚度同豬扒既厚度近乎一樣，加上豬扒又實又鞋，炸粉又硬又乾，咬到牙都痛…..朋友點左個吉列豬扒奄列咖哩飯$58 奄列蛋仍然可見生蛋白，由於我唔太中意太生既蛋白，所以我麻麻地呢個奄列。朋友亦表示呢度既吉列豬唔太好食，同想像好大出入。

附近有間服裝鋪大減假，行完之後黎左呢邊搵野食，見到咖哩烏冬幾吸引就入左黎食。平日八點幾，無人等，隨便坐，店員服務態度好隨便，中唔中意就睇人啦，我無乜所謂。叫左吉豬咖哩烏冬餐，有前菜同湯，幾好食既薯仔，夠凍。麵豉湯正常，好難伏。咖哩烏冬好香，質地係稀既，因為佢係湯，唔係汁，但都十分夠味，足料，好味，唯一可更好既係個烏冬，唔彈牙，超市買既都會彈牙過佢。個豬扒正常啦，呢個價位，乾乾地算係咁，唔難咬，唔會奢求佢好多汁，所以呢個算係合格。另外加左$25要個可樂餅，其實即係薯餅，樂食喎，又脆又香口。都講過店員態度幾隨便，一路食一路聽到佢同廚房用普通話傾計，引起我注意既係佢一句「搞甚麼飛機」。我都係望一望之後繼續食野。

日日係荃新天地食lunch食到厭上openrice搵下究竟仲有邊間未試過又吾貴既搵到呢間《辛味屋》位置吾顯眼 人流都吾算多 食飯時間都吾洗等位一打開個menu好驚喜👏🏻👏🏻👏🏻超多款lunch set！價錢適中一行四人淨係揀餐都用左10分鐘😂滑蛋豬扒飯👍🏻仲有面鼓湯同埋（薯蓉..食左先記得影相🙈）份量大 足料 豬扒厚身夠淋 又有汁！好味真係好大碗.. 盡晒力都係食晒d餸 淨半碗飯連埋加一先53蚊 真係抵食😍埋單仲比張飛我地存印仔有優惠😆一定有下次啦。

星期六同屋企人出街，諗住一田優惠日行下街，未買野之前想填飽肚，又想食日本野同唔使等，就嚟左呢間。一嚟就只安排張十人枱，明明餐廳好多空間，但就間張十人枱喺中間。同8個人搭枱，好公開，周圍其他枱都好嘈，即刻唔太想講私人嘢，全枱人人都好静，默默食自己野就比錢走。我哋叫左兩個便當，價錢合理：我嗰個：肥牛金菇卷加炸南瓜薯餅便當屋企人嗰個：吉列豬扒便當便當有飯同薯蓉，兩個都飲涷奶茶。食完行左一個鐘街，馬上肚痛，之前除咗呢間舖無食過任何野，喺荃灣商場大瀉左兩次都唔掂。個肚仲係唔舒服，搞住搞住，好掃興。要急急腳搭車返屋企食藥，免得喺條街度出事。到第二日再瀉多次，但當日屋企人都有食舊薯餅，但無事，應該係肥牛卷啲牛肉出事，希望呢間舖搞好啲食物衛生 。同埋例如可以將十人枱分做6人枱同4人枱，餐廳都夠位，客人會坐得舒服同私隱好多，客人開心同食物衛生，先會嚟多啲。今次食完咁痛苦，我唔會再嚟呢間舖。

睇食評啲人講到好好食，仲要好評佔多數，咁就搵日去試下係龍定蛇。呢間辛味屋就係札幌隔離，去到門口唔洗等位，即刻坐底望下有咩食，於是叫左個二人餐試下，主食各一款，小食任選三款，指定主食要加$10先有。咖喱味道一般唔辣，冇想像中好食，吉豬比較薄，味道一般，吉列外皮炸過龍偏硬，比較失敗，蛋普普通通無咩特別，成碟咖喱飯食落真係同銀咖喱既質素冇咩分別。拉麵係朋友食既，佢就話好普通，冇咩特別，話以後都唔會試。餃子唔熱，外皮唔脆，餡料冇嚟味道，失敗。。。。炸雞外皮唔脆，略油，雞肉的調味有說不出的怪，同埋個醬都係唔多得。。。三款小食入面比較好少少，魷魚彈牙，味道還好。整餐的食物味道未如理想，如食物味道唔掂，熱度唔夠，五款入面都冇一樣係出色，冇下次。

早前，約了當時的男朋友到荃灣的荃新天地2期嘉禾戲院睇戲！ 他建議走到萬寧附近的 <札幌拉麵 Miso No.1>，因為，他得知憑戲票及票尾有9折優惠！可是店內座滿客，店員讓他走到同一個飲食集團的 <辛味屋> 入座，安排週到！值得一讚！由於，當日大家都要返工，我由上環搭地鐵趕過來！其實，由荃灣地鐵站抑或荃灣西鐵站走去荃新天地2期差不多路程時間，一上地鐵，我先叫他幫我落單，以節省大家時間！ 他一邊食一邊等我，我要 2:00 才趕到！幸好，尚有時間來個 Quick lunch！Menu叉燒炒飯定食 $49聽他形容，不用3分鐘便送上，還要快過淥杯麵！哈哈！叉燒炒飯定食包括：叉燒炒飯、麵豉湯及薯蓉，相當抵食呀！叉燒炒飯炒飯炒得乾身，份量亦恰到好處！配料切得細碎，略嫌很多洋蔥粒，尚有溫熱，整體口味不錯！麵豉湯店方的麵豉湯未至於死鹹，夾雜豆腐粒及海帶！薯蓉涼浸浸而口感軟滑！晚餐：幾十蚊換來的飽足一人火鍋 $6x 已有交易牛肉壽喜燒鍋定食 $72深啡色的湯底偏甜，基本上，豆腐放入火鍋一會兒便夠熱及入味！追加豆腐+$8，本身跟火鍋是立方體形，追加是豆腐片！勝在滑溜吸湯！烏

位於荃灣的咖哩專門店，店內日式的裝潢令人感到舒適~來到咖哩專門店當然要叫咖喱飯!我們order了漢堡奄列咖喱飯及燒雞扒咖喱飯。先介紹一下這家店的咖哩汁，看到網上介紹說:老闆交由日本的師傅，用40款香料及食材製成特製咖喱粉。送到香港店後會以豬骨湯底熬煮，製成店內有名的咖啡飯。漢堡奄列咖喱飯漢堡扒是由人手打成，不是用機器所壓成，因此入口感覺鬆軟且帶肉汁。漢堡扒配香噴噴的奄列吃非常配合。燒雞扒咖喱飯燒雞扒入口較乾和硬，如果可以做到如漢堡扒般帶肉汁會更好，當然主角還是咖喱汁入口辛香、不太辣。 大家來到辛味屋，必叫「漢堡奄列咖喱飯」喔!

第一次食呢間係朋友介紹, 第二次食係我介紹另一個朋友食, 因為都幾值得推介同翻食XD就感聽個餐廳名會以為係食辣野同得咖喱, 真係唔好比佢呃咗, 事實上係有好多日式食物選擇的, 對住個menu真係有少少難揀..我揀咗個雜錦拉麵~勝在咩都有! 蛋啦, 蟹棒啦, 海苔啦, 日式叉燒啦, 大量玉米粒啦... 食到lamlam脷! 甚至好食過某啲拉麵店, 唔會好鹹! 至於跟餐小食, 我就揀咗芝士年糕, 煙煙韌韌都好好食!我個frd就叫咗吉列咖喱飯, 有埋麵豉湯, 佢揀咗薯仔salad, 我試咗幾啖都覺得幾ok!唔洗等位, 價錢合理, 環境&食物又唔差, nice~

今日朋友帶我去荃灣食好嘢，佢今次帶我去荃新天地搵嘢食，佢知我鍾意食日本菜，帶咗我去一間好有日式家庭料理嘅辛味屋。薯仔沙律 超級推介超級好味，薯仔綿綿密密帶啲顆粒，食落有蛋黃醬嘅微酸味，作為前菜超級開胃。煎餃子 皮薄餡多，外皮脆卜卜 內餡夠juicy。雞翼同雞軟骨 雞翼皮脆肉嫩，切開單骨咁食 好方便，雞軟骨好有咬口 調味唔會太重，肉質亦都唔會好乾。芝士年糕炸得好外脆內軟，年糕軟糯帶甜味同煙un，夾埋芝士亦都唔會好膩。黑蒜油豚骨拉麵 黑蒜油超級香，湯底飲落算濃郁帶微微杰身，湯汁好掛麵 麵質適中有咬口。吉列豬扒蛋包咖哩飯 咖哩好濃帶點微甜，吉列豬扒炸得香脆不油膩，豬肉嫩滑多汁 外脆內嫩，雞蛋嫩滑 完全唔老 仲留有蛋汁。