雲泉素食中心

營業中

休息中

今日同朋友去左雲泉仙館食齋，以為都係普普通通齋店，完全估唔到環境都幾靚，齋菜又大又幾好食。門口一入去完全見到福祿壽芋頭魚，完全想象唔到超大條，4個人都完全食唔晒。栗米豆腐唔記得叫咩名，味道唔錯。炸春卷，炸得好脆，我都忍住食左幾塊。以下就真正的器玉，我朋友係咁叫我食，我初唔食粥，我半信半疑去整少少來食，一啖愛上，粥又香又滑，有腐竹味。正到不得了，我最後食左3大碗，我朋友平時食得好少野佢都食左幾碗。

雲泉仙館素食位於粉嶺坪輋，假日郊遊又想食素這地點確實是不錯選擇，仙館屬道教供奉呂祖，四周花園亭台小橋流水非常詩情畫意，故此處每逢假日都吸引很多一天團到來茹素一番，我今日就同朋友在附近行山故也特意茹素一番五色拼盤，味道適中炸雙拼春卷是用芋絲蘿蔔包成，香脆而不帶過多油份，多吃也不覺膩。西檸軟鴨酸酸甜甜。五柳炸石班內層芋蓉經過粉漿油炸而成，再淋上五柳酸汁食起來感覺不太膩補充一下這碟石班是引不住下影隔離的，本人上次已品嚐過故今次沒有點最抵讚係這碗米王有時真不用山珍海味簡簡單單一碗軟綿綿白粥已是極品，這粥之米香實在太撲鼻了假日總是人山人海

年初五去了粉嶺有機農莊, 之後去了雲泉仙館, 好入的地方, 我也是第一次來, 原來都好大好靚的, 好多人好熱鬧, 我們去了食齋, 首先去買飛,  有得買套餐及散買, 價錢大約80元一個餸, 都算合理理, 我們叫左一個套餐, 400元左右. 有五個餸. 買完飛有人會帶你去攞位, 然後就會安排送餐啦. 好多人呀. 好彩都有位. 餐具, 白飯及粥都是自己取的. 都好快就送嚟. 有炸芋頭魚, 五色齋, 雜菇時菜, 春卷拼素雞, 豆腐菇時菜. 份量都好大碟的. 春卷好香口好脆, 入面都係素菜, 都好香好味呀, 味道唔會好咸, 好味的. 都好多件呀. 素雞好味. 係腐皮做的. 入味, 唔會好淡. 芋頭魚加甜酸醬一齊食好好味, 芋頭好粉好淋好香好味的呀. 仲要好大條呀. 甜酸醬加埋一齊食好好味. 那些菇都好鮮甜入味, 味道適中, 唔會太濃, 豆腐都好香.  白飯及粥都好味, 熱辣辣. 自家製的感覺. 間中食下齋, 感覺人也輕鬆左.環境都算大及舒服.

在粉嶺火車站搭小巴，唔洗廿分鐘就已經到！農曆初四過黎，人唔算好多，排隊大約十五分鐘。先買野食，再有工作人員帶位。十幾分鐘後，五個菜慢慢送通上。啲餸大件夾抵食！芋頭魚特別好味！

工作中午餐，剛好有時間兼經開呢度，泊好車入內，先去櫃臺落單比錢，攞單同號碼牌到大堂搵位，枱面已舖好厚厚嘅膠枱布！大家合作攞碗筷，飯粥係自助任食嘅！白粥：呢度啲粥好好味，好香腐竹味，不過我呢轉唔夠熱！只係微溫！爭啲！西檸鴨：檸檬汁酸酸地開胃，炸腐皮香脆，好味！芋頭魚：今日嘅芋頭蓉太稔，無乜芋頭香，雖然五柳絲醬汁酸甜開胃，外皮又香脆！齋拼盤：我食咗酸齋--今次唔夠酸，咖哩齋--幾香，齋幾滑，辣雞丁--有咬口，辣辣地惹味！炸春卷：香脆好味！點喼汁酸酸地開胃腰果大蝦，啲蝦好攪笑，微鹹彈牙，西芹爽口，腰果唔夠脆！一般紅燒豆腐：炸豆腐索晒醬汁，鹹香好味，外皮煙韌！菜心爽嫩！啲菇好香！燉湯：阿姐極力推薦，不過湯無肉，只有瓜菜味，又無落鹽咁！太淡了！蟹肉豆苗：蟹柳賣相好假，味道幾重味精，豆苗係我唔喜歡嘅溫室豆苗，有草青味！一般！店員阿姐好爽，見我哋食飽收枱，係成塊枱布包起變做包袱咁抽走！大開眼界！齋口唔齋心嘅午餐

嚟雲泉食齋，鍾意食完可以遊下花園，睇下盤景，但無揸車會煩少少，要係粉嶺火車站坐專巴，10幾分鍾到，遠離一下塵囂聽說呢度嘅齋菜會比較大碟，於是我們三人叫兩餸，白飯、白粥任食，自己動手裝。叫咗「紅燒豆腐齋」，其實同酒樓食嘅味道一樣，但真的很大碟，有雙位倍分量吧！略嫌汁比較濃，感覺不太健康，但唔會過鹹或重口味，幾好。另一個是「五柳魚」，既炸芋頭茸，好味，如果可以走汁更好，真的好足料，食完會滯一滯。同場最like係最不起眼嘅白粥，太美味，無想過白粥綿滑得嚟咁有味道，不是淡而無味的hea粥，值得為白粥而再來

星期六同屋企人專登入去食素地方幾遠同幾入下，但有小巴直到5個人叫左3個餸都已經夠食同飽白飯同粥都任食，自己裝粥果隻味同出邊食既有d唔同，清淡得黎幾特別叫左椒鹽豆腐、雜菜、芋頭魚（掛住食無圖）個椒鹽豆腐有驚喜！以為真係豆腐黎會好林，點知一咬好彈牙，好好食，食唔停口。好似平時d魚豆腐咁，但唔知佢用咩整到咁既

已經唔記得幾時去，不過都想分享下佢咁特別既素食因爲得兩個人，佢d食物又大份，所以只係點左一樣，好似係$80既豉椒炒田螺，因爲好想見識下佢點樣整素田螺！其實食完我都唔知佢用左咩代替，但真係好似！！！唔知係咪菇呢？個質感勁彈！個樣都係卷住咁既！加埋d調味就真係好正！白飯粥仲要任裝！不過下次都係約多d人黎好d, 可以食多d野！

今日專誠到位於新界北區打鼓嶺坪洋村坪輋路的雲泉仙館，先到南齋對面點菜付款，再到南齋找位子，茶水飯粥是自助式的，店員會跟牌子送上即炒的齋菜。雖然今日下雨大家都比較狼狽，但無論店員及食客都很有禮貌及禮讓，氣氛融洽。先來的是春卷拼西檸鴨，春卷炸得香口不油膩，西檸鴨醬汁醒胃。跟著來的雲泉鼎上素用料豐富，香菇、竹笙、麵筋、粟米芯、蘿蔔等。紅燒豆腐，汁醬濃杰適中，剛好掛上，豆腐內嫩有豆味。宮保腰花蝦仁炒得夠鑊氣，少許辣醬惹味，蒟蒻亦帶給素食另一種口感。 雲泉素食的款式比其他素食館多，味道簡單踏實，而且份量很足，白粥尤其煲得香綿軟滑，令我吃得非常滿足。

歡送同事，去附近食素，呢度地點隔涉！唔係專車來都好難來到，今日藍天白雲，埋磚瓦建築好襯，入內先去餐廳對面落單，比晒錢就入餐廳搵位，大玻璃窗透光， 大圓枱膠櫈，枱面已經包好膠枱布，牆壁上有水墨畫，自己攞碗筷，粥飯任食！人多好處係可以試嘅款式多！ 素齋拼盤：麵筋唔韌！最喜歡酸齋，唔會好嗆喉！ 五柳芋頭魚：芋頭滑！外面炸得香脆！五柳醬酸酸甜甜解膩 美果拼雙菇：果仁香脆，雜菇炆得入味！ 春卷拼西檸雞:春卷皮脆，餡料無汁較乾！西檸汁開胃！腐皮脆口，新鮮無益味！ 碧綠排骨：蜜糖豆爽脆，素排骨幾得意！煙韌！獻汁唔會好糊！如意菇時菜:雜菇煙韌，菜心爽脆，可惜獻汁太杰，有點膠水feel!唔夠清爽！ 紅燒豆腐：豆腐皮索汁，豆腐滑！重豆味，自己唔喜歡大白菜！感像湯料！ 腰花蝦仁：仿蝦仁同腰花口感真係好似，好爽口，蔬菜爽脆！ 素燒豬：燒豬味道口感都似，加埋燒豬醬十足十！白粥：潮州粥，加鹽已經好好味！如果熱少少更好！素齋唔錯，係唔係夠熱！環境裝修略簡單，但開窗加郊外地方，有好多蚊孳，食一餐咬了十多粒！店員爽手，基本上落單之後，5分鐘已經上齊！去餐廳前想打電話訂位訂餸，店員電話中講要收錢先可以落單，所以不設

咁岩來呢便開工，同事就帶咗我來呢便食嘢，聽人講話呢度啲粥軟綿綿好正，一於嚟試吓啦。 入到去比我想像中多人，全場滿座，始終係啲山旮旯地方都無諗過咁多人。我哋十幾個人叫咗一個套餐＄600。咁多個餸入邊做得比較出色係西檸鴨，脆得來又唔會好似其他食齋咁多油，同埋佢啲粥果然係名不虛傳，軟綿綿不特止，仲要唔係得啲水。

空山幽空臨殿宇 清靜無為啖素飱雲泉仙館位於坪輋，臨近中港邊界，遠離煩囂，供奉呂祖純陽，今日祭祖重遊，享受道觀清淨無爭嘅環境，悠閒地品嘗齋菜。食齋係先付款，再到對面南齋等食。用餐以自助形式，食具食水自行料理，連粥飯都任食。齋內有字畫對聯裝飾，令人發思古之幽情，細味不言之趣。椒鹽素魚豆腐($90)做法簡，只係炸完灑啲淮鹽調味，但口感味道同香港仔山窿謝記嘅魚片角有得比！彈牙少油，食到唔停得口。如果送酒一流，難怪喺雲泉有藍妹啤賣😅春卷拼西檸鴨($75)大路齋菜點心。春卷餡料足，夠鬆脆，可惜唔係即叫即炸，放涼後香味淡薄，而且油份膩口。鮑魚菇豆苗($75)材料新鮮，豆苗啖啖草青味，感覺健康清新，師傅打薄素蠔油芡，保持材料原味。白粥(免費任裝)最驚喜反而係任食嘅白粥。廣東粥煲法，加入腐竹慢火熬製，質地綿滑米香四溢，「弱水三千，只取一瓢飲」，所以只淺嚐一碗，唯粥香此生難忘。

一行八人八個餸我都唔記得佢地D名食物味道唔係話好出眾, 勝在夠大碟粥飯任裝如果大家去食素食. 記得係入面行下. 內園景色唔錯. 行到後面出口仲有個小市集同士多啤梨園揸車去都十分方便, 有免費停車位假日去都夠玩半日

假日我同屋企人渣車去左雲泉仙館到食齋,75$一個齋菜,我地叫左3個齋菜分別係西檸素雞,齋鹵味,竽頭魚西檸素,齋鹵味雞,對於咁炎熱既天氣黎講最好不過,酸酸地令到好開胃,炸芋頭魚,芋頭夠溶夠香,但美中不足係魚身唔脆,可能已經放左一段時間最後我覺得白粥最正,我估落左腐皮去煮白粥,食落好香好綿

今日同朋友到粉嶺郊遊，行到攰攰地，口痕想搵野食，於是去雲泉仙館嗌左碟鴛鴦卷雙拼做下午茶小食鴛鴦卷雙拼一半係春卷，一半係素鴨，兩樣都炸到脆卜卜，又香又惹味，仲一啲都唔油膩！非常難得！平日食中式齋都好怕啲餸太濃味同太油，呢款雙拼就岩岩好，一人一碗白粥，淨叫一味齋菜盛惠HKD70呢個下午茶四個女仔食都唔錯啊～