雲泉素食中心

營業中

休息中

搭的士🚕去雲泉食素，好耐無來食啦，發覺價錢貴左好多。先講下白飯同粥，覺得麻麻地，唔夠香。芋蓉卷：👍🏻👍🏻👍🏻👍🏻👍🏻好碎又熱辣辣又鬆化，一咬落去碎到有聲，入面芋蓉入口即容，點d甜酸汁超級好味😋豆苗扒菇🍄：👍🏻👍🏻👍🏻👍🏻👍🏻好有獲氣，豆苗好嫩好甜，菇好大塊好入味多汁，食豆苗食到停唔到口。春卷併西檸鴨：👍🏻👍🏻👍🏻👍🏻春卷好碎，有芋容又爽爽地，西檸鴨個汁好好味，甜甜酸酸，唔同出面既味。芽菜春卷：👍🏻👍🏻一個字爽鼓淑螺肉：👍🏻👍🏻無咩特別，唔夠野味。齋鹵味：👎🏻唔好食

食齋都可以食出好味👍 呢間去位於粉嶺坪輋雲泉仙館， 拜完神之後食個齋，仲可以行去後面佢有一個市集， 有林林種種嘅雜貨賣，我就試過喺呢度買新鮮蜜糖嘩呢個乳豬拼盤，唔知以為真係食緊乳豬呢個係椒鹽鮮魷，我都以為自己食緊鮮魷😂🤣溫室豆苗幾時都好幼嫩， 雞扒菇拼豆苗好味

去年因為疫情的關係，所以素食中心暫停營業，今年再度往雲泉仙館看荷花，更可以品嚐美味的齋菜。平日好少吃齋菜的我們對齋菜沒有特別的期望，今日到此一遊順便試吓這兒的齋菜，有喜出望外的感覺。先到售票處點選自己喜愛的齋品，付款後工作人員會分配一個號碼牌，食物便會送到你的桌子上。自助式取碗筷和茶水，叫了齋菜，明火白粥和白飯可以自由添加。白粥好吃到不得了，香軟棉滑，朋友說要多吃兩碗。五柳素石斑 看上去已好吸引，酥脆的外皮包著棉棉的芋頭，很好的口感而且五柳汁不會太多，剛剛好，整體非常美味。海鮮扒時蔬 色彩繽紛，素蝦、素花枝、素蟹柳都有獨特的味道，我最喜歡素花枝，好有質感好像品嚐真正的花枝一樣，時蔬是菜心，清甜爽口，芡汁不會太多。雲泉羅漢齋 同樣美味，多種菇菌云耳雪耳都好入味，送白粥更一流。今日到這裏渡過一個寧靜舒適的週日和品嚐美味的齋品，下次一定會再來。

想食齋就唔好去，舊年年尾至而家都冇開。以為打電話問有冇齋食，點知長期拎起電話，今日入到去都冇開，問賣票附近員工，佢話就係冇齋食所以拎起電話喎………………………………冇言！

位於粉嶺坪輋嘅雲泉仙館，係一個好值得去嘅地方。本身個度嘅廟宇同埋庭園嘅設計非常優美，亦有好多人會去拜太歲。然後順便去坐低食返個齋先走。·雲泉仙館嘅餐廳，食嘅當然係中式齋。係以半自助嘅形式經營。首先你要去售票處嗰度落單俾錢（有相睇），可以喺雪櫃拎埋汽水或者飲品俾錢。然後行返去餐廳嗰邊坐低。白飯自己裝。然後侍應會上菜。·今次叫咗素春卷同素鵝雙拼同埋豉椒炒素田螺。一上菜真係嚇一嚇，因為超級大碟！春卷同素鵝料就 standard 嘢，但係炸同煎得香脆。豉椒炒田螺好惹味，不錯。

大家唔好以為我玩野，又寫雲泉仙館，利申先，我無收受任何利益，我亦都等緊做佢地嘅代言人，只係佢地無搵過我。今日係今年第三次來，由於已經係識途幼馬，但又未去到十幾廿人，於是就散叫一啲未食過嘅餸。鮑魚菇扒豆苗︰正常發揮。呢味生菜綱鮑甫，爽過真鮑，而且夠鮑魚味，可以以假亂真。五柳素石斑係唯一一款重叫嘅野食，同之前食嘅西檸軟鴨不相伯仲，平分春色，只係因為上次又食西檸鴨，所以今次食芋頭魚。佢一如以往咁好味，無敏感者必食。呢客椒鹽魚豆腐，絕對係顛覆我對豆腐嘅了解，因為佢超彈牙，Q彈Q彈，而且椒鹽味夠，食一舊就想食第二舊，簡直停唔到口啊﹗鴻運乳豬件：真係(似)乳豬，又有脆皮，絕對童叟無欺。其實呢樣先係主菜，喺度再介紹多次。經過我嚴謹精密嘅推論，再加上親自向餐廳姐姐求證，原來呢度嘅白粥之所以咁好味，係因為落咗腐竹同白果，令到平平無奇嘅白粥，隱約滲出一股香氣，呢股香氣係一個試煉，如果你唔係一個心平氣和嘅人，絕對食唔出呢股香氣。所以入來食齋，必先勞其筋骨，餓其體膚，清心寡欲，先至可以食多幾粥，清晒啲齋菜，唔會浪費食物。

今日見得閒，於是再來食齋。由於二月份來嘅時候叫過套餐，加上今日少人，於是就散叫兩碟齋菜，慢慢品嚐。再Encore呢碟西檸軟鴨，因為佢好味得來又唔滯，而且要再講多次，同出面食嘅齋鴨相比，完全係兩個層次。跟住呢款豉椒炒田螺，用仿制田螺嘅蒟蒻，爽口彈牙而不韌，配上鑊氣十足嘅豉椒，確實有避風塘嘅風味啊﹗好好味嘅白粥，襯托美味齋菜，䬲而不滯，相得益彰。

近日為免交叉感染，減少了回公司的日子。由於在下並非任職行山銀行，故完成工作後，能名正言順的做有益身心的郊遊活動，第一站就是雲泉仙館。多年前來過食齋，已經覺得非常美味，今日再嚐，美味依舊。天清氣朗，吸引咗好多遊人到來用饍。一落車，就到左手面收銀處買野食。如果無特別喜好嘅話，一大班人，最簡單就叫一個套餐，按人數多寡來揀不同套餐。今次五個人來食，叫咗個D餐，每度菜嘅介紹喺相度寫咗。再簡單講一次，諗唔到食咩嘅，叫套餐最好，有啲套餐無嘅餸菜，下次再試。雖然呢度白飯白粥任裝，但係千祈唔好裝咁多，因為你會食唔晒啲餸啊。好似我今次剩係食一碗粥，跟住係咁食餸，都重有得打包拎走。不過在此非常時期都係好事來嘅，等我今晚唔使出去買餸，安心在家抗疫。

聖誕節唔行商場 遊車河吸吓新鮮空氣耶誕食齋都唔錯 假期都多人 齋客食飽就走 冇hea 好快有枱 上菜極神速 餸菜唔熱羅漢齋~ $90 唔熱 味正常 份量比之前少咗可能大量制作 嗶倒咩就係咩 材料唔勻循大量粟米仔 草菇蘑菇1-2件 竹笙頭1細片白烚椰菜墊底 淡口酸齋併盤 ~ $90 凍盤 份量足冇減少但 酸齋唔夠汁 齊义燒粒硬 素鴨乾淡口 推介 春卷西檸鴨双併白粥~任食 米香但少米粒 唔飽肚唔覺有白果腐竹味 糊口似打咗芡🤔白粥要排隊攞 冇托盤提供 要續碗續碗攞要小心 有小孩走動 & 通道坐咗客好窄有烏蠅飛飛吓 都要注意被搶食

秋高氣爽在和暖陽光底下最適宜到郊外走走，今日就帶了雙親來雲泉仙館秋遊，順道品嚐一頓豐盛素宴。在粉嶺火車站旁有綠色小巴可直達門口非常方便。這個天氣最好坐戶外，感受一下大自然空氣。我們一行五人就叫了一個 $440 套餐。齋滷味，五種口味各有特色。每次食素總會有芋頭魚出現🤣🤣！炸雙拼是我喜愛但又邪惡春卷及腐皮卷，同樣香脆出色。不想食套餐的可選擇單點菜式，數拾款總有適合自己口味！

在香港食素，除了那些傳統的素食店之外，除了那些又中又西的新派素食之外，在新界離島，充滿著大大小小的寺院，當有有不少，會提供場地給善信們品味一餐齋宴。去年的一個星期天，突然心血來潮，由我主動說要去食齋，而我想起的，是一個集景點，花園，寺廟及飲食於一身的地方，是比較偏僻的，位於粉嶺至沙頭角半路路程，一個叫坪輋的地方內的一間寺廟《雲泉仙館》。一入來，寓意吉祥的福祿壽就迎接著大家。來參拜的，來參觀花園的，或像我們為了來食的，都會搶著與福祿壽合照。同福祿壽合照完，當務之急，是食。所以，我們的第一時間，就是去收鐵的地方，買飯票。買好飯票之後，基本上就是隨便霸位。我們就去了面積算是最大的南齋。安頓好之後，就要自行拿碗筷同茶水。而飯票就放在檯上，工作人員就會自動按飯票上的食物選項，一一把美食送到。南齋的內堂，就是一個很簡單的飯堂。在寺院茹素，不需要華麗，簡陋，帶有清靜的氣氛，能讓大家靜心地品味素食，就是來寺院食齋的主意。《雲泉仙館》的套餐，大多都由炸點開始。一份香脆的香卷，一份香口的西檸素鴨，是令不茹素的大人及小朋友都會愛上的素小點。香卷包的是芋頭，不過，饀料是什麼其實不太重要，重要的是每一層的春卷皮

踏入農曆七月，為咗安心都會去食一食素，去除累積咗嘅戾氣！ 呢間雲泉仙館並唔近任何地鐵站， 要刻意搭的士入嚟先至會去到， 咁先至可以顯出我嘅誠意！佢係自助形式地去添飯同粥，食幾多盛幾多，唔好浪費！ 不得不提，白粥有用腐竹，所以比一般白粥更為有味綿密。炒素螺～ 素螺真係誠意之作，不論係外型、口味同埋顏色，像真度極高，配埋豆豉去炒，非常惹味！芋頭魚～ 炸漿非常之薄，而當中包住嘅芋頭蓉係非常之creamy易入口，加上酸酸甜甜橙色嘅汁， 真係非常之開胃！西檸素雞春捲拼盤～ 雞嘅肉質唔係似真嘅雞，但西檸汁就非常夠味！春捲係非常之抵讚嘅一個item！ 夠曬脆口，餡都好好食！

今日和朋友K參加了香港一天遊。團餐在這裡食午餐。所以可以試一試這裡的素餐。我唔係經常參加一天遊的。更加很少機會到這些地方。所以都很好奇和期待。曾經參加過去天壇大佛的一天遊，那裡的素餐本人都好滿意。所以我對這些地方出品的素食都好有信心。今日的天氣很熱，其實都好影響心情。一到食飯時間，餐廳的職員就邀請我們到室內坐下食佢地準備好的白粥。因為太熱，姐姐都明白我們在外面會很辛苦。當然佢地的冷氣真係⋯⋯很弱⋯講回食物：白粥真係很美味。因為佢無味⋯天氣熱，只要清淡夠綿，已經係一碗好粥。芋頭魚汁比較酸。賣相也不太特別。但都算係一門功夫菜。這個酸齋真係唔夠味，里面有幾款，但只覺得食緊一大團麵筋。這個菜式大家都很喜歡。唔太油膩。其實今日這餐午餐。有幾款菜式很相近很近似。十二人份量剛剛好。菜式都比較淡味。團餐都算可以。中規中矩。如果和出面素菜餐廳比較。真係會失望。不過天氣熱。其實可以飽肚已經很開心。

郊遊去粉嶺摘士多啤梨，必經雲泉仙館，摘完士多啤梨就留在雲泉仙館食個午飯。當日假期好多人，用餐地方都好廣，設有室內、戶外，當日室內滿座，唯有坐戶外，好在當日天氣幾好，不太熱，又有少少風。坐戶外仲可以邊食邊賞花。先去售賣處落單及付款，再拎住個有號碼牌仔自行搵位，坐定定之後，就會有職員望下邊張枱既號碼牌，就會派遞齋菜畀你。茶水、白飯、白粥自行任添，特別要讚白粥非常綿滑，仲有好香既白果腐竹味道，好食到一碗接一碗。2個人食，叫咗3碟，每碟份量都好多，最終食唔晒要打包返屋企。五柳素石斑  $90五柳素石斑即係芋頭魚，由細到大都好鍾意食，雲泉仙館既芋頭魚一向都是必叫照牌菜，芋蓉份量十足，食得出真材實料，芋味香濃，而且炸得好鬆化可口。如果不愛吃醬汁，可以落單時都特別要求汁另上，咁就可以自行點幾多醬都得。西檸軟鴨  $90食齋菜最鍾意食齋鴨，用腐竹一層層製成，口感有層次，表面亦煎炸得金黃。雲泉鼎上素  $90 味道較淡有D遜色，略嫌木耳太少。

今天勞工假，本想到粉嶺採摘士多啤梨，可惜原來已過了採摘的時候，真掃興。時間已近十二時，於是我倆便到了附近的雲泉仙館吃齋菜。到售票處選了菜後，拿了一個號碼牌和發票，便進入了食堂。內裏已坐滿了八成食客，服務員為我們安排好座位後，便等待我們的食物到來。這裏的飯和粥原來是任添的，全是自助形式。拿好碗筷，食物便送到了！~羅漢齋 （$90）材料豐富，計有滑滑的草菇、磨菇、冬菇和雲耳；爽囗的紅蘿蔔片、粟米仔和雪耳；還有好物沈歸底的鮮揶菜。整個餸都好清淡，味道不會太鹹或淡，獻汁薄簿有光彩又不肥膩。~七彩素拼盤 （$90）顏色討人，有橙色的酸齋和齋叉燒、黃色的咖哩齋和素雞，淡啡色的豉油齋和齋燒鵝粒，最脆口的還是放在頂的素鵝，外脆內軟。這裏的齋菜對二人來説是大了些，所以我們最後還是要打包剩餘的食物回家。不可不提的是這裡的粥煲得綿綿的，內裏還有腐竹，非常美味。相比之下，白飯只是一般。平日多吃肉，間中吃吃素可清清腸胃，確是好選擇！飯後便遊遊園，賞賞花，非常寫意。