香港地 (已結業)

今日同同事出街食lunch,一於試哩間岩岩裝修好既香港地，唔知點解個名無左美心兩個字，不過裝修靚左好多，好多人等位，我地一行6人12點30分到，等左20分鐘有得入。同事介紹我食常餐（$56），見到價錢嚇到個心離一離，乜而家d常餐貴左咁多😨不過午餐餐牌又無乜想食，最後就揀左龍蝦湯通粉。我仲加14蚊叫左杯奶茶冰。滑蛋高質，好creamy有蛋香，賣相好吸引！多士香脆，而且個包本新帶甜味，有牛奶包既感覺，唔錯！龍蝦湯濃郁，好似西餐飲既龍蝦湯咁，不過叉燒份量少，而且好瘦。哩杯奶茶冰明明張相好大杯，出到黎好長好窄，本新凍奶茶就加4蚊，哩杯d冰係用奶茶雪，令你杯奶茶由頭到尾都無變淡，原價28蚊，跟餐加14蚊，諗諗下，我叫多杯凍奶茶都係18蚊，而家要加14蚊多兩杯奶茶冰真係好唔抵，不過一試無妨。最後我個餐要70蚊，張單夠200蚊用enjoy卡有9折，所以變左63蚊，我覺得都係貴左d,久唔久食一次都ok,日日食荷包唔得掂！