鳯皇居小菜館

營業中

休息中

今日中午出咗深水埗做完嘢，過完午飯時間有啲肚餓，就諗住附近搵間餐廳食個碟頭飯醫下肚，又唔想去啲兩餸飯舖頭，所以嚟咗新開冇耐位於元州街嘅鳳凰居小菜館。😊天時暑熱熱辣辣叫番支青島啤酒 chill下再睇下揀啲咩食🍻😋。 午餐下午茶炒粉麵飯、蒸餸、小菜樣樣有👍🏻👍🏻。凡惠顧午餐都有例湯，味道正常淡淡嘅味精湯。叫咗個鮮茄牛肉飯， 成碟飯無論係飯同個汁都係微暖，飯應該係過完午市之後放咗喺個保溫煲度好耐已經唔暖，牛肉醃過正常味道，不過個汁好水，番茄同啲配菜都仲係好新鮮只係連埋個汁啱啱就咁兜亂出嚟冇煮過咁樣。👎🏻其他小菜冇試過唔知味道如何，不過呢碟飯兩餸飯仲好過佢。😔😔

試咗一間新嘅小菜館，好唔錯所以特登寫篇食評支持一下。六個朋友去食叫咗八樣嘢，食中菜最緊要係唔油，佢做得到俾個叻。首先講吓蛋黃魚皮，唔油脆口乾身又大份抵食好味。荷葉金針雲耳蒸雞，雞好滑好入味，最緊要多金針我最鍾意食，唔似出面得嗰幾條。水煮牛肉，有朋友突然之間好想食水煮嘢，本身本人就有點抗拒唔係川菜館食水煮野，驚會伏但係佢依家小館好做到嗰個味道，真係有麻香辣嘅感覺，下次想試埋佢個水煮魚。酥炸生蠔，做到粉少皮薄脆口唔油。有個豆腐唔記得咗叫咩名，呢個算係最普通但係都好食😋最好係佢仲有海鮮一人一隻扇貝，好大隻好新鮮。睇到佢餐牌可以做海鮮加工，咁唔使去西貢啦。小館feel, 食物質素好，乾乾淨淨，價錢合理，值得推薦。