龍邦燒味小廚茶餐廳

營業中

休息中

本身都有食開呢間燒味餐廳，一向都正正常常。但今日夜晚7點叫左個乳豬燒鴨叉燒飯，點知乳豬無肉，燒鴨得骨，叉燒正常。但變左用70元買叉燒飯，貴左成倍。 忍唔住要反映下。

雙拼62，會免費有一個湯我就叫雙拼飯 乳豬同埋肥叉燒 其實整體質素上都唔錯，而且絕對係厚切 過呢一個價錢亦都係中上嘅價錢 我覺得冇乜特別平 份量我覺得都可以接受 整體唔會話太差個湯熱辣辣 我覺得都幾好飲 老火湯嚟講都算唔錯乳豬嘅味道非常好食 有五件 就係鍾意食佢肥肥地嘅口感 會有乳豬醬 鍾意嘅朋友可以搭配一下 ．肥叉燒就幾好 非常厚 而且味道都一流 送飯 ， 簡直 就係正 朋友叫左燒肉就麻麻哋 有少少柴 不過佢燒鴨嘅味道就唔差 食得出餐廳咁多人排隊嘅原因

某周日上午去到,未到中午,餐廳內約七成滿,但仍有少量卡位及三幾張吉枱,我們二人去到,見有兩人坐卡位,每人一邊,所以亦想咁樣坐,但伙記態度強硬,說;"唔得!"所以就算,坐埋一邊,佢轉頭大力拍兩杯水落張枱 就行開; 跟住我哋睇咗一陣餐牌就想點餐,但附近只有一個伙記不停行來行去,我見佢行過,就乘機揮手,但轉頭佢竟然招呼幾個剛入嚟嘅熟客,仲幫佢哋落埋單,搞咗好耐,已經忘記咗我哋,再等多一段時間,卒之有個燒味師傅出嚟,經過問吓我哋嗌咗嘢未,我話冇人理我哋,佢就話等一陣,過咗一會,有另一位伙記嚟,我咪話都冇人招呼嘅,佢話係呀,冇人返工吖嘛,佢態度正常,就幫我哋落單,我點 燒肉燒鴨飯,朋友點 叉燒切雞飯, 每人一杯 凍檸茶,就咁,由入嚟到點餐都過咗差唔多半個鐘,而且當然未滿人,只係冇伙記返工,同態度有問題,冇人招呼,食到一肚氣,雖然 呢度口碑唔錯,又有傳媒推介,燒味質素正常,等候期間亦不停有人入,有 年輕人,西人,中年,長者都有,係幾旺,但過程中被無視,兼黑面,又唔夠人手,實在係貼錢買難受,唔想再嚟.

外賣等咗半個鐘，仲同我講全部人都係等咁耐有人俾你等咁耐，唔會再幫襯呢間垃圾，今時咁黑嘅服務態度真係好到不得了。去幫襯好似仲欠咗佢嘅咩？如果想受氣嘅話就大家去幫襯佢啦。

上環星期日比較少餐廳開門，嚟到呢間龍邦買外賣飯盒，燒味雙拼飯$48，價錢係上環黎講算係合理但買了外賣後足足等了半小時有多，完全冇諗過要咁耐，因為得一位師傅斬燒味，要處理堂食外賣訂單，同埋外賣平台既訂單，眼見佢既堂食位置都係full house叫左油雞燒肉飯，份量都幾足，燒肉個皮都脆脆地，而油雞味道都好好，值得一試，佢送左個例湯，應該係菜乾湯，都飲得出佢落足料去煲總括嚟講都推介大家去試下，但預左要等耐小小

上環神級燒味飯，每個星期食一次都可以，價格相對相比其他燒味店貴少少，但係值得🤗店舖內環境一般，服務也是一般，但食物卻是超班👅平日晚上唔需要排隊，就可入座店內出邊都keep住有人叫外賣，所以入到去叫完嘢食等嘅時間就比較耐少少。推薦豉油雞，雞滑，雞皮濃郁豉油香味，但唔會太鹹👏🏻👏🏻叉燒鬆化，燶邊香口👏🏻👏🏻乳豬就要睇出爐時間，所以比較難預。燒肉正常。燻蹄無味，就唔需要叫😬通常都會叫豉油雞叉燒雙拼，跟瀨粉。瀨粉個湯係大地魚湯，有時味濃，有時無味，所以比較飄忽。

之前買過外賣叉燒，佢哋啲叉燒係OK嘅…今次去堂食，下午茶時段，都5張空枱，我諗住想坐得舒服啲啫，個男侍應死都要我哋搭枱，硬係要我哋同陌生人手臂黐手臂食飯先安樂。落單嘅時候，個麻甩佬侍應懶型咁，又唔即刻寫低我哋要食咩，落兩個餐啫，都可以出錯一個餐。我話想要返我點嘅叉燒餐，就兩個麻甩佬侍應衝過嚟xxxxx我，大佬呀，你宜家落錯單喎，使唔使咁炆憎？佢哋嗰種怨氣就好似，俾人賣身去龍邦做咗幾年都未放過假咁我諗返轉頭，譚仔嗰啲姐姐，佢哋服務態度原來都好OK喎 lol燒肉好很鹹，可以鹹魚撈飯嗰種鹹***建議餐廳用數碼點餐，咁咪唔使俾咁多錢養住啲咁惡死嘅麻甩佬侍應，佢哋嗰啲面口，仲賤過老細 omg

又到Lunch 嘅時候，出去食多數都好難搵位，買外賣最實際，呢間燒味店都係經常幫襯之一，趁今次介紹下。燒味外賣套餐，燒味飯+飲品或例湯。因為都好多人外賣，要攞籌等，但都好快。 叉燒油雞餐，$47。例湯，是日係合掌瓜湯，少飲湯水嘅我一定係揀湯，好足料呢。要了雙拼，賣相唔齊整但正嘢來，燒味份量頗多及大件，叉燒蜜汁味好濃,加上肥瘦適中,肉質鬆化又香口，好味！油雞外皮爽口入味內質嫩滑幾好味！伴上大量薑蓉，多到可撈飯食更惹味。速食午餐之下。

上環可以食燒味飯的地方越來越少, 尤其是好味的. 這裏近幾個月經常到訪.  說真得肥叉味道真係唔錯,  好彩的話燒肉新鮮出爐, 肥叉燒肉飯真係無得頂, 不過真係要揀日子先得. 今天來這裏諗住買肥叉燒回家加餸 , 想講佢地做外賣服務真心膠, 一條友去斬燒味, 甚麼玩法. 又要做堂食,  其實堂食應該坐滿, 啲人係咁入, 又要做外賣, 目測堂食加外賣 最少7 -80 人, 你一條友咁去斬法, 斬到天荒地老, 成班人企咗係路邊望住個師傅, 心諗賺咁多錢點解唔請多個人去幫手, 一個做外賣, 一個做堂食咪快囉, 唔係因為想搞旺個場, 等啲人排晒係門口乾等嘛 ? Crazy ,  等咗15 分鐘跟住大聲同個老板娘講, 話妳地根本唔係做生意既, 我唔等了, 退款啦. 垃圾成村人等你一個師傅去斬燒味, 個個企係門口等20分鐘或以上, 咁優質外賣服務,  話過以後永遠不會幫襯

好耐好耐以前，就聽說過某某港姐話上環呢間燒味鋪啲叉燒冠絕香港，一直都好想試，今日飛雲終於嚟喇，趁lunch去附近搞私務，就算趕啲都過去試下。一去到門口無預期既墟陷，不過都有七成滿，可能已經一點半過咗高峰掛，門口有個可能係老闆著住廚師服既阿叔，見我入嚟都無招呼直接揚下手，我諗系叫我坐掛，咁坐低睇餐牌，燒味飯好似只有一個60蚊雙拼餐，無仔細睇就是旦叫個叉肉飯算。於是到我揚手啦，阿叔望望我無反應，阿姐又望望我繼續無反應，再舉手結果都一樣，如是者坐咗可能有四五分鐘，我覺得自己忽然變得透明咗，咁唯有起身知難而退喇。網上評論話越做越難食，服務又差，可惜佢哋無比機會我試，幫佢哋平反，唯有係我張名單入面剔除喇。結尾又系嗰句，咁多人北上，唔系無原因既。P.S 又無食評又無相，唔知openrice比唔比po。

上星期途經上環，諗住食燒鵝飯，見到有兩個沒有人坐的卡位，想坐下，那伙記大大聲叫我去搭枱，算啦，好多茶餐廳都係咁。我坐低之後，叫了一個燒鵝飯$67，點知給我一些皮再加好多骨完全兩嚿肉都冇，而家有兩三嚿肉我都唔會出聲，我叫夥計來，說淨係骨都冇肉，夥記大大聲說係咁喎，拿着碟飯走過去切燒鵝的伙記說佢話冇肉喎，跟住又圓碟拿回給我，說又唔啱食呀？我話唔係油啊，根本成碟都冇一嚿係肉，佢又拿回給我撤銷我的夥計，那夥計大聲說係得呢度咁多咋，好似講到成間舖一小塊鵝肉咁，所以切了三嚿給我，換了那些骨幾塊皮仍然存在，我吃的時候不停喺度給說話我聽。我都未見過一間咁惡劣嘅茶餐廳，夥計有樂態度又差。

夜晚8點係上環諗唔到食乜，就行入龍邦燒味小廚茶餐廳，打算試下曾經係全香港數一數二嘅叉燒。不過，可能太夜去嘅關係，啲叉燒真係令我有啲失望。先講外觀，落單時講明半肥瘦，黎到片片都偏瘦，最慘係勁燶，有一半係黑蚊蚊，睇相都見到 。真係特登黎食叉燒變左食淨一半 ，超級失望😞好在我叫左雙併飯，另一併係豉油雞係唔差，幾好味，雞肉嫩滑，好在有雞搭救，如果唔係我都唔知點食落去 。就算8點都仲係好多人入黎食飯，我地都等左好耐先有人得閒落單，但整體服務態度算親切，同埋好有人情味，聽到隔離熟客係一早留定餸俾佢地，呢啲街坊生意係有溫度嘅 。仲見好多遊客黎食Tim

成日聽人講呢間燒味好食，經過下午4:30左右順便入去試吓，叫了叉燒，生腸湯米+凍啡，有個光頭肥的男人落單收$63，我諗是出名價錢可能貴少少，點知後來朋友話有下午茶的$35+雙拼$5+凍飲$3，我上Openrice 查餐牌發覺有下午茶的，但抬面冇下午茶餐牌，原來唔問他們就收你正價，這樣服務我不會再去幫襯了。

每星期都會食一兩次，上次去食晏搭枱坐收碗碟車仔前面，個男侍應好大力將碗碟掟入架車仔，d水濺起整到成枱客都濕晒，有個疑似老細（係youtube 睇過訪問佢）講兩句打完場就算，道歉都冇句。唔講食物質素差左，我覺佢d侍應幫老細趕緊客，除左對客人態度惡劣，侍應之間亦經常互寸講野有骨，我食晏短短半個鐘，都感覺到成間鋪個工作氣氛超差，好心你d侍應做得唔開心就唔好做，唔好搵d客出氣，再係咁遲早執笠。

尋日晏晝諗住入去食個飯，我哋兩個人入去我都好好態度問佢哋啲侍應我哋應該坐邊，門口嘅侍應態度其實好正常佢叫我哋直入去最入，跟住入到去見到有張卡位，我第一個坐低跟住有個戴口罩個樣五十幾歲嘅阿叔同我講嘢好似喝狗咁（同我坐埋一邊呀！）佢嘅態度令我十分之反感我即刻回應佢你講做得咁唔開心你唔好做呀嘛！我入嚟畀先食嘢！係咪要受你氣唔怪之得個個都話要返上去食飯喺香港就係畀呢啲咁嘅侍應拖低曬啲level，呢一間茶記以後永遠不會有下一次