Delite Long Ping Bistro (已結業)

又唔係啲負評講得咁差，如果你話氣氛就一定係普普通通，都係附近街坊多，但係格局，裝修都可以俾到85分既，至於待應態度都ok丫，落單爽手，都有禮貌，至於食物不過不失，份量ok同味道對得起個價錢，至於酒精飲品，雖然唔係好夠喉，但75蚊杯算係咁，食物既擺盤質素都有90分，都算有落心機，總括嚟講都真係算唔錯👍🏻俾個like

甚少寫食評， 但呢間真係差得好離譜， 唔明讚好果d係咪自己友， 點樣可以讚得出口， 究竟呢間係一般西餐廳定係茶餐廳扮西餐廳之流呢？ 見到食評唔錯，所以選呢一度同朋友食晚餐， 想像唔到食物可以咁差， 食物差都算， 佢竟然可以冇一樣嘢係好食㗎，大佬啊， 原本已破壞晒我同朋友食飯既心情架喇。 咁樣都唔係死罪，但連服務態度都離譜，我閒日夜晚去， 又唔係好多客， 都係咁樣嘅服務態度， 真係唔知假期日子佢哋點算。 西餐廳價錢， 大排檔服務， 貼錢買難受， 要提醒下大家，真係諗清楚至好去幫襯。

見到呢間新開幾靚，諗住同老公去食下，睇左有咁多好評就一定冇死啦，我地7點幾入去，唔係好多人，唔駛等，坐低好快就落左單叫左個burger薯條，豬肉餃子，其實平心而論可能我期望太高，所以對食物有少少失望，burger有burger味，薯條有薯條味，就係好一般，唔係食評講到咁好味，豬肉餃子個皮都厚，好奇怪，最緊要係，侍應態度真係唔好，趕頭趕命收碟，又冇禮貌，其實附近有咁多選擇，我地應該就唔會再幫襯㗎啦。

周圍行，發現這轉角小店，午飯時間，索性入去試下，原來係高質西餐。午巿套餐，90蚊，加一，性價比高！秘製香料炸雞鎚外層雞皮香脆，內層肉質嫩滑，香料味道四溢，極度野味，伴啤酒一流。食一碟唔夠喉，再嗌多咗一碟。手撕豬肉漢堡配薯條神秘香料醃豬肉，配新鮮椰菜，麵包烘烤過，薯條炒得剛剛好，唔會過硬過軟，熱辣辣上枱，誠意可嘉。Lamp Chop師傅廚藝功力，羊架肉質嫩滑，羊味充滿口腔，香滑薯蓉伴碟，牛油味香濃，青豆滿滿薄荷味，配塔一流。

今話說約班姊妹出嚟食飯，難得四個齊人，就去左朗屏附近呢間餐廳到食飯同聚舊地方都幾開揚，但係吾知係咪開左道門有啲熱。我哋坐低左陣睇緊個drink menu,有位短頭髮既staff見到問我地係drinks 上有冇野可以幫到你呀？呢個即刻加哂分～我地班姐姐咩都吾識～淨係想要甜啲入到口，個staff 都好有耐性甘解答，可能呢個係好小既事，但依家出去食飯，有時真係比錢買難受，一係就比面色你睇😭之後7:30開始好多人～甘岩我地啲main course 到齊哂～呢個時候緊係同班姊妹影相格喇～我地見個位staff甘忙都吾好意思打擾佢，點知佢一眼望到知我地想點😂仲好有耐性幫我地揀岩角度添，點解可以連影相都甘專業😂之後我哋想叫多杯cocktail,我地又叫左個位staff黎，真估唔到仲記得姐姐們吾飲太凍既野，最後叫左兩杯cocktail,加一杯special cocktail,都好好飲🤪講左甘耐drink同service係時間講下野食，野食就不過不失，但係ribs有啲大份，本身想叫甜品～但係另一個胃話俾我地知食吾落

簡單黎講：唔收加一，但做到加二既服務。好耐冇出街食餐飯真係由頭到尾舒舒服服。明明冇胃口，因為環境舒適同服務周到由starter食到甜品。所以一定會再去，唔係因為味道，唔好搞錯，佢野食ok但未去到叮一聲，但講舒適同服務，就算淨係得啤酒飲都值得再去chill下，同朋友聚下。話說之前路過見佢Happy  hour  生啤 $40/杯 （Asahi/1664），已經諗住搵日試。今日唔知食咩又冇咩胃口打算去飲兩杯算。一入去第就被個冷氣驚艷左，真心涼，唔係死凍，又唔會勁吹你個頭。溫度舒適已經令成件事加十分。環境同service都西餐格調，2人比4人檯彷彿係上世紀既事，又加十分。你可以話佢客少所以比4人檯，但真心出面已經冇乜餐廳會理你舒唔舒服，只講「效率」。然後突然播歌就出左事⋯不過未至於扣分，最多由西餐拉返去酒吧咁囉，咁本身就係黎飲兩杯。野食可以打卡，不過不失，最尾見到主廚唔係華人，所以口味真西餐一啲都唔local，同尖沙咀差唔多。服務好係咩位：好多地方又做特價招來，但當你叫特價野又唔比好面色你睇，依度冇不單止，仲好過你平時出面叫正價menu。冇加一，但都冇黑口黑面，仲會主動換碟，我地就換左兩次。

唔想去大商場，就決定行過嚟朗屏附近睇下有咩好食，見呢間裝潢好新淨，就入嚟試一試。餐廳環境都算大，坐位寬闊舒服，枱同枱唔會好近，就算同朋友傾計都唔會嘈到隔離，所以私隱度都算高。牛肝菌黑松露燴意大利飯，意大利飯都幾creamy， 啲飯都做到好煙韌，成碟食哂都唔覺得膩，不過就食唔到有黑松露味。香蒜橄欖海鮮意大利麵，個意粉一上桌就已經有好香嘅香蒜味，意粉質地彈牙，味道OK啦。雞肉墨西哥餡餅，薄薄地，餅皮香脆，食落普普通通啦。

Chill Sunday陽光普照，落街歎下悠閑先再返屋企做家務🧑🏼‍🔧本身鎖定係另一間cafe，未行到去就被轉角呢間新開嘅西餐廳吸引，裝潢新淨同坐位寬闊，見到自己鎖定嘅cafe未開就順理成章試下呢間了。1️⃣1️⃣1️⃣5️⃣ 星期日Brunch時段🥗 Long Ping Bistro Breakfast符合水準的all day breakfast，無多無少有腸、煙食、煎蛋、薯餅，菜同茄汁豆。個人幾欣賞佢sour dough ，熱食真心好味。🍳 Egg Benedict水煮蛋但流唔到汁出嚟，不過個汁幾好。☕️ Flat White香濃。個拉花係像樣。☕️Caramel Latte外型失望，不過飲入口係合格的。

新開冇耐，見個裝修幾靚，但就比附近嘅環境餐店感覺格格不入咁🤣係度開好似曬咗咁意粉都ok嘅 不過不失意大利飯都幾creamy， 啲飯都做到好煙韌哩個入面唔夠熱，出面嘅皮有色，但邊位唔算脆口

呢間餐廳喺朗屏站附近，都算幾新，星期一兩點左右經過見幾乾淨舒服就入去試下。2點去到仲有lunch set 可以點，價錢都幾抵$90，仲唔洗加一。揀左兩個set，Beef Bistro Salad 同Fish Burger with Fries。Beef Bistro Salad 味道幾清爽，啲蔬菜都好新鮮，牛肉既肉味幾濃，係有咬口既肉質。Fish Burger with Fries 既漢堡都唔錯，魚好滑，炸皮薄身夠脆。Fries 上左粉先炸既，都脆，唔錯。跟set 有Vanilla Ice Cream 同餐飲送，可以加$15轉咖啡。我試左Latte，偏nutty，咖啡味濃，拉花都唔錯，我鍾意。

每次經過呢間餐廳都想試，每次經過見到價錢覺得貴，近期經過的價錢都商議，我就試吓佢嘅午餐，以$90可以選擇五款午餐比較便宜，唔需要加入加一，這日我就揀咗意大利海鮮飯，來到我面前的意大利飯表面體質平凡其實入面有驚喜，入面有蝦同埋三文魚、啲飯適合我哋香港人食飯唔會生，仲有雪糕送，下次我會試埋其他款，價錢可以接受。題外話，我入店內只得一台客，坐落之後有開始好多人嚟食午餐，餐廳佈置都幾好同埋有音樂聽，侍應多數講英文，都有一兩個係講中文，都值得可以試吓

🌮Pulled pork tacos $75🍀🍀🍀🍀🍀🍀🍀🍀🍀🍀以小鐵架裝起4隻小tacos🌮外皮口感適中，入面包住豬肉絲、菜、荳芽、紅椒粒同洋蔥粒🧅味道酸酸鹹鹹，頭大一食就知有沙律醬🙈（個人唔鍾意沙律醬）所以唔鍾意依款tacos,相反朋友好喜愛食🤣🥣Nachos $70🍀🍀🍀🍀🍀🍀🍀🍀🍀 份量相當大碟，配有芝士、墨西哥辣椒🌶️、番茄粒🍅、牛油果蓉🥑、酸忌廉脆片加埋拉絲芝士、醬同辣椒一齊食好味，好脆同帶帶刺激既辣🤣不過頭大略嫌牛油果蓉同酸忌廉少左啲🥲令到中間個層唔夠醬，乾左啲🍔Bistro chicken burger $115🍀🍀🍀🍀🍀🍀🍀🍀🍀 個漢堡好大個🍔個包烘到好脆，加上好香既芝麻味，配有沙律醬、番茄🍅、生菜🥬、洋蔥🧅雞扒炸到好脆，外皮炸到好似魚柳皮，食食下有啲似麥樂雞既味😂不過太鹹🥲而薯條🍟反而好食，粗粗地腍腍地同少少鹹👍🏻🌼🌼🌼🌼🌼🌼🌼🌼🌼🌼☀️整體而言，餐廳環境又不錯，本身被派坐左張大枱，但冷氣機滴水，就轉左坐2人位🤣氣氛幾好又有情調，好岩情侶黎增進感情🤪價錢都係晚市價，份量都多，而食物方面，朋友覺得好食，頭大就覺得ok，未到好好食

話說一行三人 行過覺得裝修唔錯 又有梳化位 咁就諗住入去試下野食係唔錯 夠熱 但野食未食哂 就不停想收走我地d食物 我地已經講左兩次，話未食完。最後，個金色頭髮嘅waitress 見到我地食哂就話”呢個食哂啦可？’‘我地話ok 之後佢火速收走碟盤 連我地用餐嘅用具都收走埋 我心諗 想叫多個甜品都廢事 ，最搞笑嘅係由用餐到我地走都唔夠一小時 。真心覺得佢勁趕客！最後吹水吹得唔盡慶，要走去老麥再吹過，老麥仲坐得舒服過呢間餐廳！如果你地想吹水傾偈 就千祈唔好搵呢間食。唔會有下次豬肋骨好軟淋淋肝菌黑松露意大利飯 夠熱 但冇黑松露味

某個星期六，同朋友經過呢間餐廳，覺得佢嘅裝修俾人覺得會坐得幾舒服嘅感覺，就入去試吓，食物係可以嘅，唯獨是講廣東話嗰位waitress 嘅服務態度就非常欠佳，由招待入餐廳內至到離開果一刻，全程都係木無表情，完全沒有笑容，令我倆覺得有不被受歡迎嘅感覺，當我哋用完餐坐咗一陣之後，天花上向住我哋嘅冷氣風口，風勢開始突然變得超猛，我哋過咗一陣都忍唔住要即時離開，呢種情況令我地覺得有趕客之嫌！所以，呢間餐廳嘅服務態度，係唔會值得我哋再去幫襯！另外值得一讚嘅係，餐廳內嗰位外籍講英文嘅waitress，佢嘅服務態度就非常好同專業，不時笑住問要唔要幫我哋加啲水，呢位員工就係呢間餐廳唯一可取同值得讚賞嘅一點。總括嚟講，冇下次！食物水準是可以的，份量亦足夠，價錢尚算合理，食物種類和款式亦與同區其他餐廳類似，整體上食物質素、款式和價錢都與同區其他餐廳相若。

疫情放緩，又係時候約朋友聚餐見到朗屏站下新開左間，就去試下星期日中午，當附近的餐廳都已經要排隊等位時，呢到仍然walk in都可以即時入座，可能因為新，可能因為冇lunch set開係街坊位，最緊要抵食睇完menu，只有幾頁，由小食到主食加埋約20個選擇。魷魚圏，圏圏變成條條，熱辣辣脆卜卜，但沒有任何味道炸魚薯條，薯條好吃，炸魚粉漿太厚，醃料見到一撻有一撻冇燒豬肋骨，這碟也有薯條，但這些薯條像翻炸一樣，跟豬肋骨一樣，又乾又硬黑松露飯，味精不像黑松露，因為落太少？卡邦尼意粉，有濃濃的忌廉汁個人喜好卡邦尼跟炸魚薯條中的薯條