影片
以上資料只供參考, 請與餐廳確認詳情
相關文章
好耐冇約中同一齊食飯，揀返大埔方便大家，但大埔近來冇咩新cafe🙈突然醒起前大埔官中地下有幾間餐廳。環境：揀左依間全室內餐廳，有冷氣歎。餐廳都幾大，坐得舒服唔會枱貼枱。食物：餐包一坐企就附送，新鮮出爐配醋點好開胃👍🏻餐湯勁多料，好多雜菜，燴到淋哂吸收哂湯既精華🥘雜菌手工意粉（唔記得exact名稱）🍝手工意粉幾彈牙，但整體較乾身，好快就濟左🥲柚子凍茶🍹柚子淡淡清香，冇咩甜味的，配合茶香，非常適合夏天消暑☀️
繼續閱讀
放假同仔去揾食好多時因為要去預備/做功課關係都去一啲地方揾食今次就黎到大埔， 又要為方便爸爸泊車及媽咪Shopping，咁就黎到大埔藝術中心。 之前成日見到裝修都唔知點入， 今次就好明確了仔仔都好鐘意， 話waitlist 都堅持要等好在佢有等候區可以俾我地坐下唔駛大熱天時熱住等佢環境好大好闊落， 有日光， 都好舒服。有時要固住個小朋友都好會忽略咗好多嘢， 又怕佢嘈住人， 但好彩台與台之間唔算好近🤭食物方面都好大份，唔錯， 叫左啲平時好少食既野同埋佢主打手工意粉🍝因為午餐， 所以只食左個大蝦手工意粉，pizza, 兒童餐☺️
繼續閱讀
同屋企人去咗大埔藝術中心食晚飯，揀咗主打手工意粉嘅 PENTOLA。餐廳由舊校舍活化而成，氣氛好好，裝修有心思。不過整體嚟講，真係 環境贏食物。⸻環境：前身校舍活化，紅磚配木質風，打卡＋chill 住傾偈都啱一入到去就覺得成個地方好唔似平時喺香港食意粉嘅場景：紅磚牆、木板間格、金屬感五金框架、同系列布藝餐椅&梳化配搭質感枱面，空間感十足。由一間舊學校活化改建，感覺特別有層次，成個場景啱晒打卡影相。我最欣賞佢啲細節位做得幾用心，例如見到侍應準備餐紙時，將螢光藍、紅、橙、綠四色順序排列備用，擺枱時每張都會有唔同顏色，未開餐都睇得出餐廳對環境同形象有要求。⸻服務：I人最鍾意嘅型 — 安靜、有效率、不會太熱情PENTOLA 用 QR code 點餐，不過員工比例非常充足，有需要即刻有人幫到手。自己唔太鍾意 overly-friendly 嘅服務風格，呢度啲侍應唔走熱情路線，但有正常禮貌、做事快，會主動加水。對我呢種 I人嚟講，係加分位！一坐低，侍應就送上一碟麵包同黑醋，食住等落單，細節又加一分。⸻手工意粉 vs 安格斯牛扒：出乎意料之戰1. 焗蒜蓉牛油大海蝦意粉（意外地失望）叫呢個意粉因為佢係主打，以為穩陣，點知一食落去有啲失望。意粉麵體偏粗，中間芯位置比較硬、整體偏乾。我明白手工意粉未必會似港式 al dente，但呢個乾到咬落去有啲攰，加上個汁又偏鹹。旁邊隻大海蝦可能因為太大隻，火喉唔易控制，有啲燒焦位置食落帶苦澀。屋企人食咗一半就放低，我呢個「清枱大師」最後幫手收尾。2. 炭燒安格斯封門柳配燒汁薯條（意外地驚喜）反而冇乜期望嘅牛扒，竟然好出色：「有肉汁、有肉香、冇韌筋」。揀咗五成熟，除咗頭尾兩件全熟之外，中間都係靚靚五成熟，食落滿意。（佢預設五成熟，如有喜好可以註明）頭尾兩塊熟啲嘅我分咗俾唔食見紅嘅屋企人，兩個人都啱晒口味，估唔到。薯條係粗身、外脆內軟，熱辣辣上枱，唔係「倒幾條就算」嗰種，配埋沙律菜唔會太膩，整體平衡得好好。⸻總結：下次會再嚟，不過可能只會叫返牛扒，加 Pizza 或者多啲人 share 幾道菜。呢間餐廳屬於 環境氣氛 > 牛扒 > 手工意粉 嘅類型。如果你去開大埔超級城附近，可以順路試下。無論係情侶、朋友、定屋企人，想慢慢 chill 住食餐飯、影下相、傾下偈，都係個唔錯嘅選擇。但…唔建議叫意粉，留返肚比其他菜式可能會開心啲。
繼續閱讀
友人聚會，見好多好評，就揀咗呢間試吓。中午點幾兩點，都過咗peak hour，內裡都有好多空位，侍應問有冇book位，我地話冇，咁個侍應就行咗開去，如是者我地响門口等咗差唔多5分鐘，其間亦冇其他客人等位。之後終於“有位”，坐抵咗，完全冇招呼，見有個侍應慢動作經過，問佢可唔可以幫我地落單，佢話一定要自己用QR code落㗎喎，冇得幫你落，講完就走咗。OK, 叫咗3個set brunch, 諗住share食，啲嘢都嚟得好快。問慢動作侍應攞多2個公义，佢答完話好呀，5分鐘都冇攞過嚟，冇咗回事，咁再叫另一個女侍應攞，又等咗幾分鐘，眼見啲食物都開始凍，友人見冇人理會，起身行埋去問另一個正在執枱嘅男侍應攞2隻义，呢位男侍應唔知係咪唔鍾意俾人叫佢做嘢，好悔氣咁話，咁我依家咪幫你囉！然後攞住幾隻义行埋嚟，好惡咁話，“你要幾隻呀！”簡直係撩交打嘅態度，友人話“咪話咗要2隻囉”，惡侍應一邊黑口黑面咁放低，同時亦用好兇狠嘅眼神掘住我地，跟著就行開咗。呢間餐廳啲食物ok, 但份量少，以佢嘅收費，响大型商場甚至中環都有好多選擇，咁嘅服務態度再好食都唔會再嚟，除非想食到一肚氣。
繼續閱讀
食物普普通通唔係好食，餐廳地方算係濶落，復活節假期唔駛等位，但幾個侍應做嘢實在太慢，又冇禮貌，問攞2支义share食野，問2個侍應都唔記得攞，問第3個侍應態度極差，勉強先去攞餐具過嚟，你地又唔係爆場，又唔係咁多客，都可以咁悔氣，佢哋係咪要去再培訓，其實而家大部分茶餐廳啲阿姐都好快手同有禮貌，又醒目，唔知點解咁hea 又唔想服務客人嘅侍應，就唔好勉強自己去做服務行業啦！強烈建議大家不要去呢間餐廳受氣！
繼續閱讀
您可能會有興趣的...